Dinamizando TIC en Betanzos

Xa se poden elixir os mellores blogs do mundo

2010-03-18T11:19:00.001+01:00

Desta volta non hai bitácoras galegas finalistas. En anteriores ocasións, tres publicacións do país obtiveron o premio organizado por Deutsche Welle.

Esta semana abriuse o prazo de votación da sexta edición dos BOBs, os premios internacionais de blogs organizados por Deutsche Welle. Na web dos premios pódense elixir as mellores bitácoras nun total de 17 categorías, entre elas o máis distinguido en 11 linguas -entre elas non o galego-. En total, compiten 187 blogs, podcasts e videoblogs dun total de 8.408 suxestións recibidas.

A novidade deste ano é a inclusión da categoría Premio Especial Cambio Climático, para recoñecer as mellores publicacións dixitais arredor da materia. Ademais, en xuño, o Foro Global dos Medios de Deutsche Welle estará relacionado coa mudanza climática.

Desta volta, dos 11 finalistas de cada categoría seleccionados polo xurado -formado por "blogueiros prominentes-, non hai ningún blog galego. As anteriores edicións dos BOBs xa tiveran protagonismo do país, cos premios que recibiron o coruñés Nacho de la Fuente, con La huella digital; o betanceiro Juan Varela, con Periodistas21, e mais María Amelia, finada en 2009.

Eroski Center achega a Galicia os seus pedidos en liña

2010-03-18T11:18:00.000+01:00

Os establecementos de Eroski Center levan tempo cunha ampla presenza en Galicia, pero agora trasladan tamén o seu servizo de vendas á Internet, de xeito que dende a súa páxina web xa permiten facer pedidos aos centros de Vigo, Santiago, Ourense, A Coruña e Lugo e ás súas áreas de influencia, podendo o cliente elixir entre máis de 8.000 produtos e marcas habituais, cunha interface multilingüe (en español, inglés, alemán, éuscaro, catalán e galego) e gastos de envío de balde para pedidos de máis de 80 euros realizados antes do remate do mes (o resto de pedidos deberán engadir 5,98 euros en concepto de gastos de preparación e servizo).

Este novo servizo resulta moi cómodo para o usuario, que pode realizar a súa compra dun xeito moi visual e intuitivo, podendo elixir incluso a hora na que recibir o pedido no seu domicilio (dentro dunha marxe de 2 horas).

Máis de 160 persoas participaron na primeira cata de viños por multivideoconferencia que se fai en España

2010-03-12T10:49:00.000+01:00

Oito Telecentros de Comunicación galegos conectáronse hoxe simultaneamente para degustar viños da subzona de Chantada. Esta actividade celebrouse con motivo da XXVIII edición da Feira do Viño da localidade luguesa.

Máis de 160 persoas participaron hoxe na cata guiada de viños a través de multivideoconferencia que acolleu o Centro Multimedia de Galicia (CMG), en Santiago, e outros sete Telecentros de Comunicación das catro provincias, con motivo da celebración da Feira do Viño de Chantada, que este ano celebra a súa XXVIII edición.

Desde o TC chantadino, a enóloga Mar Vilanova de la Torre, investigadora do Consejo Superior de Investigaciones Científicas (CSIC), foi a encargada de guiar aos asistentes na cata de viños da subzona de Chantada: Viño do Fortes (branco), Quinta de Alborada (tinto) e Vía Romana (Tinto de barrica). Vilanova estivo acompañada polo responsable do TC, Segundo Navaza, moderador do evento; e por Roberto Iglesias Delgado, membro da Comisión organizadora da Feira do Viño de Chantada.

Esta iniciativa, pioneira en España, puido ser seguida tamén a través dunha multivideoconferencia desde os Telecentros de Comunicación de Oroso, Catoira, Carballo, Tui, O Barco de Valdeorras e Monforte de Lemos, onde se deron cita, ademais dos participantes no acto, representantes das distintas corporacións municipais. Varios deses TC rexistraron máis solicitudes que prazas dispoñibles, o que dá conta do éxito que tivo esta actividade.

Todos os asistentes dispuxeron do material necesario para a degustación: mantel de cata, cuspideira, cataviños, sacarrollas, baetas, caldos... Trala cata, empregaron a videoconferencia para formularlle á enóloga as súas dúbidas e comentar as súas experiencias nesta materia.

A primeira edición da Feira do Viño de Chantada desenvolveuse no ano 1983 e, segundo os datos da época, achegáronse ata ela preto de dez mil visitantes. Desde entón, tense asentado coma unha das feiras máis importantes da provincia, converténdose, a finais dos anos 90, na Feira do Viño máis representativa do noroeste peninsular.

Esta iniciativa desenvolveuse no marco da rede de Centros para a Modernización e Inclusión Tecnolóxica de Galicia (CeMIT), encargada de coordinar as actuacións das distintas aulas públicas de acceso a Internet da comunidade.

A USC acollerá en abril unha nova edición do maratón galeguizador de software libre

2010-03-12T10:48:00.000+01:00

Logo do éxito de participación acadado o ano pasado co maratón de adaptación á nosa lingua de diverso software aberto, a Comisión de Normalización Lingüística da Escola Técnica Superior de Enxeñería de Santiago decidiu repetir este ano a experiencia colectiva de galeguización. A idea, unha vez máis, é reunir baixo un mesmo teito a usuarios de ferramentas informáticas do máis diverso (estudantes, mestres, investigadores) para traballar na tradución de aplicacións de emprego común dentro da Escola. A tarefa, á que calquera pode ter acceso, constitúe un xeito rápido e eficaz de adaptación de software galego, xogando ao seu favor o bo ambiente que se crea e a concorrencia simultánea de tódolos contribuíntes ao proceso. Este ten un obxectivo multicanle: favorecer o traballo informático en común, impulsar a presenza do galego no eido do software libre e nas ferramentas de uso común e favorecer a achega educativa da Escola. O ETSE Open (así se chama) xa ten aberta a preinscrición.

A iniciativa, informa a USC, conta con dúas actividades interrelacionadas, unha primeira formativa sobre as bases técnicas e prácticas para abordar proxectos de tradución e unha segunda acción de localización en que se poñerán en práctica por parellas todos os contidos aprendidos ao traducir unha aplicación de software para o galego.

Os xoves 15 e 22 de abril desenvolveranse os obradoiros en que técnicos e lingüistas da Oficina de Software Libre da USC introducirán aos participantes nos principios básicos do labor de localización. Serán en horario de mañá na aula que o Departamento de Electrónica e Computación ten na Residencia Universitaria Monte da Condesa.

Xa o 30 de abril as persoas que participaron no obradoiro reuniranse de novo para compartir música, comida, conversa e traballo de localización. Haberá mesmo un premio Máis e mellor para aquel equipo que sexa quen de traducir máis cantidade de cadeas e coa maior calidade.

O II ETSE Open de SL / Fiadeiro de localización de software libre está organizado de xeito conxunto coa Oficina de Software Libre e co Servizo de Normalización Lingüística.

A web Yporquenosolo convida á viaxe por conta propia

2010-03-11T13:37:00.001+01:00

Hai iniciativas ás que lles senta Internet coma unha luva. Neste amplo feixe de propostas do máis variado que non poderían case nin existir sen o poder de convocatoria da Internet atópanse sen lugar a dúbidas os recursos en liña relacionados coas viaxes e co turismo, dous eidos de actividade que nin sequera se esgotan nas páxinas persoais ou corporativas onde participan parellas ou grupos, senón que tamén lle achegan potencial a quen concorre só. De internautas e viaxeiros a título individual é do que trata Yporquenosolo.com, páxina web sobre as amplas posibilidades de non agardar a que apareza un/unha acompañante para botarnos ao camiño (ofrece plans de viaxe para persoas que non se coñecen entre si) e que vén de facer reconto de éxitos sobre a actividade deste ano e o anterior. A páxina, face visible da axencia do mesmo nome, é visitada cada ano por máis de 300.000 persoas e conta con arredor de 45.000 internautas rexistrados recibindo cada pouco o seu boletín de noticias.

A proposta, informa o seu creador, Santiago Rey, baséase na súa propia experiencia persoal, que logo dunha ampla experiencia organizando itinerarios para diversos grupos foi quen de descubrir que os que “mellor funcionaban” eran os colectivos integrados por viaxeiros sen relación previa algunha. A cousa, informa, comezou promovendo excursións pola Serra de Madrid e arestora xa se aplica a filosofía do viaxeiro pola súa conta a todo tipo de desprazamentos internacionais. Segundo apunta Rey, o 60% das persoas que foron convocadas a través da web para participar nunha actividade desta índole repetiron experiencia. O único requirimento para formar parte dunha destas viaxes é acudir só/soa.

Gomaespuma comparte o seu arquivo radiofónico nun novo podcast

2010-03-11T13:33:00.001+01:00

Os afeccionados ao programa de radio do dúo humorístico Gomaespuma están de parabéns, pois Juan Luis Cano e Guillermo Fesser sorprenden ao iniciar un podcast co que están a compartir o seu arquivo radiofónico coa súa audiencia, que así poderá revivir os mellores momentos do seu divertido programa. A radionovela Cándida, as primicias primiciosas, as críticas cinematográficas ou as recreacións paródicas de momentos históricos (reais ou inventados) serán algúns dos contidos accesibles dende o Podcast con Orejas, no que están a publicar máis de 6 cortes de audio case cada día, que ao ser de duracións reducidas (entre 2 e 17 minutos cada un), resultan moi prácticos para amenizar tempos mortos ou os nosos desprazamentos ao traballo ou ao centro de estudos.

Google Maps comeza a ter en consideración ás bicicletas

2010-03-11T13:31:00.000+01:00

O servizo de mapas de Google continúa a evolucionar, e aparte de calcular rutas a pé ou en coche, agora incorpora a función de guiarnos cando imos en bicicleta, aínda que esta funcionalidade polo momento só está dispoñible nos EE.UU.

Deste xeito, en Google Maps tense en conta os carrís bici ou a pendente das costas á hora de calcular o camiño a seguir para chegar dun punto a outro, aínda que tememos que na internacionalización desta ferramenta os españois non vaiamos a poder tirar dela todo o proveito posible por ter un número de vías adaptadas ás bicicletas moi inferior do que acontece noutros países europeos.

Máis de 1.600 mozos inscríbense na undécima edición de Xuventude Galicia Net, o maior evento tecnolóxico da comunidade autónoma

2010-03-09T17:11:00.002+01:00

Santiago acollerá os días 26, 27 e 28 de marzo no Pazo de Congresos e Exposicións a undécima edición de Xuventude Galicia Net, o maior evento tecnolóxico da comunidade autónoma que reunirá a todos os participantes con seus propios ordenadores para que se poidan conectar entre eles mediante unha rede local.

Xa son máis de 1.600 mozos e mozas os que cursaron a súa preinscrición na festa que organiza a Dirección Xeral de Xuventude e Voluntariado. Aínda que o prazo para anotarse xa rematou, os que se quedaron fóra poderán participar nos obradoiros deste encontro informático, xa que a gran novidade desta edición é a apertura de portas aos talleres para as persoas que non se inscribiron na ‘Lan party’ (Local Area Network Party).

Con esta aposta, Xuventude Galicia Net transformarase este ano nun espazo para a aprendizaxe, xa que o público en xeral poderá acceder a obradoiros centrados en novas metodoloxías e linguaxes de desenrolo, deseño web ou software libre. Ademais, haberá obradoiros lúdicos centrados no ámbito do ocio. Estas actividades desenvolveranse durante os tres días que dura o evento e o único requisito necesario para asistir é apuntarse previamente a través da páxina web.

Tres sectores
A ‘Lan party’ será, como noutras ocasións, un espazo de encontro xuvenil, de formación, de iniciación ao mundo dixital e, en definitiva, un marco ideal para o intercambio de datos e experiencias e para dar a coñecer os últimos avances tecnolóxicos e, por suposto, para a potenciación do software libre.

Xuventude Galicia Net dividirase este ano en tres sectores cun único obxectivo: a aprendizaxe e o manexo das novas tecnoloxías.

Así, o primeiro espazo, denomínase Intranet, que será o corazón da party. Para participar só é necesario levar o ordenador e alí poranse a disposición dos asistentes 40 quilómetros de cable e velocidade de conexión de 1 xigabit.

Esta zona da party non só consiste en pasar horas diante da pantalla do ordenador, xa que dentro do recinto do Palacio de Congresos tamén se disputarán concursos, campionatos e xincanas de temática tecnolóxica.

Os concursos son unha constante neste tipo de eventos. Cada ano a oferta é máis amplía e, por iso, na undécima edición os usuarios de Intranet poderán participar por primeira vez en campionatos de lanzamento de CD, dobraxe, foto, vídeo ou deseño 2D e 3D.

Con respecto aos torneos, disporase dunha web interna de xogos onde se anunciarán todas as roldas e as horas do xogo que lle toque a cada participante.

O segundo dos espazos, Extranet, supón outra forma de participar no evento. O acceso é de balde e aberto para todos os públicos. Esta zona situarase este ano no recinto exterior do Pazo de Congresos e Exposicións. Habilitarase unha carpa cuberta de 600 metros cadrados durante os tres días, onde terán lugar diversas actividades de ocio dirixidas a toda a familia.

Extranet contará como novidade nesta undécima edición cun futbolín, un toro mecánico, obradoiros de globoflexia, de defensa persoal e de esgrima antiga europea.

Entre todos os asistentes entregaranse papeletas para unha rifa na que se sortearán diferentes premios, como xogos para consolas, o domingo 28 pola mañá no auditorio do Palacio de Congresos.

Os obradoiros
Na terceira das zonas de Xuventude Galicia Net emprazaranse os obradoiros. O obxectivo de todas as actividades que se levarán a cabo neste espazo é afondar un pouco máis nas novas metodoloxías. Entre os talleres que se ofertarán destacan temáticas de fotografía, redes sociais, traballo e modelos de negocio en Internet ou traballo e modelos de negocio en Internet.

Xuventude Galicia Net non é a única party que se celebra en Galicia. De feito, existen outras a nivel rexional como é o caso da ‘Arroutada Party’ da Coruña, a ‘Kutruparty’ da Estrada e a ‘Arousa Party’ de Vilanova.

A intención da Dirección Xeral de Xuventude e Voluntariado é crear a longo prazo unha rede de partys galegas para xuntar os esforzos e deste xeito poñer a Galicia nos primeiros postos a nivel nacional da formación continua nas novas tecnoloxías.

Sete anos de coñecemento libre en galego

2010-03-09T17:09:00.001+01:00

Máis de 56 mil artigos na nosa lingua fan da nosa wikipedia a número 41 do mundo, dun total de 271 versións en diferentes linguas.

A Galipedia, versión da Wikipedia na nosa lingua, fai sete anos este 8 de marzo. O proxecto botou a andar nesa data de 2003. Dende entón, xa son máis de 56.200 os artigos que a integran, facendo da enciclopedia libre en galego a número 41 do total de 271 versións que existen.

Aínda que se descoñece a identidade real da primeira persoa que creou a primeira entrada da Galipedia, considérase que o seu "pai" é o usuario Agremon, Antonio Gregorio Montes, un profesor de Física de Ribadeo que fixo a súa primeira achega o 22 de xullo daquel 2003. Actualmente, o proxecto ten 12 administradores e máis de 300 usuarios activos.

O obxectivo da Galipedia é contar cunha enciclopedia colaborativa en galego coa que afondar no coñecemento. Por iso, está aberta á colaboración de todo o mundo, ás diferentes correntes de pensamento que non sexan agresivas coas demais, a calquera tema, en continuo crecemento e renovación, en contacto coas demais wikipedias para seguir mellorando e aberta ao uso por calquera persoa con acceso á internet, nas condicións da licenza GFDL.

O portal de aprendizaxe chinés-galego, entre os máis valorados da Rede

2010-03-09T16:40:00.002+01:00

Para a Consellería de Educación, o portal que impulsa a prol á aprendizaxe de chinés cumpre os requirimentos para ser eficaz e mesmo para ir alén diso. Para certificalo, o departamento da Xunta salienta o feito de que www.chinesecom.eu (así se fai chamar a páxina en cuestión) atopase acubillo entre os catro cursos en liña desta lingua máis valorados polo principal buscador da Rede a nivel internacional, sendo ademais “un dos máis visitados”.

Un dos puntos máis salientables da web, que contou coa participación da Dirección Xeral de Educación, reside en que se trata da primeira en achegar un curso de chinés-galego e en confirmarse como a única da súa natureza (cunha lingua minoritaria de por medio) no contorno europeo. Asemade, non se limita a fornecerlle á comunidade internauta unidades de aprendizaxe (un total de dez) senón tamén datos sobre a cultura do país asiático, favorecendo ao coñecemento do mesmo entre os nosos cidadáns e as nosas empresas, nos últimos tempos moi interesadas en colaborar con compañías chinesas na achega (por pór un exemplo) de alta tecnoloxía.

Chinesecom, informa a Xunta, desenvolveuse a través dun proxecto desenvolvido dentro do marco do programa Lifelong Learning, da Unión Europea, e nel participaron socios de seis países europeos, ademais dunha universidade de Pequín. “O éxito”, engade a Dirección Xeral, “débese en gran medida ao carácter innovador do mesmo, que incorpora abundantes recursos multimedia dunha gran calidade, e ao importante esforzo que vén realizando para a súa difusión internacional”.

En marcha un certame de fotografía na Rede para celebrar o Día Mundial da Auga

2010-03-05T10:20:00.001+01:00

O vindeiro 22 de marzo celébrase o Día Mundial da Auga e a Rede xa comeza a tomar posicións sobre este importante evento. E máis aínda se temos en conta a gravidade do cambio climático que xa comezou e o descontrol que está a sufrir no mundo o ciclo da auga por mor do quecemento da Terra, con países como o noso onde definitivamente chove de máis e outros como Kenya onde levan case cinco anos sen ver caer unha pinga do ceo. Volvendo ás iniciativas da Rede, sinalar que a problemática está presente en blogs como Ecologismo.com e Fotografia.net, dous espazos onde (segundo informan os seus responsables directos) se quere mobilizar á comunidade internauta para que caia na conta da importancia da auga e a súa calidade, co fin de contribuír á conservación do medio e do benestar social.

Así, dende os devanditos portais, pertencentes á rede Ocio Networks, veñen de pór en marcha o concurso de fotografía A auga é vida para celebrar o 22 de marzo, efeméride que este ano se dedica á calidade da auga co fin de demostrar que esta é tan importante como a calidade á hora de xestionar os recursos hídricos.

O certame, que xira arredor da auga como temática principal e unificadora (auga como fonte de vida, procedente de océanos, ríos ou lagos), fica xa aberto a tódolos internautas que queiran participar.

O único requirimento que se lles pide é que lle fagan chegar á organización do certame un máximo de tres fotografías en formato electrónico a través do seguinte enderezo: comunicación@dmdima.com. O prazo de recepción dos traballos remata o vindeiro 21 de marzo. Os gañadores daranse a coñecer ao día seguinte.

Para a elección da imaxe gañadora non só se terá en conta a calidade da fotografía, senón tamén a súa capacidade para reflectir a importancia da calidade da auga como achega a prol da conservación dos ecosistemas sans. O premio a recibir non será outra cousa que un ecosistema en miniatura, o que se coñece como ecoesfera, un desenvolvemento dos científicos da Nasa que constitúe o primeiro sistema de equilibrio natural autosuficiente e pechado.

Novas de Youtube

2010-03-05T10:03:00.001+01:00

Dende Google levan tempo proban os seus sistemas de recoñecemento de voz aplicados a YouTube, e finalmente decidiron abrilos ao público en xeral, de xeito que os usuarios que conten con vídeos en inglés poden solicitar a creación automática de subtítulos para os mesmos, incrementando así a súa accesibilidade (o que agradecerán os usuarios con problemas auditivos) e a súa internacionalización (posto que aos subtítulos tamén pode aplicarse a tradución automática).

Esta nova funcionalidade de YouTube fai moi sinxela o traballoso proceso de subtitular vídeos, e os responsables dos vídeos poden tamén descargar os subtítulos xerados automaticamente para optimizalos e resubilos aos servidores de Google, mellorando así a precisión destes textos.

Aínda que inicialmente só aparecen automaticamente as transcricións dos vídeos que o soliciten expresamente, pretenden que esta funcionalidade chegue a todos os vídeos dispoñibles nos que o proceso sexa posible (principalmente en clips con xente falando, polo que contidos coma os vídeos musicais serían imposibles de tratar con esta tecnoloxía).

Nos vindeiros meses irán ampliando o número de linguas recoñecidas por YouTube para a creación de subtítulos automáticos.

O dominio .com cumpre 25 anos

2010-03-02T13:14:00.002+01:00

Este ano o dominio .com (punto com) celebra o seu 25 aniversario. En marzo de 1985 rexistrábase o primeiro nome de dominio .com, symbolics.com, dando paso a unha Internet de consumidores que, 25 anos máis tarde, continúa a transformas as comunicacións, o comercio e a sociedade, informa VeriSign.

E para conmemorar as vodas de prata, lanzouse a web para 25yearsof.com para celebrar a innovación na rede, e exhibir os innovadores e empresarios que viñeron dando forma a Internet e contribuíron ao seu desenvolvemento.

Como parte desta celebración, VeriSign anunciou os "top 75" entre persoas e empresas que supuxeron un gran impacto no desenvolvemento de Internet e o noso mundo. Desta lista de persoas e empresas influíntes, un xurado elixirá os "25 .com". Anunciaranse os gañadores durante unha gala que terá lugar en primavera en San Francisco.

En 1995, internet seica ía "fracasar"

2010-03-02T13:09:00.000+01:00

Un blog revive un artigo publicado en Newsweek hai 15 anos que aseguraba que o mundo virtual non triunfaría pola falta de contacto humano.

Hai exactamente 15 anos, Newsweek publicaba un artigo moi pouco optimista sobre o futuro da internet. Grazas ao blog Three Word Chant podemos recuperar aquel texto, que hoxe pode parecer bastante inxenuo, aínda que algúns dos argumentos se seguen a escoitar na actualidade.

Así, non se confiaba en poder ler as novas a través da web fronte aos xornais en papel, nin nas posibilidades educativas da informática ou na administración electrónica. Mesmo se amosaba escepticismo fronte ás afirmacións do 'gurú' Nicholas Negroponte, que confiaba na venda de libros e de xornais a través da rede.

A reportaxe, escrita por Clifford Stoll titulábase "Por que o ciberespazo non é, e nunca será o nirvana". O autor preséntase como un experto no mundo das redes pero que non lle ve futuro ao mundo virtual como substituto do real. O certo é que as limitacións que tiña a rede nos anos 90 fóronse superando e que as posibilidades aumentaron en 15 anos.

Así, alude á enorme cantidade de información que se pode atopar na rede e á súa escasa organización fronte á que ofrecen os medios tradicionais. O que non tiña en conta foi a posterior aparición de xeitos de organizar a información de xeito colaborativo, a partir das redes sociais, ou escollendo fontes de información a través dos RSS, por exemplo.

Tamén se refire a eivas como a incomodidade que supón ler textos nun computador, ou aos cortes constantes da conexión e as limitacións dos servidores da época. Naquel momento, ademais, as experiencias que se puxeron en marcha arredor da democracia electrónica fracasaron polo escaso interese dos internautas. Así mesmo, introducir computadores nas aulas resultaba extremadamente caro e precisaba da formación do profesorado.

Sobre o comercio electrónico, o autor do artigo amosábase reticente a pagar a través da internet e a mercar algo sen ter un vendedor diante. A falta de "contacto humano" e o "illamento" que producirían os computadores eran, para Stoll, un dos principais motivos do seu irremediábel fracaso. Faltoulle prever que as relacións sociais na rede non substituirían, senón que complementarían, e mesmo potenciarían, as da rúa.

O orgullo lingüístico percorre a rede

2010-03-02T13:08:00.001+01:00

A campaña “Orgull@s do noso, orgulls@s do galego” da Coordinadora Galega de Equipos de Normalización Lingüística está a ser un éxito. Unha semana despois de que se publicase na rede, o vídeo protagonzado polos actores Luís Tosar, María Castro, Martiño Rivas canda o produtor Antón Reixa, a xornalista Belén Regueira e a gaiteira Susana Seivane xa tivo máis de 20.500 reproducións en youtube e outras cinco mil, directas e indirectas, na canle Vimeo. Outro dos vídeos, “En galego, proba e verás”, no que participan Isabel Risco e Carlos Ares, foi reproducido tres mil veces.

As redes sociais tamén están espallando dunha maneira notábel a campaña. Diferentes grupos en Tuenti teñen a máis de 15 mil mozos e mozas adheridos. Mentres que o grupo “Nós tamén estamos orgullos do galego” en Facebook conta xa con máis de 2.100 amigos.

Dende a coordinadora lembran que a campaña, que seguirá activa durante todo o curso escolar, intenta transmitir un sentimento de orgullo polo idioma propio tanto á comunidade escolar como ao conxunto da sociedade.

Ábrese a preinscrición á 11ª edición de Xuventude Galicia Net

2010-03-02T13:06:00.001+01:00

A Dirección Xeral de Xuventude e Voluntariado organiza un ano máis o encontro Xuventude Galicia Net, chegando así á súa 11ª edición, te terá lugar entre os días 26 e 28 de marzo, retomando coma sede o Pazo de Congresos e Exposicións de Santiago de Compostela.

O prazo de preinscrición para o evento xa está aberto na súa páxina web, e unha vez comezado o proceso de inscrición oficial, os asistentes interesados recibirán información sobre o pagamento das taxas para poder participar no evento (40 euros, susceptibles dunha rebaixa do 25% para usuarios do Carné Xove) que combinará xogos en rede (con torneos), intercambios de experiencias, obradoiros (que este ano tamén estarán abertos a persoas que non estean inscritas nesta LAN Party), concursos… funcionando coma un encontro no que o contacto humano é chave para afondar no mundo da informática, as TIC e o software libre, a fotografía e o vídeo dixital e outras actividades.

A Xunta xa ten operativo o rexistro electrónico de facturas

2010-03-01T13:34:00.001+01:00

O sistema electrónico de facturación xa está operativo na Administración Autonómica a partir de hoxe, co que se cumpre o prazo comprometido o pasado mes de outubro pola conselleira de Facenda, Marta Fernández Currás. A implantación deste novo sistema iniciouse hoxe en Presidencia da Xunta e na Consellería de Facenda e irase completando de maneira progresiva no resto de departamentos ata o 22 de marzo.

Este rexistro garante que o pago das facturas por parte da Xunta se faga en 45 días, 15 menos que o máximo legal establecido, e mostra o compromiso do Goberno galego co impulso da Sociedade da Información, enmarcado nunha estratexia de modernización da propia administración para simplificar trámites e reducir os custes de xestión.

Tamén facilita a centralización de maneira uniforme de todas as facturas (tanto as manuais como as de formato dixital) emitidas polos distintos provedores co que se acada unha xestión máis rápida e eficiente das mesmas.

Ata o momento era practicamente imposible saber o tempo que transcorría desde que se recibía unha factura ata o momento efectivo do seu pago. O primeiro paso para reverter a situación é poder controlar o momento en que entran as facturas na Xunta, para o que se creou este rexistro que permitirá, ademais, mellorar as necesidades de tesourería e planificar os pagos da Administración autonómica.

O proceso de facturación na actualidade está sustentado basicamente en papel polo que a factura electrónica permite prescindir deste soporte, favorece a incorporación das tecnoloxías da información e da comunicación e conta con solucións seguras que permiten a optimización, a eficiencia e o aforro de custes.

Ao rexistro posto en funcionamento dende hoxe pódese acceder a través da web da Consellería, na que o usuario pode rexistrarse e incorporar as facturas ao sistema, así como consultar o seu estado de tramitación.

Neste sentido, a pretensión do Goberno vai máis alá de simplemente rexistrar a data de entrada dunha factura, xa que a creación deste Portal Electrónico permite centralizar as facturas, incorporalas ao sistema e consultar o seu estado de tramitación, xa sexan enviadas á Administración en formato dixital ou en formato papel.

Permite dispoñer de información relevante para a Administración, tanto desde o punto de vista orzamentario como de xestión da tesourería. Deste xeito, os provedores poderán coñecer o estado no que se atopan as súas facturas, o que aportará unha gran transparencia ao proceso. E a propia Administración poderá tamén coñecer e xestionar axeitadamente a súa propia facturación.

Estas medidas permiten, en definitiva, ofrecer un mellor servizo a cidadáns e empresas; menores custes; mellorar a liquidez das empresas; así como unha xestión moderna, rápida e eficaz.

Gmail incorpora oficialmente prestacións dos seus Labs

2010-03-01T13:33:00.002+01:00

O servizo de correo electrónico de Google leva meses probando numerosas prestacións a través de Google Labs, de xeito que os usuarios que o desexase, puidesen activar características moi determinadas, das que 5 das mesmas veñen a incorporarse oficialmente a Gmail, mentres que outras poucas caeron definitivamente ante a súa mala acollida.

As características que pasan a ser oficiais en Gmail son: o autocompletado de buscas, a integración con YouTube, as etiquetas de cores, o detector de adxuntos esquecidos (detecta se facemos referencia a adxuntos nunha mensaxe para lembrar a súa carga antes do envío por correo electrónico).

O CNTG acolle o 15 de marzo unha xornada sobre seguridade das redes da información

2010-03-01T13:26:00.001+01:00

O Centro de Novas Tecnoloxías de Galicia, emprazado no barrio de Conxo de Santiago, vai acoller o vindeiro 15 de marzo unha xornada sobre seguridade da información e nas redes. O contido desta acción formativa, que está previsto que comece ás 16.30 horas e se estenda ao longo de tres horas, incluirá unha parte inicial que xirará arredor do sistema de xestión da salvagarda dos datos, seguindo logo coa definición de activos e a análise de riscos para, finalmente, centrarse na explicación en detalle de diversas ferramentas e servizos de control. A asistencia ao evento, previa inscrición a realizar en liña a través do portal web do CNTG, é libre e de balde, unicamente condicionada ao aforo do local.

O prazo de formalizar a participación no dito curso, que contará con Gabriel Fuster (manager de NetAcad e responsable da formación e a calidade do programa Networking Academy en África) en labores de relator, estará aberto entre os días 26 de febreiro e 11 de marzo.

Segundo informa o CNTG, centro de investigación e divulgación dependente da Consellería de Traballo, a xornada estará dirixida sobre todo a profesionais que estean en situación de desemprego ou ocupados, tanto do sector público como privado, “que teñan responsabilidades ou exerzan ou orienten a súa actividade no eido da seguridade ou da administración de sistemas”, sinala o CNTG.

Un blog feito por maiores en Galicia, gañador do II Concurso Nacional de Mayores cON Iniciativa 2009

2010-02-26T13:51:00.000+01:00

As herbas medicinais en Allariz: unha historia de recuperación e empoderamento feminino, gañadora do certame organizado pola fundacion Fundetec

A dinamizadora e participantes da iniciativa, promovida desde o concello de Allariz, recolleron o premio en Madrid da man de David Cierco, Director director general para el Desarrollo de la Sociedad de la Información

O certame recoñece o esforzo dos axentes sociais que desenvolven iniciativas orixinais para fomentar a inclusión das persoas maiores na sociedade da información, así como a predisposición destas a aprender algo novo e perder o medo ás tecnoloxías.

Na iniciativa gañadora, impulsada polo Concello de Allariz, participaron 150 mulleres de ámbitos rurais que recompilaron os usos e tradicións das diferentes herbas medicinais da zona, realizando fotografías destas e colgando toda esta información nun blog. Deste modo, estes coñecementos transmitiranse ás xeracións futuras a través das novas tecnoloxías.

A Secretaría Xeral de Modernización e Innovación Tecnolóxica da Xunta de Galicia colaborou de forma activa na convocatoria do certame ao terse adherido ao mesmo, no marco da Estratexia Galega para a Sociedade da Información, co obxectivo de incentivar a participación no concurso nesta Comunidade Autónoma.

O resultado é que Galicia foi a segunda comunidade autónoma máis activa desta segunda convocatoria: das 88 candidaturas presentadas, 16 son galegas, e foron promovidas a través da rede de Centros de Dinamización da Sociedade da Información.

En total, máis de 260 maiores galegos están adquirindo novas habilidades no uso de Internet e do ordenador grazas a estas accións. A nivel estatal as actividades impulsadas por Maiores cON Iniciativa achegou as novas tecnoloxías a preto de 4.000 persoas maiores de dez comunidades autónomas diferentes. Xunto coa iniciativa de Allariz, Galicia concorreu á final nacional con outros dous proxectos, ambos lanzados dende a Rede de Dinamización:

* Memoria de Muller de Ribadeo, do Centro de Dinamización desta localidade no que participaron cinco mulleres que relatan en varias gravacións audiovisuais aspectos persoais, sociais e culturais da súa vida, mesturados con imaxes e música

* O blog Bergantiños: pasado e presente, do Centro de Dinamización de Carballo no que un grupo de maiores plasmaron as súas vivencias, recordos e tradicións relacionadas coa súa terra.

Yahoo! alíase con Twitter para ofrecer as súas actualizacións en tempo real

2010-02-26T13:11:00.001+01:00

O buscador de Internet Yahoo! maila rede social Twitter, dúas aplicacións que van respectivamente á sombra de Google e Facebook na Rede, veñen de asinar un acordo de colaboración global polo que integran as actualizacións en tempo real dos máis de 600 millóns de usuarios que ten Twitter nos sitios de Yahoo!. Concretamente, esta alianza virtual permitirá que os internautas poidan ver e escribir tweets (mensaxes de 140 caracteres creados polos usuarios de Twitter) directamente nos sitios web de Yahoo!, así como publicar as súas propias mensaxes de Twitter sen sair do portal. Os responsables do buscador afirman que este acordo enmárcase dentro do obxectivo de Yahoo! de ser “o centro da vida online das persoas, e de ofrecerlles información relevante a nivel persoal de todas as fontes de Internet”, e únese ao asinado recentemente con Facebook, a outra gran rede social por excelencia. Estes acordos, segundo afirman os responsables de Yahoo!, transformarán ao buscador “nunha experiencia social persoalizable” que lle permite aos usuarios unificar a actividade de todas as súas experiencias sociais en Internet sen ter que ir abrindo unha e outra ferramenta. A compañía, asemade, planea mostrar procuras en tempo real de tweets ordeados por categorías como deportes, entretenemento e finanzas a finais deste ano, porén iso dependerá de como evolucione este novo servizo de dubidosa utilidade. Malia que Yahoo! non quixo comentar os termos financieiros do acordo asinado con Twitter, algunhas fontes aseguran que Microsoft e Google pagaron conxuntamente un total de 25 millóns polo dereito de incluir datos de Twitter nos seus resultados de procuras.

Fillos de Galicia ofrece a xestión e dirección dos seus proxectos na Rede

2010-02-26T13:10:00.001+01:00

A asociación responsable da principal rede social da emigración galega en Internet, Fillos de Galicia, unha comunidade virtual que ten como obxectivo manter e divulgar a galeguidade entre os descendentes da diáspora galega, vén de anunciar que ten intención de traspasar os seus proxectos na Rede a outras entidades ou particulares que poidan xestionalos e melloralos, entre eles o máis coñecido, Fillos.org.

A decisión foi tomada logo dun ano de interinidade na dirección desta asociación cultural, e logo de comprobar que malia os repetidos intentos de promocionar o proxecto Fillos.org, o portal máis coñecido da entidade, o número de usuarios que entraron para formar parte do grupo, non superou o 1 por cento.

Fillos.org, unha rede social con máis de 6.800 galegos e descendentes adscritos, foi creada en 1997 por Manuel Casal Lodeiro, un informático fillo de galegos emigrados a Biscaia, que posteriormente dou lugar á creación da asociación Fillos de Galicia para darlle soporte legal e “organizar un grupo de xente comprometida coa galeguidade que fose axudando a definir o proxecto”.

Agora, tras 13 anos de actividade na Rede, os responsables deste proxecto reclámanlle a algunha persoa ou entidade privada que se faga cargo da mesma xa que, segundo palabras do seu creador, “sen unha dirección eficaz é inútil”.

Casal Lodeiro afirma que prolongou a súa adicación ao proxecto “canto puiden” pero logo de varios anos advertindo que o proxecto dependía demasiado do seu compromiso persoal e da súa coordinación diaria, tivo que renunciar por motivos persoais a seguir nos postos directivos da asociación, algo que tamén anunciou o seu presidente un ano atrás.

A suma de “circunstancias persoais e económicas” levan agora á asociación a recoñecer que “non é quen de continuar cos proxectos”, e pídenlle a terceiras persoas que o intenten xa que “o noso público é importante e está aí, na Rede, agardando que alguén lle siga a fornecer cultura galega e contacto co país”.

É por isto que a asociación vén de publicar unha convocatoria aberta a toda a cidadanía, á procura dun relevo na xestión e dirección dos seus sitios web, tanto de Fillos.org, como de Galeguidade.net, eTIqueTAL.com, Debulla.info, Nome-Galegos.info e Planeta-Galego.info entre outros dominios.

Mais iso si, os responsables da iniciativa lembranlle ás persoas interesadas en dirixir o proxecto que Fillos.org “é xa o sétimo centro galego do mundo en número de usuarios”, máis non así en solvencia económica, claro está.

O Dalai Lama estrea conta en Twitter

2010-02-24T10:48:00.003+01:00

O microblogging está a converterse nunha moda que chega a case todos os ámbitos, e o último en sumarse á febre do Twitter non é outro que o Dalai Lama, que estrea conta verificada en tal plataforma, de xeito que garántese que estea actualizada polo propio Dalai Lama ou por xente da súa confianza, pois hai que lembrar que anteriormente existía un suplantador desta popular figura pública.

Polo momento a conta do Dalai Lama en Twitter emprégase para promocionar os contidos da páxina web oficial do Lama e das súas aparicións en medios de comunicación, de xeito que os interesados no seu día a día poden estar ben informados, e no momento de escribir estas liñas xa superou os 66.000 seguidores, aínda que dificilmente conseguirá o seguimento masivo doutros persoais, pois parece quedar claro que é un gabinete de comunicación o encargado de actualizar este espazo, de xeito que non é de agardar que haxa interacción cos seguidores, o que limita moito o atractivo de seguir a este líder relixioso a través da Internet.

Gadis lanza a web Bebegadis.com, con consellos de profesionais para as familias

2010-02-24T10:43:00.001+01:00

A cadea de supermercados Gadis, coñecida por levar o peculiar estilo de vida dos galegos alén das nosas fronteiras, así como por facer famoso o noso lema por excelencia: “malo será”, vén agora de estrear unha peculiar iniciativa, a acción Bebé Gadis, que consiste entre outras cousas en lanzar unha web con consellos de profesionais e información de interese para os pais novatos, nunha nova acción de apoio ás familias.

Gadis puxo en marcha este proxecto para as familias de Galicia e O Bierzo as cales, se teñen un fillo ou unha filla ao longo deste ano, recibirán unha canastiña con produtos de alimentación e de hixiene para o coidado do bebé e da nai, así como unha práctica bolsa, consolidando a súa filosofía de cercanía ao cliente nun momento tan especial.

A entidade galega lanza a web Bebegadis.com, con consellos e información de utilidade sobre o coidado dos bebés, un novo espazo en Internet que se caracteriza pola súa interactividade cun foro habilitado para os pais, e pola posibilidade de plantexar dúbidas e consultas a un profesional, o cal resolverá todas as cuestións relacionadas coas necesidades dos acabados de nacer.

As persoas que accedan a esta web, segundo veñen de informar dende a compañía, poderán participar no sorteo quincenal dun portabebés, sempre e cando se rexistren previamente.

A acción Bebé Gadis xa comezou e para recibir a canasta cos agasallos, é preciso entregar un formulario en calquera dos 172 supermercados Gadis de Galicia, Ponferrada, Astorga e Bembibre, adxuntado unha fotocopia do DNI e do libro de familia.

Unha web revela cando non estás na casa

2010-02-23T16:07:00.002+01:00

Please rob me' (en galego, por favor róubame) divulga todas as mensaxes dos usuarios de twitter que utilizan unha aplicación para móbiles chamada Foursquare.

Cargando Please Rob Me localiza a casa dun usuario que di estar fóra Please Rob Me localiza a casa dun usuario que di estar fóra

Foursquare permítelles aos usuarios dicir onde están nese momento, outorgándolles "medallas" no caso de que sexan os primeiros en "colonizar" un lugar determinado, por exemplo un restaurante. De seu isto podería resultar perigoso dado que se está revelando a dirección exacta de onde un se atopa.

Pero os creadores de Please Rob Me van máis aló e revelan a todo o mundo que usuarios están fóra da casa. Aínda que ese caso podería verse como extremo, non é estraño que moitas persoas divulguen en Facebook e demais redes sociais que saen de vacacións, ou que non van estar na casa todo o día.

Tampouco é raro atopar en Twitter diversos usuarios revelando a súa posición exacta. Na imaxe desta nota pode verse como un usuario revelou a dirección do seu domicilio en Nova York e como entón esa información é pública na internet, se non se toman as precaucións necesarios.

Os creadores da páxina aclararon que só tentan alertar os usuarios sobre como utilizan certos servizos da arañeira dixital e non facilitarlle o traballo aos ladróns.

Chantada inaugurará as catas por multivideoconferencia

2010-02-23T16:04:00.000+01:00

Media ducia de telecentros do país dispoñibilizarán unha cata guiada onde comprobar da calidade da colleita da Ribeira Sacra no último ano.

A vila de Chantada acolle a vindeira fin de semana do 13 e 14 de marzo a súa tradicional Feira do Viño, evento que como cada ano inaugura o calendario de citas enolóxicas da Ribeira Sacra.

E desta volta, a exaltación do viño bota man das novas tecnoloxías para unha orixinal iniciativa que coordinará o Centro Multimedia de Galicia (CMG): unha cata guiada que poderá seguirse a través dunha multivideoconferencia. Participan, ademais do CMG de Santiago, os telecentros de Monforte de Lemos, O Barco de Valdeorras, Catoira, Carballo, Tui e Oroso, ademais do propio local chantadino.

En cada un dos telecentros dispoñibilizarase todo o material preciso, desde os propios viños até as copas e cuspideiras. Desde o telecentro en Chantada, un enólogo coordinará o acto e dará paso a unha cata guiada. Haberá praza para 229 persoas, e as inscricións poden realizarse desde o luns 22 de febreiro a través da web do CMG.

Xornada sobre redes sociais na delegación coruñesa do ICOIIG

2010-02-19T10:56:00.000+01:00

A delegación coruñesa do Ilustre Colexio Oficial de Enxeñeiros Industriais de Galicia (ICOIIG) organiza para o vindeiro mércores, 24 de febreiro, de 18:00 a 21:00 horas, unha xornada sobre Márketing en Redes Sociais, impartida polo enxeñeiro industrial Alberto Lázaro Araújo, profesor na Escola de Negocios Caixanova, no local da delegación local sito na rúa Alameda nº 30, 7º andar. A inscrición para este relatorio é libre e de balde, debendo comunicarse con anterioridade por teléfono (981 225 826), fax (981 210 216) ou correo electrónico (cingalc@icoiig.es)

Con esta iniciativa preténdese que os empresarios coñezan os cambios tecnolóxicos e sociais que están a acontecer ao redor das redes sociais, entendan a oportunidade que representan para os negocios en xeral e servizos profesionais en particular, identifiquen as principais plataformas de redes sociais e dispoñan dunha metodoloxía para o deseño dunha estratexia de redes sociais.

A galega Buscadestinos.com promove a Rede participativa coa súa oferta de hoteis a 1 euro

2010-02-19T10:54:00.002+01:00

A páxina galega Buscadestinos.com, especializada en aforrarlles tempo e esforzos aos usuarios da Rede que anden procurando un lugar ao que desprazárense, vén de anunciar o lanzamento dunha interesante oferta dirixida a poñerlles as cousas aínda máis doadas (e máis baratas tamén) aos internautas, tanto aos que viaxan longas distancias como aos que non. Máis polo miúdo, trátase da promoción X1EURO, lanzamento que consiste en pór cada semana, ao alcance de 15 membros da comunidade en liña, unha noite de hotel polo prezo de 1 euro. A oferta vén con dúas peculiaridades. Primeira: a estancia levarase a cabo nun hotel da cidade na que reside o gañador. Segunda: á volta da estancia, os gañadores teñen que completar un comentario sobre o establecemento en cuestión e dos lugares que recomenda visitar da cidade, amais de pasarlle a Buscadestinos dúas fotos e un vídeo da experiencia.

A canle para elixir a quen se vai facer con esta promoción é a seguinte: a través dun concurso que se desenvolve cada luns (e os venres no caso de haber repesca) na páxina do servizo galego no Facebook. Segundo apuntan os responsables desta iniciativa, a resposta da xente está a ser moi boa, acadándose un amplo nivel de participación (sobre todo de internautas galegos) e de repercusión, sendo moitos os usuarios que logo dan conta da súa experiencia en cadanseu blog ou espazo de rede social (Twitter, Facebook, etc), favorecendo o “boca a boca”. Para facérmonos unha idea, a día de hoxe xa hai máis de 2.000 persoas inscritas na promoción.

“O mellor de todo isto”, sinala José Alcañiz dende Buscadestinos.com, “é que tamén beneficia aos usuarios da nosa web, que deste xeito contan con comentarios de máis calidade sobre os hoteis, ademais de valoracións de persoas que residen na cidade de destino, que sempre son valoradas”. Podemos consultar as bases da promoción nesta ligazón, e nesta outra algúns dos comentarios dos internautas gañadores.

Facebook xa non permite en España o acceso a menores de 14 anos

2010-02-19T10:53:00.001+01:00

A plataforma de redes sociais Facebook, atendendo ás esixencias das Axencia Española de Protección de Datos (AEPD) elevou de 13 a 14 anos a idade mínima para poder abrir unha conta no seu sistema no caso de usuarios españois, o que supón «un paso significativo na adecuación dunha empresa multinacional de Internet ás esixencias de lexislacións nacionais como a española en garantía da privacidade», segundo un comunicado da AEPD (descargable en formato PDF).

España é o primeiro país no que impiden o acceso a Facebook a menores de 14 anos, de xeito que no resto do mundo a barreira está establecida nos 13 anos, evitando que os máis cativos déanse de alta en plataformas deste tipo porque enténdese que non son quen de tomar decisións legais como a cesión de datos á que accédese ao darse de alta en certas páxinas web.

De todos os xeitos, polo momento non hai sistemas fiables para determinar a idade dos internautas, polo que os menores de 14 anos continuarán a poder finxir ser maiores para darse de alta en certas páxinas web, e unha das poucas solucións a este problema sería a normalización do DNIe, que si garantiría a idade do interlocutor a través da web, pero que só pode aplicarse a España e goza dunha aplicación reducida polo momento.

O CMG acolle un curso destinado a profesores a distancia da plataforma PLATEGA

2010-02-18T16:19:00.000+01:00

O Centro Multimedia de Galicia (CMG) que nas últimas semanas está a organizar diversos cursos de formación a distancia especializados en distintas temáticas, tales como cursos para instaladores de TDT vía satélite, cursos de iniciación a Internet, cursos de iniciación á informática... que aproveitan as vantaxes da videoconferencia para desenvolverse con éxito por toda a Comunidade, vén de anunciar a celebración, mañá venres día 19, dunha nova actividade de teleformación, desta volta dirixida a titores de actividades formativas a distancia na Plataforma de Teleformación de Galicia (PLATEGA).

Este curso está organizado pola Dirección Xeral de Educación, Formación Profesional e Innovación Educativa da Consellería de Educación e Ordenación Universitaria, a través do Servizo de Formación do Profesorado, e impartirase en horario de 18:00 a 20:30 horas na Sala Audiovisual Access Grid do CMG, en Santiago.

Ao igual que ocorre con outras actividades formativas, este modulo poderá ser seguido a través de videoconferencia desde os Telecentros de Comunicación de Lugo (Centro Social Lamas de Prado), Vigo (Edificio do Concello), Ourense (Delegación da Xunta), A Coruña (Biblioteca Pública Miguel González Garcés) e no da Facultade de Ciencias Sociais e da Comunicación de Pontevedra.

Estes cursos, que se volverán a celebrar os días 5 e 26 de marzo, teñen como obxectivo analizar a función titorial desenvolvida nas actividades de teleformación, coñecer recursos e posibilidades das mesmas e formular novos deseños e estratexias metodolóxicas que poidan ser empregadas por estes profesores nas actividades desenvolvidas no marco de PLATEGA.

A Plataforma de Teleformación de Galicia está orientada a aproveitar a facilidade de distribución de materiais formativos e as ferramentas de comunicación das redes informáticas para crear un contorno de ensino e aprendizaxe. Deste xeito, e mediante unha conexión á Internet, os usuarios poden realizar actividades interactivas, acceder aos materiais precisos para adquirir o coñecemento, recibir axuda, realizar comunicacións ou avaliar o seu progreso.

Esta iniciativa segue a liña das actividades do Centro Multimedia de Galicia que se realizan para contribuír na formación de profesionais e potenciar, deste xeito, o sector audiovisual e multimedia galegos.

Imaxes de Betanzos

2010-02-18T11:51:00.004+01:00

Un par de enlaces que me pasaron.

Unha usuaria de Flickr.

Un grupo tamén de Flickr.

Unha bitácora recolle todos os movementos e fichaxes das orquestras do país, así como as súas próximas actuacións.

2010-02-17T16:26:00.000+01:00

"Festa a festa... e sigo porque me presta" é o título dun blog que recolle todos os lercheos relacionados coas orquestras do país e, en xeral, co mundo das verbenas e dos espectáculos ao vivo. A bitácora, elaborada "de maneira altruísta por un afeccionado ás festas e verbenas galegas" dispón dun apartado multimedia e dun calendario de festexos.

Como exemplo das últimas novas, Festa a festa infórmanos da fichaxe sorpresa do cantante Jonathan Enrique pola orquestra Panamá, procedente da Versalles. Tamén podemos coñecer os próximos actos da Panorama, o mesmo día en Vilagarcía e en Compostela, e a nova imaxe do grupo Master, que estrea integrantes.

En definitiva, o blog pódese converter nun punto de encontro para toda a comunidade verbeneira, e ademais en galego.

YouKioske.com permite o acceso de balde a centos de publicacións impresas

2010-02-17T16:17:00.002+01:00

Cando dende DivX ofrecían a plataforma Stage6 para cargar vídeos na web utilizando o seu popular formato moitas foron as páxinas web que vampirizaban tal servizo para ofrecer contidos audiovisuais vulnerando os dereitos de autor, e esa mesma práctica trasládase agora ás publicacións impresas, de xeito que espazos coma YouKioske.com aproveitan a infraestrutura de Issuu para amosar publicacións en papel dun xeito atractivo a través dun reprodutor en Flash para achegar revistas, libros, comics e xornais escaneados de balde, á vez que inclúen numerosa publicidade no sistema.

Aínda que os contidos ofrecidos por YouKioske.com están dispoñibles en Issuu.com, a súa localización directa é bastante difícil, de xeito que este servizo facilita enormemente o acceso ás revistas e xornais que están actualmente no quiosco, sumando máis de 3.500 publicacións, o que podería provocar un importante dano ás industria editorial.

O servizo podería entenderse coma un «YouTube de revistas e xornais», por estar alimentado polos seus usuarios, aínda que neste caso destaca a ausencia absoluta de control do respecto aos dereitos de reprodución das obras difundidas.

Os blogs chegan á Universidade como ferramenta de ensino-aprendizaxe

2010-02-17T16:15:00.001+01:00

Un grupo de docentes da Universidade Rey Juan Carlos veñen de atoparlle a utilidade que merecen as novas tecnoloxías aplicadas ao ensino, e acaban de adoptar o blog como método habitual na súa docencia, unha ferramenta en liña que lle engade creatividade e orixinalidade aos días lectivos dos universitarios.

A novidade deste proxecto, no que a entidade académica é pioneira, radica en que non só lle permite aos estudantes facer entradas nunha determinada web, senón que os profesores e profesoras poden ter en conta, á hora de poñer a nota, as puntuacións que os compañeiros de clase se deron entre sí.

Uns 350 estudantes de media ducia de asignaturas xa levan catro anos participando nesta experiencia, que puxo en funcionamento o Departamento de Sistemas Telemáticos e Computación, para levalo a cabo en asignaturas de carácter non técnico.

O sistema, segundo explican os seus responsables, é moi doado: os estudantes dunha determinada asignatura teñen que crear un blog e sindicarse a un planeta, unha web na que as entradas que fan os estudantes nas súas propia bitácoras se van agregando por orde cronolóxico inverso, como se formasen parte dun único blog.

Pese a que os blogs xa se empregan de maneira moi frecuente noutras universidades, o que fai diferente a esta iniciativa é que lle permite aos estudantes puntuar e valorar as aportacións dos seus compañeiros nun único planeta, repartindo os puntos dos que dispoñen (que teñen un límite) entre as entradas que consideren mellores.
A principal vantaxe desta ferramenta radica en que os estudantes vense na obriga de crear os seus propios contidos e non ser meros consumidores do que lles colgan os seus profesores e isto permite que se impliquen máis no proceso de ensino-aprendizaxe.

Outra das vantaxes que sinala o profesor Gregorio Robles, un dos precursores da iniciativa, é que “como os alumnos son libres tamén para comentar dende un punto de vista persoal aspectos da asignatura, ao final consegues crear lazos entre eles baseados na materia e que se coñezan pese a estar en campus distintos”.

O departamento de Sistemas Telemáticos e Computación é moi activo no uso das novas tecnoloxías na metodoloxía docente. Case todas as materias que imparte en diferentes graos e masters están en Internet en aberto, o que supón que calquera pode descargarse os contidos (PDFs, vídeos, etc). Ademais do material do profesor, pódese consultar toda a actividade da clase en foros e chats.

Carballo, Ribadeo e Allariz, gañadores do Concurso Mayores con Inicativa Galicia 2009

2010-02-17T16:10:00.001+01:00

A Conselleira de Traballo e Benestar, Beatriz Mato, clausurou a entrega de premios ás mellores iniciativas galegas

Un proxecto que prentende recopilar e transmitir os beneficios das tradicionais herbas medicinais, un testimonio audiovisual de mulleres que narran lembranzas da súa vida desde unha prespectiva de xénero e un blog que recolle a historia dunha comarca a través das experiencias dos seus habitantes, son as tres iniciativas gañadoras do I Concurso 'Mayores cON Iniciativa' Galicia 2009.

O certame está organizado pola fundacion Fundetec para recollecer o esforzo dos axentes sociais que desenvolven iniciativas orixinais que fomentan a inclusión das persoas maiores na Sociedade da Información, así como, a predisposición dos maiores que se animan a participar nestas actividades coa ilusión de aprender algo novo e perder o medo ás Novas Tecnoloxías.

A Secretaría Xeral de Modernización e Innovación Tecnolóxica da Xunta de Galicia colabora de forma activa no proxecto, ao adherirse ao mesmo no marco da Estratexia Galega para a Sociedade da Información, co obxetivo de incentivar a participación no concurso nesta comunidade autónoma.

O resultado é que Galicia foi a segunda comunidade autónoma máis activa desta segunda convocatoria do certamen: das 88 candidaturas presentadas, 16 son galegas, e foron promidas a través da Rede de Centros de Dinamización da Sociedade da Información. En total, máis de 260 maiores galegos están adquirindo novas destrezas no uso de Internet e o ordenador gracias a estas accións.

A conselleira de Traballo e Benestar, Beatriz Mato, destacou durante a clausura do acto a importancia das Novas Tecnoloxías, que "multiplican á promoción das habilidades e, por suposto, á igualdade". Estas posibilidades, subliñou a titular de Benestar, son "especialmente relevantes" para as persoas maiores.

A tres mellores iniciativas de Galicia son:

* As herbas medicinais en Allariz: unha historia de recuperación e empoderamento feminina. do Concello de Allariz. Nesta iniciativa participaron 150 mulleres de entornos rurais que recuperaron os usos tradicionais das diferentes herbas medicinais da zona, realizando fotografías das mesmas, e colgando toda esta información nun blog. De este modo, estos coñecementos transmitiranse ás xeracións futuras a través das Novas Tecnoloxías.

* Memoria de Muller de Ribadeo. do CDSI de Ribadeo. O proxecto de Memoria de Muller desenvolveuse en diferentes centros de Dinamización co obxectivo de recuperar a memoria histórica da muller galega e transportar as súas lembranzas cara o futuro. No caso de Ribadeo, participaron cinco mulleres que gravaron cadanseu vídeo no que relatan aspectos persoais, sociais e culturais da súa vida, misturados con imaxes e música. Estes vídeos están accesibles na web de Memoria de Muller.

* Bergantiños: pasado e presente. do CDSI de Carballo. Mediante esta iniciativa un grupo de maiores, ten plasmado, nun blog, as súas vivencias, lembranzas e tradicións relacionadas coa súa terra, publicando os seus textos e as súas fotografías para poñelas a disposición de calquera persoa que queira coñecer mellor a historia da comarca de Bergantiños.

Ademáis de recibir como premio un trofeo tecnolóxico, estas tres iniciativas pasarán á final nacional, xunto coas mellores iniciativas do resto das comunidades autónomas participantes, e poderán optar ao Premio do II Concurso Nacional de Mayores con Iniciativa 2009, que se resolverá o 25 de febreiro en Madrid.

A UNED organiza en Viveiro un curso de e-learning 2.0

2010-02-03T16:05:00.001+01:00

O Concello de Viveiro, en colaboración coa Universidade a Distancia (UNED) en Lugo, vén de anunciar a celebración, o vindeiro 23 de febreiro, dunha xornada sobre Tecnoloxías da Información e da Comunicación de última xeración, E-learning 2.0, que impartirá o profesor Manuel Gromaz Campos na Aula Universitaria de Viveiro.
O curso, que ten como obxectivo propocionarlle ás persoas asistentes as destrezas e competencias necesarias para empregar entornos virtuais open source de última xeración dende un punto de vista didáctico, ten un custe de 5 euros e outorgaralle 1 crédito UNED de Libre Configuración e 0,5 créditos ECTS a tódolos asistentes.
A xornada consta de dúas sesións, unha primeira sesión presencial, de catro horas de duración e outra sesión virtual, de 21 horas, baseada na aprendizaxe a distancia e na interactividade virtual cos alumnos, é dicir, o que se coñece como metodoloxía Blended-learning.

Os alumnos e alumnas asistentes, que recibirán cadanseu diploma acreditativo, traballarán fundamentalmente con tecnoloxías de software libre de última xeración, tales como Webminars, LMS, ePorfolios, Redes Sociais, Entornos Virtuais 3D…
Os contidos que se van tratar na sesión teórica son, entre outros, unha introducción ao que é o e-learning e unhas nocións básicas sobre o que é o software comercial e o software libre.

Tamén se tratará o tema da e-learning na empresa e na administración para logo, no obradoiro virtual, aprender a crear, administrar e xestionar cursos virtuais a través de sistemas de xestión da aprendizaxe.

O temario tamén inclúe, nesta sesión virtual, o emprego de ferramentas de comunicación sincrónica (tutorías en liña), así como o emprego de ferramentas de comunicación asincrónica, como son os debates e o traballo en grupo.
Por último, as pesoas asistentes iniciaranse no deseño en liña de contidos.

Bota a andar a páxina web sobre o Plan de Ordenación do Litoral

2010-02-03T16:02:00.002+01:00

A Xunta de Galicia activa hoxe unha páxina web sobre o Plan de Ordenación do Litoral, publicación web que é unha das medidas potenciadas polo Goberno galego para cumprir co compromiso de máxima transparencia no deseño e definición deste proxecto de ordenación territorial. O Plan de Ordenación do Litoral ten por obxecto establecer os criterios, principios e normas xerais para a ordenación urbanística da zona litoral baseada en criterios de perdurabilidade e sustentabilidade, así como a normativa necesaria para garantir a conservación, protección e posta en valor das zonas costeiras.

Ademais, a Consellería de Medio Ambiente, Territorio e Infraestruturas está a habilitar unha oficina de información nas dependencias da Consellería en San Lázaro, na que a partires da vindeira semana estará dispoñible a totalidade da cartografía impresa do POL, a disposición dos concellos e dos cidadáns, así como un sistema avanzado de consultas de análise territorial e dous técnicos para solucionar dúbidas e recoller suxestións.

Por outra banda, dende a páxina web pódense descargar e consultar todos os contidos do Plan do Litoral para que os concellos e os cidadáns teñan acceso directo a información relativa ao plan do litoral, que actualmente está en fase de audiencia por parte dos concellos e das entidades e organismos relacionados coa ordenación do territorio. Este período de audiencia é un tempo no que se busca a participación das entidades locais para que formulen as dúbidas e propostas que consideren oportunas sobre os obxectivos que suscita o plan.

Os contidos que se poden consultar nesta páxina están relacionados coa metodoloxía empregada, a síntese territorial, a normativa do plan, pero sobre destaca toda a documentación gráfica, particularmente a cartografía territorial con todo o ámbito de xestión do plan e todas e cada unha das máis de 400 unidades de paisaxe nas que se dividiu a costa de Galicia.

Plan de Ordenación do Litoral

Dende o Goberno galego defínese o Plan de Ordenación do Litoral (POL) como o documento necesario e inaprazable para a constitución dun marco normativo estable que protexa de forma efectiva o litoral de Galicia. Sen dúbida, tamén é un instrumento de xestión que xorde dende o convencemento de que protexer no é só prohibir, senón que consiste en xestionar un territorio ordenando os seus usos e atendendo á súa configuración natural e antrópica así como a os seus procesos e dinámicas, no marco dun novo modelo territorial. Un terceira definición deste instrumento de ordenación pivota no feito de que é un proxecto que recoñece as singularidade e elementos identitarios da costa e a sociedade de Galicia.

Filosofía de goberno

A Xunta de Galicia asume como filosofía de goberno o principio de que o desenvolvemento da Comunidade autónoma debe fundamentarse nun crecemento harmónico cos valores do noso territorio. Nese sentido, o litoral de Galicia presenta un diverso número de paisaxes e oportunidades, que entre todos debemos poñer en valor.
Neste contexto, o Plan de Ordenación do Litoral xorde como un instrumento capaz de favorecer unha xestión integral do territorio, un instrumento eficaz para dirixir os usos do chan co obxectivo de avanzar cara a unha sociedade máis xusta e competitiva pero ao mesmo temo máis comprometida coa sustentabilidade e a paisaxe.

Unha fenda dixital divide a Galicia costeira da interior

2010-01-28T11:49:00.002+01:00

O Instituto Galego de Estadística vén de publicar os datos da Enquisa de condicións de vida das familias no ano 2008 e no tocante ás novas tecnoloxías, a sorpresa foi que unha fenda dixital divide o interior de Galicia das provincias costeiras. Segundo o IGE, o 33 por cento dos fogares contaba con conexión a Internet no ano 2008, pero a distribución por áreas era moi irregular e mentres no entorno de A Coruña era do 45,9 por cento, no sur de Ourense, era de tan só un 14,1 por cento. A distribución dos fogares con conexión a Internet no ano 2008, lonxe do que cabería agardar, está moi lonxe de ser uniforme, e a porcentaxe varía moito en función da área xeográfica na que nos atopemos. A principal causa de que os fogares galegos non teñan conexión a Internet, segundo apunta a enquisa son fundamentalmente que “non queren porque non lles parece interesante ou útil” nun 40,7 por cento dos casos, “os altos custes” no 27 por cento dos enquisados e a “falta de coñecementos” nun 20,1 por cento dos fogares. Cabe destacar que o uso da Rede por parte dos nenos e nenas de entre 5 e 14 anos supera xa o 50 por cento e tamén está moi extendido entre os mozos e mozas de entre 15 e 19 anos, que xa o empregan nun 89,9 por cento. Porén as porcentaxes de poboación que emprega Internet vai diminuíndo a medida que incrementamos a idade dos usuarios e deste xeito, a porcentaxe da poboación de 30 a 39 anos que usa a Rede no noso país baixa ata o 69,7 por cento, mentres que a de idades comprendidas entre os 40 e os 54 non chega nin ao 50 por cento. No tocante ao uso de teléfono móbil, no ano 2008, sete de cada dez cidadáns galegos de 5 ou máis anos empregárono algunha vez, unha cifra moi superior á rexistrada no ano 2002, que se situaba un pouco por enriba do 42 por cento.

Brión oferta cursos de formación en liña de balde

2010-01-28T11:47:00.000+01:00

O Concello de Brión, que este ano ofrece máis de trinta cursos de formación en liña, decidiu eliminar as cotas de inscrición dos mesmos para que tódolos veciños e veciñas do lugar, independentemente do seu nivel de ingresos, poideran acceder en igualdade de condicións á formación ofertada polo Goberno local.

Os cursos, aos que se accede a través da páxina web do Concello, inclúen dende o manexo de programas do entorno Office, tales como Excel, Word, Access ou Power Point, ata programas informáticos especializados en deseño, tales como Indesign, Photoshop, Dreamweaver... pasando polo uso de contas de correo electrónico e a procura de emprego na Rede.

Os máis creativos tamén poden aprender a crear o seu propio blog en Internet ou xestionar a súa propia conta nalgunha das redes sociais que se atopan hoxe en día na Rede. Ademais, os cursos inclúen algo de edición dixital (audio e vídeo) e programas máis especializados como o SIXPAC e Catastro, Contaplus ou Nominaplus, para as persoas máis aventaxadas no emprego das TIC e dos ordenadores.

O Concello de Brión, que segundo veñen de informar os seus membros, “é consciente da situación de crise económica que están a vivir as familias do municipio e da importancia que ten nestes tempos a formación”, decidíu que este ano todos os cursos de formación en liña que se impartan serán gratuitos para os veciños e veciñas de Brión. Así, calquera persoa poderá anotarse naqueles cursos que desexe a través da web oficial.

Unha vez inscritas, as persoas que desexen acceder aos cursos, terán reservadas as súas prazas na formación escollida, que comezará en canto se fixe un mínimo de 8 ou 10 persoas. Nese intre, o Concello de Brión enviará a cada alumno ou alumna unha mensaxe ao seu correo electrónico indicándolles o inicio do curso e as datas para a súa realización. Asemade, as persoas inscritas recibirán a ligazón para poder acceder ao temario do curso e ao sistema de seguemento e titorización, así como para poder realizar as probas pertinentes. Ao finalizar as clases, haberá unha proba que dará acceso a un diploma acreditativo dos coñecementos do alumno.

Facebook instálase en España

2010-01-28T11:46:00.001+01:00

Os oito millóns de usuarios que ten Facebook en España, levaron aos responsables da rede social con máis contas do mundo a abrir unha sede no noso país, que será liderada por Irene Cano, e dende a que se tratará de xestionar o papel das marcas locais na comunidade. A fin de poder chegar a tódolos anunciantes sen excepcións, Facebook España contará con tres áreas diferenciadas, unha para grandes marcas, unha segunda para pequenas e medianas empresas e unha última para particulares que queiran anunciarse na rede social máis importante do mundo. Segundo informan dende a compañía, “catro millóns de españois conéctanse a Facebook cada día e empregan unha media de 47 minutos en conversar cos seus amigos nesta comunidade”, é por isto que esta ferramenta virtual pode ser moi útil para os anunciantes do noso país, que poden respirar tranquilos xa que os responsables de marketing afirman non ter prezos pechados e que “cada aunciante establecerá ou seu tope”.

A Xunta está a deseñar un Plan estratéxico de acción para impulsar a implantación e a difusión do software libre na Comunidade

2010-01-28T11:45:00.000+01:00

A Xunta de Galicia está a traballar no deseño dun Plan de acción destinado a impulsar a implantación do software libre desde a Administración autonómica e a difundir e impulsar o seu uso entre o conxunto da cidadanía. Este proxecto está dirixido e xestionado pola Fundación para o Fomento da Calidade Industrial e o Desenvolvemento Tecnolóxico de Galicia, que centraliza todas as iniciativas públicas relacionadas co fomento e a promoción do software libre, de acordo coas estratexias marcadas pola Secretaría Xeral de Modernización e Innovación Tecnolóxica (SXMIT).

Este Plan de acción, cuxas directrices xa foron adiantadas as asociación do Sector TIC, nunha recente xuntanza de traballo, e que poden consultarse na web http:// imit.xunta.es, xurde do interese do Goberno galego por fomentar o software libre, dada a súa importancia para reducir a fenda dixital e para acadar un uso máis eficiente dos recursos públicos. Por ese motivo, a Secretaría Xeral de Modernización e Innovación Tecnolóxica decidiu apostar firmemente por procurar un aumento da eficacia das medidas que se están a executar para a difusión do software libre.

Ata este momento, foron varias as iniciativas postas en marcha desde a Administración galega para impulsar a implantación do software libre. Entre estas iniciativas figura mancomun.org, posta en marcha pola Fundación para o Fomento da Calidade Industrial e o Desenvolvemento Tecnolóxico de Galicia, pero que en ningún momento chegou a ter o rango de organismo ou de oficina, senón que se trata dun proxecto, que segue vixente.

As mencionadas accións a prol do software libre postas en marcha foron medidas illadas e carentes de coordinación e dunhas liñas estratéxicas que permitisen enmarcalas dentro dunha política xeral e global de promoción do software libre e garantisen a súa maior penetración entre a cidadanía, a Administración pública e o tecido empresarial.

Superar esas carencias é obxectivo das liñas de acción nas que traballa o Goberno galego, que buscará aumentar o retorno do investimento en software libre da Xunta de Galicia. O Plan de acción será cooperativo co resto das políticas e programas estratéxicos da Secretaría Xeral de Modernización e Innovación Tecnolóxica e transversal a todos os departamentos da Xunta.

A Fundación para o Fomento da Calidade Industrial e o Desenvolvemento Tecnolóxico de Galicia lanzou a contratación dun concurso público aberto co obxectivo de contar co apoio dunha oficina técnica que lle dea soporte na elaboración das iniciativas e na execución das actividades de difusión e promoción do software libre. Esta oficina técnica, tal e como se especifica nos pregos do concurso, prestará apoio técnico á Fundación na definición e execución das actividades e iniciativas de software libre, mentres que continuará a ser responsabilidade da Fundación a coordinación integral do proxecto en todas as súas facetas e a relación cos axentes implicados: universidade, Asociación de Empresas Galegas de Software Libre, Grupos Galegos de Usuarios de Software Libre, etc.

Ademais, dentro da Fundación para o Fomento da Calidade Industrial e o Desenvolvemento Tecnolóxico de Galicia traballan técnicos encargados especificamente da coordinación e execución das actuacións relacionadas co software libre, que reciben o apoio do resto do persoal especializado da propia entidade e coordinados co resto de iniciativas e proxectos encadrados nas políticas de desenvolvemento da Sociedade da Información da SXMIT.

Apple presenta oficialmente o seu iPad

2010-01-28T11:43:00.000+01:00

Pincha aquí.

As Redes Sociais xunto con outros catro obradoiros e unha charla serán serán os contidos formativos de febreiro no CDSI de Betanzos.

2010-01-25T12:13:00.003+01:00

A Rede de Dinamización da Sociedade da Información, en colaboración co Concello de Betanzos anuncia máis actividades de achegamento ás Novas Tecnoloxías que terán lugar no mes de febreiro en Betanzos. Os obradoiros que se van desenvolver e as datas nas que terán lugar son os seguintes:

“Alfabetización dixital: informática e internet” O usuario/a ao finalizar este obradoiro será capaz de manexar de forma básica un computador, así como, de acceder a Internet e utilizar algúns dos recursos básicos dispoñibles. Desenvolverase do 1 ao 4 e do 8 ao 10 de febreiro en horario de 10:30h. 12:30h.

“Presentacións: Impress”: O usuario/a, ao finalizar este obradoiro, será capaz de empregar OpenOffice Impress para crear unha presentación. Terá lugar do día 1 de febreiro ao 4 do mesmo mes de 18:00h a 20:00h.

“Procura de información en internet”: con este obradoiro os usuarios/as aprenderán a manexar correctamente o navegador Google e sacarlle todo o partido a esta ferramenta. Desenvolverase os días 8, 9 e 10 de febreiro de 18:00h. a 20:00h.

“Comunidades Sociais”: ao rematar este obradoiro, os usuarios/as coñecerán páxinas webs 2.0 para aproveitalas no seu beneficio persoal e/ou profesional. Este obradoiro, desenvolverase do 15, 17, 18 e 22 de febrerio de 18:00h. a 20:00h.

“Mecanografía”: o usuario/a será capaz, ao finalizar o obradoiro, de manexar o teclado e o rato con soltura. Terá lugar do 15, 17, 18, 22, 23 e 24 de febrerio en horario de 10:30h. a 12:30h.

Asemade, está prevista a realización dunha charla sobre as posibilidades da formación on-line que ofrece a Rede de Dinamización a través da súa páxina web. Esta charla levarase a cabo o venres 26 de febreiro a partires das 11:30h.

Recordar que para os obradoiros hai límite de prazas por riguroso orde de inscrición.

Sae oficialmente o Firefox 3.6

2010-01-25T12:11:00.000+01:00

Mozilla lanzou oficialmente unha nova versión, de xeito que xa podemos descargar o Firefox 3.6 de balde e incluso en galego, no que supón unha interesante mellora desta aplicación informática, especialmente no tocante a velocidade (que mellora aproximadamente un 20%) e estabilidade.

Entre as novidades está que agora acepta a reprodución nativa de vídeo en formato aberto (que pode verse a pantalla completa), renovación do seu motor de JavaScript, posibilidade de execución de scripts de xeito asíncrono (mellorando os tempos de carga), soporte de novos atributos CSS, soporte de novas especificacións DOM e HTML5 e un importante cambio no xeito de comportarse coas aplicacións de terceiros, que busca evitar colgues no navegador.

Os oficios tradicionais reviven na internet

2010-01-07T13:41:00.001+01:00

A Rede de Dinamización en Xunqueira de Ambía, Boborás e Moaña elabora vídeos sobre usos laborais do rural en perigo de extinción.

A Rede de Dinamización da Sociedade da Información segue a ofrecer nos seus centros actividades co obxectivo de recuperar e preservar a memoria. Unha desas experiencias é Memoria dos Oficios, que se desenvolve nos centros de Xunqueira de Ambía, Boborás e Moaña. A rede está a incorporar novos vídeos, que serven de xeito de almacenamento e divulgación para preservar usos laborais do rural que semellan esmorecer fronte aos usos urbanos.

Os vídeos son elaborados grazas ás lembranzas directas dos vellos ou doutros colectivos interesados na recuperación da memoria. Consisten en documentos audiovisuais en formato de videomontaxe. Ademais, tratan de aproveitar ese compromiso etnográfico para achegar internet ás franxas de idade con máis risco de exclusión dixital, ao tempo que se xeran contidos na nosa lingua.

En Xunqueira de Ambía trátanse temas como a minaría, o traballo da muller ou a motoniveladora, mentres que a esfolla, a gandaría, a matanza ou a vendima son os vídeos achegados por Boborás. En Moaña, as atadeiras, a carpintaría de ribeira ou os estaleiros son os oficios lembrados. Nos tres casos, as pezas complétanse cun vídeo onde se amosa todo o proceso de elaboración.

Enna, un novo centro multimedia aberto

2010-01-07T13:40:00.000+01:00

Transformar o ordenador nun centro de reprodución multimedia é posible grazas a distintas aplicacións informáticas e sistemas operativos, entre os que hai moitas opcións abertas, como Enna, un centro multimedia dos autores da distribución GNU/Linux GeeXboX, que facilita escoitar música, ver fotografías e reproducir películas e series de televisión dun xeito moi completo que vén de estrear a versión 0.4.0, que muda a súa licenza de BSD a LGPLv2.1 e que durante o mes de xaneiro estará dispoñible dentro dunha nova entrega de GeeXboX, de xeito que poderemos gozar dunha distribución de Linux que permite converter un PC nun Media Center de xeito rápido e doado.

Skype levará a videoconferencia en alta definición aos televisores

2010-01-07T13:38:00.001+01:00

O servizo de videoconferencias de Skype dá un importante salto evolutivo incorporando alta definición a 720 liñas en progresivo e incluso saltando do PC a televisores de LG e Panasonic, o que podería contribuír á popularización deste tipo de comunicación interpersoal.

Para poder facer videochamadas cunha resolución de 1.280 x 720 píxeles a 30 cadros por segundo é preciso que os usuarios conten con webcams de alta definición (en febreiro e marzo a tenda en liña de Skype incorporará un par de cámaras compatibles), un ordenador cun procesador de dobre núcleo a 1,8 GHz coma mínimo, o Skype 4.2 Beta para Windows e un acceso á Rede de banda larga.

Pero o máis rechamante é que os televisores VIERA CAST de Panasonic e os de LG que conten coa tecnoloxía NetCast Entertainment Access, que estarán á venda a mediados de 2010, poderán contar cunhas webcams especialmente deseñadas para eles que abriranlles a porta á videoconferencia de alta definición.

Cómpre destacar que dende Skype recomendan conexións de banda larga cunha velocidade simétrica de 1 Mbps para poder gozar de vídeo a 720p sen interrupcións.

O Centro de Dinamización de Betanzos presenta o seu programa para xaneiro

2009-12-30T16:12:00.001+01:00

A Rede de Dinamización da Sociedade da Información, en colaboración co Concello de Betanzos vén de anunciar máis actividades de achegamento ás Novas Tecnoloxías que terán lugar no mes de xaneiro na localidade coruñesa.

Os obradoiros que se van desenvolver e as datas nas que terán lugar son os seguintes:

- Mecanografía: o horario será de 18:00-20:00, os días 18, 19, 20, 21, 25, 26 e 27 de xaneiro.

- Iniciación ao procesador de textos Writer: os días 18, 19, 20 e 21 de xaneiro pola mañá en horario de 10:30-12:30 horas.

- Creación de contas de correo electrónico: terá lugar os días 4, 5, 7, 11 e 12 de xaneiro de 18:00-20:00.

- Alfabetización dixital: informática e internet: desenvolverase os días 4, 5, 7, 11, 12 e 13 de xaneiro de 10:30-12:30

Asemade, está prevista a realización de dúas charlas; a primeira levarase a cabo a partir das 11:30 do venres 8 de xaneiro e tratará sobre as posibilidades da formación en liña que ofrece a Rede de Dinamización e o día 22 de xaneiro a partir das 11:30 darase unha charla sobre o Google Earth e as súas posibilidades. Ambas as dúas teñen límite de prazas por “rigoroso” orde de inscrición.

Para inscribirse ou para solicitar máis información sobre estas e outras actividades organizadas polo Centro de Dinamización da Sociedade da Información de Betanzos, poden dirixirse ao enderezo: rúa Emilio Romay s/n, chamar ao teléfono 981 77 13 00 ou mandar un correo electrónico a rebeca.betanzos@dinamiza.fundacioncalidade.org

Twitter entra en beneficios por venderlles as súas mensaxes aos buscadores

2009-12-28T16:05:00.000+01:00

A rede social de mensaxes curtas obtén 17 millóns de euros a cambio de facilitarlles as súas mensaxes en tempo real a Google e a Microsoft.

A rede social Twitter xa se pode considerar rendíbel despois dos acordos asinados con Google e con Microsoft para que os seus contidos poidan aparecer nos dous principais buscadores da internet. En total, Twitter recibirá 25 millóns de dólares (uns 17 millóns de euros), dos que 15 proceden de Google e 10 de Microsoft.

Este diñeiro permitiralle á compañía con base en San Francisco rematar o exercicio 2009 cun lixeiro beneficio, despois de pagar uns custos operativos de entre 20 e 25 millóns de dólares. Twitter conta, segundo a súa propia web, con 105 persoas empregadas.

Dende o seu nacemento en 2006, a compañía reuniu 155 millóns de dólares en investimento privado. Porén, até este ano carecía de ingresos e, polo tanto, de beneficios. Os millóns de usuarios que se uniron ao servizo gratuíto de Twitter, que permite compartir mensaxes de até 140 caracteres, fixeron eses contidos moi gorentosos para os buscadores.

Tanto Google como Microsoft consideraban que os resultados das súas buscas estaban incompletos sen os millóns de mensaxes de Twitter, que se incorporarán en tempo real aos buscadores.

A Xunta promove a creación de proxectos tecnolóxicos relacionados co Xacobeo 2010

2009-12-28T16:03:00.000+01:00

Se ata o de agora a celebración do Ano Santo nos servía a todos os galegos e galegas para levar o nome do noso país por todo o mundo e para dar a coñecer a nosa cultura alén das nosas fronteiras, o Xacobeo 2010 vai ser, se cadra, un dos máis proveitosos para nós, os que ficaremos aquí despois da agardada oleada de visitas, posto que servirá para deseñar e desenvolver novos produtos e servizos tecnoloxicamente innovadores dos que sacar proveito unha vez rematado todo o axetreo.

Esta é a intención da Consellería de Economía e Industria: dar pe á creación de iniciativas tecnolóxicas relacionadas co Ano Santo coas que darlle soporte aos turistas, peregrinos e público en xeral que se achegan á nosa terra á procura de novas emocións e paraxes, unhas ferramentas tecnolóxicas que, pasado este ano, nos servirán a nós no noso día a día.

Para iso, esta entidade vén de resolver axudas por valor de un millón de euros para proxectos levados a cabo por 10 empresas galegas, unha convocatoria extraordinaria de axudas destinada a fomentar proxectos que, co Xacobeo como punto de partida, contribúan ao obxectivo a longo prazo de cimentar o crecemento socioeconómico de Galicia no desenvolvemento das súas capacidades científico-tecnolóxicas, en especial as promovidas polo tecido produtivo. Por este motivo, esta liña de axudas está enmarcada no Programa de Innovación Empresarial do Plan Galego de I+D+I.

As aplicacións baseadas en dispositivos móbiles para localización ou xeorreferenciación e as ferramentas baseadas na Internet participativa ou web 2.0, tales como as redes sociais, son o eixe dalgúns dos proxectos aprobados, que se valoraron positivamente polos servizos de alto valor engadido que ofrecían. Porén outros dos aspectos especialmente valorados á hora de conceder as axudas foi a innovación tecnolóxica relacionada coa creación de contidos e plataformas virtuais especificamente vinculados á promoción do Xacobeo 2010 e á posta en valor do patrimonio artístico, histórico e cultural.

Asemade, segundo se indica no DOG, contan con apoio económico os proxectos relacionados coas infraestruturas tecnolóxicas e ferramentas destinadas á creación, difusión ou mellora de servizos audiovisuais de interese para a promoción ou soporte das actividades do Xacobeo 2010; as actuacións que permitan mellorar as tecnoloxías de restauración, inventario e estudo dos elementos históricos, artísticos e culturais vinculados ao Ano Santo; e aqueles proxectos que, con base nas TIC, permitirán darlle pulo á innovación e á mellora da competitividade e da calidade da oferta turística relacionada co Xacobeo: a promoción dixital do sector, a mellora das relacións cos clientes, o incremento da oferta de servizos e a diferenciación...

O Centro de Novas Tecnoloxías recibe o novo ano formando ao empresariado galego

2009-12-28T16:02:00.000+01:00

O Centro de Novas Tecnoloxías de Galicia, dependente da Consellería de Traballo e Benestar, non quere deixar de traballar en prol das TIC no vindeiro ano 2010 e xa vén de anunciar que para o mes de xaneiro, durante os días 19, 20 e 21, vai dar acollida a un laboratorio práctico orientado a formar a profesionais en ferramentas que permitan incorporar á empresa solucións de seguridade corporativa.

O curso vai dirixido a persoal ocupado, dos sectores público e privado, e responsables técnicos dos sistemas de seguridade, que obterán un coñecemento amplo sobre os sistemas de solucións en “situacións de risco”.

En total, terá un máximo de 15 participantes, que se poderán inscribir ata o próximo 31 de decembro, e que recibirán cadanseu certificado emitido polo Centro.

A selección, segundo veñen de anunciar os responsables do curso, “realizarase priorizando as solicitudes dos responsables que proporcionen un servizo cun amplo número de usuarios e aplicacións, e responsables de entidade de tamaño medio ou grande”.

Este tipo de sistemas sobre os que se impartirá o curso, segundo informan dende o Centro de Novas Tecnoloxías, “son unha necesidade nas organizacións en que a súa dimensións ou capacidade de crecemento deben manexar un alto número de usuarios e servizos, e cando esta xestión de contas se complica debido ao número de usuarios, a frecuencia dos cambios e a gran cantidade de aplicacións corporativas”.

Por exemplo, este sistema da solucións a situacións “de risco” para a empresa como a existencia de contas non asociadas a identidades, existencia de varias contas por identidade ou datos distintos nos diferentes sistemas de seguridade, referíndonse, por exemplo, á mesma persoa.

Polo tanto, a xestión de identidades permite obter un coñecemento profundo e inmediato de que e quen ten acceso aos recursos da empresa, evitando así accesos non desexados e usos incorrectos e ofrecendo, ao mesmo tempo, un maior coñecemento dos usuarios aos que se lles poderá ofrecer unha información máis axeitada e segura.

A Xunta anuncia a fusión da Rede de Dinamización e da de Telecentros nun só organismo

2009-12-23T18:41:00.003+01:00

A Xunta de Galicia, segundo vén de anunciar hoxe mesmo Mar Pereira, a secretaria xeral de Modernización e Innovación Tecnolóxica, vai por en marcha unha nova Rede Integral de Centros para dinamizar o uso das Tecnoloxías da Información e a Comunicación no noso país, que fusione as antigas Rede de Dinamización e Rede de Telecentros, dous organismos que funcionaban co anterior Goberno e que tamén tiña como finalidade achegarlle as TIC á cidadanía con cadanseus recursos e maneiras de traballar.

Será unha rede que, segundo explicou, “garanta o uso racional dos recursos” e que, a través de profesionais e formadores especializados involucren á cidadanía na Sociedade da Información rachando coa fenda dixital existente nalgúns sectores e lugares.

Pereira, que interviu hoxe no Parlamento de Galicia, avanzou que en 2010 poranse en funcionamento os novos centros de Sarria, Ourense, O Barco de Valdeorras, Teo e Ribadavia, os dous últimos, engadiu, “inaguraranse o vindeiro mes”.

A secretaria de Modernización explicou que, “coa chegada do novo Goberno á Xunta existían dúas redes totalmente independentes e autónomas que sen embargo tiñan os mesmos obxectivos e estaban financiadas pola Xunta: a de telecentros, 56 aulas que dependían de Presidencia, e os da Rede de Dinamización, 60, da Consellería de Innovación e Industria”.

de forma eficiente e racional” a totalidade dos recursos dispoñibles. Neste sentido, Mar Pereira asegurou que, para o seu deseño, “foi necesario realizar un estudo en profundidade da situación de cada un dos centros e das duplicidades existentes, e analizar a demanda en cada localización”.

Esta nova Rede, segundo as verbas de Pereira, promoverá de forma “efectiva e real” o uso das TIC na poboación, e moi especialmente naqueles colectivos nos cales a fenda dixital é máis evidente, ademais de adicar unha especial atención ás pemes, micropemes e autónomos.

Asemade, a nova Rede, segundo engadiu Pereira, colaborará cos concellos galegos a través da FEGAMP, “para que acheguen o coñecemento da realidade local, o que permitirá cubrir 227 dos 315 concellos de Galicia”.

Por outra banda, Mar Pereira explicou que a Xunta enriquecerá a nova Rede co “apoio estreito e permanente” do Centro de Novas Tecnoloxías de Galicia, deste xeito, engadiu, “a Rede terá a capacidade de proporcionar servizos de alfabetización dixital da poboación e dos colectivos onde a fenda dixital é mais evidente como o caso de mulleres, maiores, desempregados, dispacitados ou inmigrantes”.

Pereira engadiu que a nova Rede ofertará servizos de alto nivel a profesionais, con formación moi especializada e un Sistema de Certificación de Competencias no uso das TIC que, segundo explicou, “acreditarán as capacidades dunha persoa no ámbito da Sociedade da Información”.

Mar Pereira avanzou, por último, que o novo modelo de Rede despregará unha carteira de servizos axeitada e con capacidade para achegarse a toda a poboación, unha carteira de actividades formativas, de difusión e de alfabetización dixital que se presentará en xaneiro e estará presente en 2010 en 94 concellos de Galicia.

Industria ofrecerá 200.000 lectores de DNIe nos centros comerciais de Carrefour

2009-12-23T18:40:00.000+01:00

O DNI electrónico está cada vez máis espallado entre a poboación español (chegando xa a máis de 13 millóns de cidadáns), pero o uso das súas prestacións avanzadas está limitado a un grupo moi reducido de usuarios, de aí que o Ministerio de Industria lanzase distintas iniciativas promocionais, entre as que está o reparto de lectores de DNIe de balde, que durante os últimos meses desenvolveuse a través da Internet en colaboración con distintos medios coma Código Cero, e que finalmente tamén terá unha contrapartida no mundo real, posto que dende hoxe mesmo distribuirán de balde máis de 200.000 packs que inclúen o mencionado lector e un CD co software necesario para o seu uso en máis de 70 establecementos de Carrefour.

Esta iniciativa está cofinanciado polo Fondo Europeo de Desenvolvemento Rexional (FEDER) e conta coa colaboración de empresas privadas coma Tractis, Jazztel, Acens e Caixa Galicia.

A Rede de Dinamización fai balance en Betanzos

2009-12-23T13:03:00.002+01:00

Durante este ano os obxectivos da RDSI para Betanzos foron os seguintes:

* Integrar os elementos tecnolóxicos na vida dos usuarios/as.
* Promover o uso da aula de informática do concello como lugar de encontro, traballoe ocio.
* Coñecer os aspectos máis básicos do ordenador.
* Manexar con soltura o paquete OpenOffice e o navegador Mozilla Firefox.
* Recoñecer as diferentes vantaxes que nos ofrece Internet como ferramenta para anosa vida diaria (correo electrónico, teleformación, compras on-line....)
* Acercase á Internet dun modo responsable coñecendo as súas posibilidades comoferramenta de traballo e de ocio.
* Descubrir o mundo das redes sociais e as súas posibilidades como novas formasde comunicación .

Un total de 200 novos usuarios, dos cales 75 eran homes e 125 mulleres achegaronse a aula este ano 2009.

Realizáronse un total de 35 obradoiros cun total de 245 participantes, máis mulleres que homes. Estes obradoiros representan 295 horas de formación gratuita.

A Dinamizadora quere dar as gracias a todos aqueles que confiaron na Rede de Dinamización como ferramenta de aprendizaxe e anima a todas as persoas que así o desexen a participar nos novos obradoiros que se levarán a cabo a partires de xaneiro do 2010.

O blogomillo non morreu, mudouse para as redes sociais

2009-12-23T12:49:00.001+01:00

Tres anos despois do anunciado pasamento, o número de bitácoras na nosa lingua segue a medrar e a comunidade coordínase arredor da web 2.0.

Dende que, xa hai máis de tres anos, Xabier Cid anunciase a morte do blogomillo, a comunidade internauta do país mudou, mais segue viva. Aquela estrutura creada arredor das bitácoras evolucionou, como evolucionou a rede en si, e as redes sociais van substituíndo ou, cando menos, complementando, os xa case clásicos blogs.

Naquel ano 2006 nacía Chuza, a web galega de novas escollidas mediante un control editorial non xerárquico. A partir dese momento, foise convertendo nun punto de encontro para o blogomillo ou, cando menos, para os internautas do país, aínda que non deixou de recibir queixas por sufrir un certo grao de endogamia que, lonxe de diminuír co paso do tempo, foi aumentando. Este ano 2009 superou as 21 mil novas publicadas, fronte ás 18.500 de 2008 e as 16.200 de 2007. Porén, a porcentaxe de informacións enviadas polo grupo de usuarios máis activo -que foi variando co tempo- é cada vez maior. Cada ano fóronse sumando a Chuza aproximadamente unha cifra constante de persoas usuarias, arredor de 1.400.

A suposta "morte do blogomillo" tampouco é tal, se temos en conta as estatísticas da 'araña' de Blogaliza. No seu último percorrido pola rede atopou 144 novos blogs, que elevan a listaxe do blogomillo até as 8.704 bitácoras. Tamén gozan de boa saúde no que se refire ás actualizacións, con máis de 160 blogs actualizados no último día e case mil na última semana. Pola contra, 5.774 levan máis de seis meses sen actualizar, o que deixaría a cifra de blogs activos en algo menos de tres mil.

Parece evidente que, coa incorporación de cada vez máis poboación á "era dixital", tamén medrará o número de blogs. Porén, nos últimos tempos, novas fórmulas de participación na rede están a compartir espazo coas bitácoras. Por unha banda, as redes sociais están a servir en moitos casos como porta de entrada aos blogs, ou mesmo chegan a substituír a súa función. As que teñen máis uso no país son Facebook, con interface en galego dende xa hai tempo; de Tuenti, na nosa lingua dende hai só unhas semanas, e mais a rede social autóctona, Cabozo. As facilidades que ofrecen para compartir textos, imaxes ou vídeos á nosa rede de contactos instantaneamente superan as que ofrecen os blogs e o seu sistema de comentarios.

O mesmo acontece cos mini e microblogs, representados por plataformas como Tumblr ou Twitter, e a súa versión galega, Lareta, que permiten publicar todo tipo de contidos dun xeito sinxelo e inmediato. Por unha banda, Tumblr acabouse por converter nunha sorte de bitácora breve e rápida, coa posibilidade de publicar entradas de texto, vídeo, audio ou fotografías e redifundilas dun xeito sinxelo.

A nivel microblogs, ademais de existir a nosa Lareta, o internacional Twitter ten o galego entre as 20 linguas máis empregadas, segundo un estudo, o que demostraría que existe unha comunidade de usuarios moi activos en Galiza que contan a diario as súas experiencias e achados mediante breves mensaxes de texto. Con todo, os novos medios non van matar os blogs, ou cando menos non o blogomillo, pois son só un medio máis de expresión da blogosfera do país.

Unha empresa galega de deseño web recibe o recoñecemento da UE

2009-12-23T12:43:00.001+01:00

A galega Factoría Eurodigital, unha empresa con sede en Pontevedra con máis de dez anos de experiencia no campo do deseño e do desenvolvemento de produtos audiovisuais en liña, vén de recibir un importante recoñecemento ao seu labor por parte da Unión Europea, que logo dunha década facendo reais os proxectos de outras empresas, chega nun momento de auxe para esta entidade.

A firma, á que lle debemos a creación de portais tan interesantes como www.descubregalicia.com e www.virtualplanet360.com, foi distinguida pola Unión Europea de entre máis de 1.500 proxectos pola súa faceta innovadora e creativa, dúas características que definen á perfección as ferramentas creadas polos seus deseñadores.

Esta distinción aínda adquire máis relevancia se temos en conta que 2009 foi declarado Ano Europeo da Creatividade e Innovación e que xunto a Factoría Eurodixital unicamente outras 16 empresas españolas foron recoñecidas no marco dun programa destinado precisamente ao fomento de iniciativas innovadoras e creativas.
Un grupo de expertos independentes responsables do desenvolvemento dos programas da Comisión Europea no ámbito da innovación foron os encargados de seleccionar as propostas que máis se axeitaban ao programa marco, entre os que saíu escollida a iniciativa galega.

Para José Manuel García Fernández, director de Factoría Eurodixital, este recoñecemento por parte da Unión Europea representa o “colofón a unha traxectoria que se iniciou fai agora 10 anos, cando un grupo de mozos entusiastas das novas tecnoloxías puxeron en marcha este proxecto con máis vontade que medios”.

A Xunta evitará duplicidades e porá en marcha un modelo territorial único de recursos para a sociedade da información

2009-12-23T12:41:00.001+01:00

O obxectivo é poñer a traballar en sintonía a todos os telecentros de Galicia, cunha planificación conxunta e optimizando recursos

O Goberno galego buscará o consenso coa Fegamp e os concellos para deseñar un financiamento que garanta a sostenibilidade no tempo do proxecto

O conselleiro de Presidencia, Administracións Públicas e Xustiza, Alfonso Rueda, avanzou hoxe no Parlamento que o Goberno galego integrará nunha soa rede as diferentes redes de telecentros existentes, de tal xeito que por primeira vez Galicia terá un modelo territorial único de recursos para a sociedade de información.

En resposta a unha interpelación parlamentaria, o conselleiro recordou que ata agora coexistían a Rede de Dinamización da Sociedade da Información –dependente da anterior Consellería de Innovación e Industria- e a Rede de Telecentros de Comunicación da Xunta –da Dirección Xeral de Comunicación Audiovisual-, o que producía duplicidades e ineficiencias, xa que non había nin planificación conxunta, nin traballo compartido nin coordinación algunha.

Fronte a iso, Alfonso Rueda destacou que a Xunta daralle continuidade á Rede de Dinamización da Sociedade da Información cun proxecto global que unifique, baixo unha mesma marca e un mesmo modelo de xestión, ao conxunto de centros destas características existentes a día de hoxe en Galicia.

Unha auténtica rede de redes que permitirá integrar aos axentes implicados cunha estratexia definida e optimizar recursos, a partir dunha planificación e xestión unificadas. Na primeira fase deste proxecto contémplase o funcionamento conxunto dos centros existentes de titularidade da Xunta, un obxectivo que conta con máis de dous millóns de euros nos orzamentos autonómicos para o vindeiro ano 2010.

Coordinación coa Fegamp
En paralelo, e segundo anunciou o conselleiro, establecerase unha coordinación cos concellos e a Federación Galega de Municipios e Provincias (Fegamp), para abrir a rede aos municipios e conseguir un despregue racional do sistema. Tamén coa Fegamp se traballa para artellar un esquema de financiamento consensuado cos concellos, para o sostemento do persoal en todos os centros da rede e con vocación de continuidade, xa que ata agora estes traballadores non tiñan estabilidade laboral.

O obxectivo do proxecto, que capitaliza a Secretaría Xeral de Modernización e Innovación Tecnolóxica, é poñer a traballar en sintonía todos os telecentros que existen en Galicia -329 entre as distintas redes-, planificando un modelo de rede único que funcione baixo as premisas da eficiencia e a austeridade, coa idea de xerar valor engadido na aposta polo coñecemento e sobre a base da colaboración entre todos os axentes, institucións e administracións.

Nese sentido, o deseño do modelo garantirá o exercicio dun liderado transversal do Goberno galego no impulso dun modelo de colaboración estable coas entidades locais. Ademais, permitirá definir unha carteira de servizos, actividades e recursos para toda a rede, buscando a súa especialización e complementariedade. Así mesmo, facilitará a integración na rede de novos recursos de valor engadido sobre os xa existentes.

O Goberno español destina 8,7 millóns de euros a promover o acceso das mulleres á Sociedade da Información

2009-12-23T12:39:00.002+01:00

O Plan de Acción para a Igualdade entre Mulleres e Homes na Sociedade da Información destinará máis de 8,7 millóns de euros até 2011 a fin de reducir a fenda de xénero no acceso ás novas tecnoloxías, estimada actualmente en dez puntos porcentuais.

O plan, proposto polos Ministerios de Igualdade, de Industria, Comercio e Turismo, e de Educación, persegue "incidir directamente na participación máis equilibrada de mulleres e homes na utilización das novas teconologías e ferramentas de comunicación" e evitar así unha "nova fenda dixital".

Para iso, o Plan articulará "recursos de formación, información e acceso ás novas tecnoloxías" para "aumentar o acceso das mulleres a estas ferramentas e estimular o seu protagonismo nos sectores tecnolóxicos da información e a comunicación" cun orzamento total de 8.712.000 euros.

En concreto, o Ministerio de Industria, Comercio e Turismo achegará seis millóns; o de Igualdade, 1,9 millóns e o de Educación, 744.000 euros. A execución, seguimento e avaliación do mesmo será responsabilidade do Ministerio de Igualdade, que anualmente valorará a idoneidade e cumprimento do Plan, segundo informou o Consello de Ministros.

Os fondos empregaranse en campañas de aprendizaxe dixital adaptadas a mulleres afastadas dos usos do TIC; reforzo da oferta formativa a colectivos femininos en situación de vulnerabilidade; apoio financeiro ao desenvolvemento de espazos web que visibilicen as achegas das mulleres en todos os campos do coñecemento e ao desenvolvemento de software libre de estereotipos de xénero que sensibilice e promova valores de igualdade, entre outras medidas.

Ademais, porase en marcha un observatorio permanente de estudo e avaliación sobre a presenza, usos, necesidades e demandas de homes e mulleres na Sociedade da Información.

A posible regulación de Internet provoca unha polémica en EE.UU.

2009-12-23T12:39:00.001+01:00

As novas medidas do Goberno

O "spam" crecerá no ano 2010

2009-12-17T17:13:00.001+01:00

As predicións sobre a evolución do spam para 2009 non se cumpriron e lonxe de decrecer, este tipo de ataques incrementáronse notablemente. A brecha dixital é a principal explicación pois pon nunha situación máis vulnerable a aqueles usuarios con menos experiencia na Rede e nas súas trampas, informa Revista de Internet.

Spamfighter recompilou un conxunto de ameazas que cobrarán protagonismo o vindeiro ano, co fin de advertir aos usuarios da importancia de estar alerta ante posibles fraudes. Martin Thorborg, cofundador de SPAMfighter, explica ademais que " o 2010 será peor xa que os spammers están constantemente desenvolvendo novos métodos".

Entre as principais ameazas identificadas estarían o timo nixeriano ou phishing. Uns ataques cada vez máis sofisticados grazas ao envío de correos personalizados que se aproveitan dos hábitos dos consumidores en Internet (bancos que se visita, ou artigos nos que está interesado). As estafas relacionadas con mensaxes de redes sociais tamén serán máis frecuentes en 2010.

A estas prácticas sumaríase o bombardeo publicitario a través do móbil. Este continuará, xa que a protección non é tan boa como nun computador e con todo son dispositivos cada vez máis usados para conectarse. Os avisos falsos sobre Windows 7 tamén serán aproveitados polos spammers. Hai que ter especial coidado cos posibles corres electrónicos fraudulentos pois os tradutores en rede son cada vez mellores e os erros menos frecuentes, aínda que sempre haxa algún e sexan estes os indicativos máis frecuentes de que o que se está lendo é unha mensaxe falsa. A compañía de seguridade tamén alerta de enlaces a dominios perigosos pola súa similitude cos máis coñecidos, esta práctica incrementarse sobre todo nas mensaxes escritas en chinés.

Os galegos utilizan cada vez máis internet para pedir cita co seu médico de atención primaria

2009-12-17T17:11:00.001+01:00

Un total de 1.573.421 citas médicas foron tramitadas a través da páxina web do Servizo Galego de Saúde (www.sergas.es) durante os once primeiros meses deste ano (xaneiro a novembro incluídos).

Cada día son máis os cidadáns galegos que solicitan unha cita co seu médico de Atención Primaria a través desta ferramenta informática e, de feito, as citas xestionadas polo departamento que dirixe Pilar Farjas Abadía aumentaron en máis de 500.000, comparando co mesmo período do ano anterior, ao pasar das 1.065.180 dos once primeiros meses de 2008 ás 1.573.421 anteriormente sinaladas.

Segundo as áreas sanitarias, dende a de Vigo se realizaron máis de 388.000 solicitudes nestes primeiros once meses, seguida da de Coruña con máis de 269.000. A continuación situouse Santiago, con preto de 246.000; Pontevedra, con máis de 213.000; Ourense, con preto de 175.000; Lugo, con máis de 168.000; e Ferrol, con máis de 113.000.

No que atinxe aos meses do presente ano, o de novembro é no que máis citas se pediron a través da web, concretamente as peticións superaron as 162.000; seguido de outubro con máis de 157.000; marzo, con máis de 152.000; abril, con preto de 149.000; e xuño, con máis de 145.000. O meses nos que menos citas se pediron foron agosto, con máis de 115.000, e febreiro, con preto de 132.000.

Galicia, pioneira no conxunto do Estado
A petición de cita previa médica para acudir ao centro de saúde iniciouse en novembro de 2001. Con esta iniciativa, pioneira en España, a Consellería de Sanidade perseguía o obxectivo de facilitar aos cidadáns as interacción e relacións coa Administración sanitaria.

Dende o seu inicio, o Servizo Galego de Saúde garantiu que todas as transacións efectuadas mediante este procedemento nas que interveñen datos de carácter persoal son feitas coas máximas garantías de seguridade.

Para realizar a solicitude de cita previa a través de Internet, os cidadáns deben entrar na páxina web do Servizo Galego de Saúde (www.sergas.es) e dirixirse ao apartado de Cita de Atención Primaria, onde o paciente debe introducir os datos da súa tarxeta sanitaria e seleccionar as modalidades de cita que desexe. Tamén existe a posibilidade de consultar citas pendentes, así como anular ou cambiar calquera delas.

Ademais, a través da páxina www.sergas.es ofrécese un amplo catálogo de servizos, entre os que se inclúe a petición de cita previa, pero tamén outros como cambiar de médico, ou realizar trámites de tarxeta sanitaria. Tamén se pode coñecer o abano de facultativos dispoñibles e os lugares e horarios de consulta de cada un dos centros de saúde.

Política Lingüística confirma que Windows 7 estará en galego

2009-12-17T17:08:00.000+01:00

O lanzamento da versión en galego non ten aínda data, pero será nun prazo máis breve do que tivo a versión na nosa lingua do Vista.

Windows 7 estará en galego dentro duns meses, segundo confirmou a Secretaría Xeral de Política Lingüística. O lanzamento do sistema operativo de Microsoft na nosa lingua chegará ao mesmo tempo cá versión en éuscaro, como acontecera co Windows Vista.

A versión en catalán de Windows 7 presentouse este martes, confirmando a especial atención que ten Microsoft cara ao mercado catalanfalante, pois dispón mesmo dunha web .cat nesa lingua. Ademais de Windows, atópanse en catalán o Microsoft Office -paquete ofimático-, o Windows Mobile -sistema operativo para móbiles-, o Internet Explorer -navegador- ou a plataforma de servizos web Windows Live.

Política Lingüística confirmou que xa se está a traballar no desenvolvemento da versión galega de Windows 7, polo que Microsoft continuará a liña marcada nas anteriores versións do sistema operativo, con Imaxin como socio tecnolóxico e co apoio terminolóxico do Termigal. Segundo explicaron dende a secretaría xeral, o lanzamento non será inmediato nin ten unha data exacta, por ser preciso facer unha revisión do vocabulario, aínda que se reducirán considerabelmente os tempos con respecto ao Windows Vista, por xa existir un traballo previo feito.

En marcha o proxecto PARNET-TIC para fomentar a sociedade da información no medio rural

2009-12-14T12:59:00.001+01:00

A Deputación da Coruña lidera o proxecto Parnet-TIC, destinado ao fomento da sociedade de información nos territorios rurais, en colaboración coa Deputación e o Concello de Lugo, ademais doutras institucións de Francia e Portugal.

Este proxecto desenvolverase a partir das xornadas que se celebrarán na cidade de Lugo os próximos días 15, 16 e 17 de decembro. Nestas xornadas analizaranse as accións a desenvolver a través do programa Parnet-TIC, que ten como obxectivo o impulso das TIC nos territorios rurais.

A Parnet-TIC configúrase como unha rede de participación e servizos dixitais en territorios rurais. No proxecto colaboran 8 administracións territoriais de España, Francia e Portugal que comparten unha situación xeográfica e demográfica similar. Así, integran o proxecto a Deputación Provincial da Coruña, a Deputación Provincial de Lugo a través do INLUDES, a Deputación Provincial de Huesca, a de Almería, o Concello de Lugo, a Cámara Municipal de Agueda (Portugal), o municipio Ville de Pau (Francia) e a Pole Universitarie Europèen de Monpellier (Francia).

O proxecto vai ter unha duración total de 2 anos e conta cun orzamento de 1.888.321 euros, cos que se desenvolverán utilidades e servizos destinados á cidadanía do medio rural, para contribuír ao desenvolvemento equilibrado do territorio.

Este proxecto está integrado no programa de cooperación territorial Espazo Sudoeste 2007-2013 da UE que pretende consolidar o sudoeste europeo como un espazo de cooperación territorial nos ámbitos da competitividade, a innovación, o medio ambiente, o desenvolvemento sostible e a ordenación espacial.

O proxecto conta con tres eixos básicos:

1. Deseño dunha rede de participación e servizos dixitais en territorios rurais

2. Servizos dixitais para a cidadanía

3. Plataforma para a participación cidadá

Este grupo de tarefas constitúe a primeira fase de execución do proxecto que ten como obxectivo o deseño do plan para a creación dunha rede transnacional de participación e servizos dixitais en territorios rurais. Neste grupo de tarefas implantaranse nos distintos territorios participantes as propostas do plan relativas a servizos dixitais de e-administración. O outro piar do proxecto é o fomento e mellora da participación cidadá nos gobernos locais (e-democracia) por medio da creación dunha plataforma transnacional de Participación Cidadá.

Xa está en liña o dicionario galego das TIC

2009-12-14T12:58:00.002+01:00

O Dicionario Galego das Tecnoloxías da Información, digaTIC, desenvolvido dende a Asociación de Enxeñeiros de Telecomunicacións de Galicia co financiamento da Consellaría de Innovación e Industria da Xunta de Galicia, xa está dispoñible a través da web, de xeito que facilita á comunidade tecnolóxica a consulta dun amplo léxico técnico en galego que facilite a utilización e a propagación da nosa lingua nese ámbito, aglutinando un traballo conxunto de tecnólogos das TIC, deseñadores de aplicacións, docentes, lexicógrafos… que dende novembro de 2008 colaboran na procura dun conxunto de termos de proveito para todas as áreas técnicas do coñecemento.

Esta versión dixital conta con 4.000 termos e vai presentarse oficialmente o vindeiro día 15 no Hotel Porta do Camiño de Santiago de Compostela.

Filtran o contrasinal de máis de 3.800 contas de Tuenti

2009-12-14T12:57:00.001+01:00

Advirten de que máis de 3.800 contas de usuarios activos de Tuenti veñen de seren filtradas xunto co seu contrasinal, no que parece ser un caso de phishing que lembra á recente publicación de milleiros de contas de correo de Hotmail (filtradas por mor de que contaban cun contrasinal no feble).

Dende Tuenti están a reaccionar á situación conxelando as contas afectadas (remitindo información por e-mail de cómo proceder para a súa reactivación cun novo contrasinal), pero habería que lembrar aos usuarios vítimas da filtración que cambien os contrasinais do seu correo electrónico e doutros servizos web no caso de que coincidisen cos que empregaban en Tuenti.

Ícaro Moyano, director de comunicación de Tuenti, asegura que en menos de hora e media lograron protexer as contas afectadas e dar de baixa as páxinas web fraudulentas que suplantaban a Tuenti para captar os datos de acceso dos seus usuarios.

Obradoiro sobre Xestión de Identidades e Control de Accesos [CNTG, 19, 20 e 21 de xaneiro de 2009]

2009-12-14T12:55:00.002+01:00

Prazo de inscrición: até o 31 de nadal de 2009

Data e lugar de celebración: os días 19, 20 e 21 de xaneiro nas instalacións do Centro de Novas Tecnoloxías de Galicia en Santiago de Compostela.

Organiza: Consellería de Traballo e Benestar da Xunta de Galicia coa colaboración de Oracle.

Os laboratorios son gratuítos e están dirixidos a profesionais ocupados dos sectores privado e público con responsabilidades de xestión ou administración de numerosos usuarios ou aplicacións, responsables, en todo caso, de entidades de tamaño medio ou grande.

Contidos:

- Xestión de numerosos usuarios e/ou clientes a nivel de fornecedor de servizo ou Micro informática: Aprovisionamento de usuarios (altas, baixas, cambios de departamento,...), administración delegada, etc.

- Xestión dun amplo número de aplicacións ou políticas de seguridade: centralización de políticas de seguridade, Single Sign On, etc.

Máis información: folleto informativo

Inscricións: até o 31 de decembro na web do CNTG

Galicia é a sexta comunidade autónoma con maior gasto en innovación tecnolóxica

2009-12-14T12:55:00.001+01:00

O Instituto Nacional de Estatística (INE) vén de presentar os resultados da Enquisa sobre Innovación nas Empresas 2008. Segundo este estudo, o gasto en actividades para a innovación tecnolóxica correspondente ao conxunto de empresas españolas ascendeu a 19.919 millóns de euros no ano 2008, o que supón un incremento do 10,1% respecto ao ano 2007. Isto representa o 1,9% da cifra de negocios das empresas con actividades para a innovación tecnolóxica correspondente ao ano 2008.

Entre as actividades innovadoras destacaron as de I+D, interna ou externa (que representaron o 53,2% do total do gasto en actividades para a innovación tecnolóxica) e a adquisición de maquinaria, equipo e software para innovación tecnolóxica (que supuxo o 31,1%).

O 34,8% das empresas españolas foron innovadoras no período 2006-2008, incluídas innovacións tecnolóxicas (de produto ou proceso) e non tecnolóxicas (organizativas ou de comercialización).

O 20,8% das empresas españolas foron innovadoras de produto ou proceso no período 2006-2008. Esta porcentaxe elévase ao 23,6% si adicionalmente considéranse as empresas con innovacións tecnolóxicas en curso ou non exitosas. A innovación de produto no período 2006-2008 representou o 12,7% das vendas de todas as empresas. Esta porcentaxe redúcese ao 5,7% en caso de considerar os produtos exclusivamente novos para o mercado.

Pola súa banda, a cifra de negocios debida a produtos sen alterar ou lixeiramente modificados significou o 87,3% do total.

Resultados por comunidades autónomas

En Galicia, o gasto en actividades para a innovación tecnolóxica ascendeu a 1.003 millóns de euros, o que representa o 5% sobre o total de gastos e sitúa ás empresas galegas na sexta posición no ranking de comunidades con maior porcentaxe de gasto en innovación tecnolóxica. As comunidades autónomas que tiveron maiores gastos en innovación tecnolóxica no ano 2008 foron a Comunidade de Madrid (38,5% sobre o total de gastos), Cataluña (19,0%) e País Vasco (9,0%).

Pola súa banda, as que presentaron os maiores crecementos respecto de 2007 foron Estremadura (48,1%), Comunidade de Madrid (32,8%) e Aragón (17,9%). A taxa de crecemento experimentada polas empresas galegas foi do 3,8%.

Presentado por videoconferencia un titorial para protexer á nenez na Rede

2009-11-30T11:21:00.000+01:00

A Secretaría Xeral de Medios da Xunta vén de presentar unha nova ferramenta dixirida a fomentar unha Rede segura para a nenez. Máis polo miúdo, trátase do titorial A protección dos menores no acceso aos medios de comunicación, e, como o seu propio nome indica, pon en xogo unha serie de recursos para que os nosos cativos saiban identificar de xeito doado de que maneira se poden dar riscos ou ameazas no acceso ás canles da información. O manual, que foi dado a coñecer no Centro Multimedia de Galicia de Santiago e, a través de videoconferencia, en telecentros da nosa xeografía (Vilagarcía, A Cañiza, Oroso, O Barco, Lugo e Betanzos), ficará dispoñible para todas e todos os interesados nos diferentes espazos de conexión que a Rede de Telecentros da Secretaría Xeral ten espallados por toda a nosa terra.

Sobre a súa feitura, dicir que o titorial foi desenvolvido en Flash, e, como tódolos outros recursos semellantes que puxo en xogo a campaña Comunícate da Secretaría, está pensado para formar e informar a un público con escasos coñecementos informáticos.

Nace un xornal gratuíto baseado exclusivamente en blogs

2009-11-30T11:20:00.000+01:00

The Blogpaper carece de editor: os contidos escóllenos os propios internautas mediante votación na web.

Este venres comezouse a distribuír en Londres un xornal gratuíto que aspira a revolucionar a prensa en papel. The Blogpaper baseáse en temas tirados exclusivamente de blogs. Polo momento distribúese en catro estacións de metro da cidade, ademais de en Stratford. Os contidos son decididos polo voto popular a través da web do xornal.

O novo medio aspira a combinar "dous tipos de medios diferentes aínda que igual de importantes: internet e a prensa", segundo informa na súa web. Fundado por Anton Waldburg e Karl Jo Seilern, preténdese que se financie mediante publicidade, pois non pagarán os blogueiros polo seu traballo.

Mentres moitas publicacións en papel están a darlle cada vez máis importancia á versión online, The Blogpaper amosa o paso contrario: como contidos da rede poden atopar espazo en papel como prensa gratuíta.

Abre o portal iMIT para divulgar as actividades en materia de Sociedade da Información que se están a impulsar desde o Goberno galego

2009-11-26T11:12:00.001+01:00

A secretaria xeral de Modernización e Innovación Tecnolóxica presentou as liñas de actuación claves para o desenvolvemento da Sociedade da Información en Galicia na inauguración do evento ‘Movimiento Avanza’ na Coruña.

Mar Pereira puxo onte en valor os proxectos en materia de novas tecnoloxías do Executivo autonómico durante o acto de inauguración na Coruña do evento itinerante 'Movimiento Avanza', un proxecto integrante do 'Plan Avanza' que o Ministerio de Industria desenvolve en Galicia en colaboración coa Xunta, e que se atopa xa na súa segunda fase.

A secretaria xeral remarcou o compromiso da Xunta co desenvolvemento da Sociedade da Información, tendo como eixes da súa actuación o Plan director de telecomunicacións, a implantación do e-goberno, a dinamización do uso das TIC e o fomento do sector empresarial da Sociedade da Información.

Na súa intervención, Mar Pereira afirmou que a Xunta quere robustecer as telecomunicacións non só como instrumento para acadar novas oportunidades a nivel nacional e internacional, senón tamén para lograr a cohesión social interna, que definiu como imprescindible para construír a Galicia única na que todos os cidadáns teñan igualdade de oportunidades.

Nese marco situou o deseño da Estratexia global de telecomunicacións na que traballa o Executivo galego, e que suporá o investimento de máis de 260 millóns de euros nesta lexislatura, incluíndo o Plan director de banda larga, o despregamento da TDT, a modernización das redes de telecomunicacións da Xunta e a mellora das redes de alta capacidade para a comunidade científica.

A secretaria xeral de Modernización e Innovación Tecnolóxica lembrou que Galicia continúa a ser unha das comunidades menos desenvolvidas no acceso aos servizos de telecomunicacións, polo que a Xunta se marcou o obxectivo de dar resposta a esta demanda social, garantindo o acceso á banda larga a todos os galegos cunha capacidade e custo axeitados.

Impulso ao e-goberno en todas as administracións
En relación coa implantación da administración electrónica ou e-goberno, Mar Pereira subliñou que está a supor a posta en marcha de importantes proxectos de modernización dos servizos públicos coa colaboración de concellos e deputacións, ademais de actuacións integrais de dinamización do uso das novas tecnoloxías, especialmente nas pequenas empresas e autónomos.

A responsable de Modernización lembrou a recente posta en marcha da nova web da Xunta, un primeiro paso de cara á converter o portal institucional na ferramenta de referencia da Administración fronte á cidadanía, co obxectivo de reforzar a súa misión como canle de información e servizos públicos para a sociedade.

Ademais, a titular de Modernización anunciou a apertura do sitio web imit.xunta.es , Iniciativas de Modernización e Innovación Tecnolóxica iMIT, como espazo de comunicación e divulgación das diversas actividades que se están a impulsar desde o Goberno galego en materia de Sociedade da Información.

A secretaria xeral salientou que esta iniciativa ten a súa razón na estratexia que en materia de promoción, desenvolvemento e difusión da Sociedade da Información e as Comunicacións está a xogar a Xunta, unha estratexia integradora na que o seu departamento xoga o papel fundamental de desenvolver e coordinar todas as iniciativas.

Ferramentas para un modelo de crecemento competitivo
Mar Pereira sinalou que o Plan director de banda larga, que terá a súa execución en 2010, e a iniciativa e-goberno farán un especial fincapé nos sectores que acumulan un maior retraso tecnolóxico, sobre todo Educación e Xustiza. Ademais, puxo en valor a creación da nova Rede galega de centros (Telecentros) de servizos á Sociedade da Información e a posta en marcha dun centro demostrador de software para PEMES. Deste xeito, apuntou que a Xunta procura contribuír a un modelo de crecemento baseado no aumento da competitividade e da produtividade, na promoción da igualdade social e a mellora do benestar dos cidadáns.

Pereira destacou que con estes proxectos, Galicia será unha das primeiras comunidades autónomas en dar cumprimento ao chamamento feito pola Comisión Europea aos estados membros e aos gobernos rexionais para que adopten, non máis tarde de 2010, programas específicos para o desenvolvemento das TIC na nosa Comunidade.

Chega á Coruña a exposición dixital Movemento Avanza

2009-11-26T11:09:00.001+01:00

A Rede tamén viaxa, e máis se do que se trata é de informar polo miúdo das súas vantaxes para empresas, institucións e cidadáns de a pé. Nisto precisamente consiste a iniciativa móbil que vén de arribar á Coruña da man do Ministerio de Industria e a Xunta de Galicia: o evento itinerante Movemento Avanza, arestora na súa segunda fase.

Máis polo miúdo, trátase dunha exposición tecnolóxica sen base fixa e encamiñada a acurtar a distancia que afasta ás vantaxes das novas canles do coñecemento dunha boa parte da sociedade. Amais da exposición en si mesma, a iniciativa dá acubillo a todo tipo de actividades participativas, entre obradoiros e conferencias encamiñados a afondar na utilidade práctica das novas tecnoloxías. A día de hoxe, calcúlase que xa participaron na mostra arredor de 150.000 persoas de todo o Estado español.

Na inauguración desta etapa galega da iniciativa, que ficará na dita cidade até este 29 de novembro, participaron representantes do Goberno central e máis da Xunta, como por exemplo Mar Pereira, secretaria xeral de Modernización, quen aproveitou a oportunidade para enumerar os esforzos que o seu departamento está a desenvolver no impulso á Sociedade da Información, esforzos como por exemplo o Plan director de telecomunicacións, o afianzamento da Administración Electrónica ou o pulo ás novas tecnoloxías no eido empresarial.

Nun plano máis concreto, a secretaria xeral sinalou que o orzamento do programa global de telecomunicacións (abranguendo iniciativas como o devandito Plan director ou o despregamento da TDT) do Goberno galego é de máis de 260 millóns de euros para esta lexislatura. Dentro deste programa, engadiu, cobra especial importancia o impulso ao e-goberno, ou, o que é o mesmo, un novo tipo de relación -a través do dixital- entre as institucións públicas e os cidadáns. Neste senso, salientou a posta en marcha da nova face virtual da Xunta (un primeiro paso de cara á converter o portal “na ferramenta de referencia na Administración fronte á sociedade”, puntualizou) ou o desenvolvemento da páxina imit.xunta.es, un espazo habilitado para informar polo miúdo das accións que a Xunta leva a cabo en materia de Sociedade da Información.

Nova tenda en liña de marisco galego

2009-11-25T12:37:00.002+01:00

Nos últimos anos varias son as iniciativas que antes do Nadal aparecen dende Galicia para comercializar marisco a través da Internet, e desta volta temos a Emarisco.com, plataforma de venda de marisco tanto fresco coma cocido, que conta co descritivo dominio mariscosadomicilio.es, así coma un espazo en Facebook.

Este novo establecemento virtual de venda a domicilio ofrece mariscadas completas en distintos formatos segundo o número de comensais e con prezos que oscilan entre os 59 e os 169 euros para de 6 a 8 persoas. Tamén permite a compra por separado de lubrigantes, lagostinos, polbo, mexillóns, etc.

Os pedidos realizados antes das 10:00 horas recibiranse no domicilio do cliente antes das 13:30 horas do día seguinte, aínda que cómpre destacar que os domingos e luns non hai reparto.

Haberá que agardar para ver se esta plataforma consegue manterse no tempo neste sector tan arriscado, no que a calidade dos produtos ten tanto peso como a loxística, sendo este último elemento crítico, e o que leva a fracasar a moitas outras tendas en liña.

Novas xornadas sobre software libre na UDC

2009-11-23T09:35:00.002+01:00

Os días 1, 2 e 3 de decembro na Facultade de Informática do coruñés Campus de Elviña terá lugar unhas Xornadas de Software Libre, que buscan dar un enfoque xeral práctico sobre o software libre centrándose nos sistemas GNU/Linux, repartindo este curso en 10 horas repartidas en 3 sesións que comezarán ás 5 da tarde de cada un dos días das xornadas.

Xa está aberta a inscrición para este curso que só conta con 30 prazas que cubriranse por orde de chegada.

Os contidos repartiranse nas seguintes sesións:

Día 1
- Conceptos básicos<
- Un pouco de historia
- Que é GNU/Linux?
- Vantaxes
- Distribucións e escritorios

Día 2
- Instalando desde Windows
- Particionando o disco
- Instalación de Ubuntu 9.10
- Configurando o noso novo equipo

Día 3
- Que son os repositorios?
- Conseguindo novas aplicacións
- Introdución aos novos programas
- Alternativas libres a aplicacións privativas

A Secretaría Xeral de Medios presenta un titorial sobre a TDT dispoñible na Rede de Telecentros de Comunicación de Galicia

2009-11-23T09:33:00.000+01:00

A xefa de servizo de Programación Multimedia, da Secretaría Xeral de Medios, Felicitas Rodríguez, e o decano da Facultade de Ciencias da Comunicación da USC, Xosé Pereira, presentaron hoxe un titorial sobre a TDT co obxectivo de amosar a todos os usuarios da Rede de Telecentros de Comunicación de Galicia as vantaxes que ofrece este novo sistema fronte á forma tradicional de ver a televisión. O titorial presentouse hoxe no Centro Multimedia de Galicia de Santiago de Compostela e puido seguirse a través de videoconferencia nos Telecentros de Comunicación de Abegondo, Tui, Vilagarcía de Arousa, Guitiriz e O Barco de Valdeorras.

Felicitas Rodríguez lembrou que este titorial «desenvólvese no marco do proxecto multimedia de formación da campaña Comunícate», que a Secretaría Xeral de Medios desenvolve para dar a coñecer a Rede de Telecentros de Comunicación de Galicia (RTC).

Trátase dunha serie de titoriais interactivos que teñen o obxectivo común de facilitar aos usuarios dos Telecentros de Comunicación determinadas funcionalidades e potencialidades que se poden realizar dende os mesmos.

Dende hoxe, o titorial sobre a TDT estará dispoñible, para todos aqueles interesados, nos telecentros de comunicación que a Secretaría Xeral de Medios ten repartidos nas catro provincias galegas. O acabado de nomear decano da Facultade de Ciencias da Comunicación da USC, José Pereira, felicitou durante a súa intervención á Secretaría Xeral de Medios por este tipo de iniciativas «necesarias para que os cidadáns coñezan todos os pasos a seguir e poidan estar preparados de cara ao tan anunciado apagamento analóxico».

A Rede de Telecentros de Comunicación participa no II Maratón Fotográfico de Vimianzo

2009-10-30T10:28:00.001+01:00

O Telecentro de Comunicación de Vimianzo participará o vindeiro sábado no II Maratón Fotográfico que organiza o Servizo de Desenvolvemento Local do concello no marco das actividades relacionadas co programa de desenvolvemento sostible.

A saída terá lugar na praza do concello ás 9:30 horas e realizarase un percorrido de 11 quilómetros aproximadamente (Vimianzo – Campo da Areosa – Castrobuxán – Pasarela – Vimianzo). Estableceranse cinco temas para os roteiros fotográficos, que se darán a coñecer o mesmo día do maratón, sendo obrigatorio realizar cando menos unha fotografía de cada tema. Os participantes só poderán empregar cámaras dixitais e poderán volcar as súas fotografías no Telecentro de Comunicación a partir das 16:00 horas, co fin de que o xurado faga a selección das mellores fotos.

Haberá dúas categorías segundo a idade: junior (de 12 a 17 anos) e senior (adultos) e elixiranse as tres mellores fotografías de cada categoría. A exposición das mesmas terá lugar o 6 de novembro no Telecentro de Comunicación do municipio.

A Rede de Telecentros de Comunicación da Secretaría Xeral de Medios únese así a esta iniciativa do Servizo de Desenvolvemento Local de Vimianzo, a través da súa campaña Comunícate, coa que pretende dar a coñecer toda as posibilidades que ofrecen os TC para convertelos en puntos de referencia, dentro de cada concello, como lugares de encontro, de formación e de promoción do audiovisual galego. O obxectivo de Comunícate é que os Telecentros de Comunicación se incorporen como alternativa habitual na axenda de tempo libre da cidadanía.

Obradoiros para o mes de novembro

2009-10-30T10:27:00.000+01:00

Centro de Dinamización do Concello de Betanzos, vén de anunciar os obradoiros que vai desenvolver en novembro e que van dirixidos a aquelas persoas interesadas en iniciarse na informática e incorporar as novas tecnoloxías paseniñamente ao seu día a día.

Os obradoiros son os que seguen:

- Mecanografía para nenos e nenas: os días 2, 3, 4 e 5 de novembro de 19:00 a 20:15 horas.

- Mecanografía: este obradoiro, que vai dirixido a tódalas persoas sen límite de idade, desenvolverase tamén os días 2, 3, 4 e 5 de novembro, en horario de 16:30 a 18:30.

- Iniciación á informática: os días 2, 3, 4 e 5 de novembro a partir das 10:30 e até as 12:30.

- Recursos de interese na Internet: este obradoiro ten como finalidade dar a coñecer unha serie de páxinas web de grande interese para tódolos usuarios das novas tecnoloxías e Internet en xeral. Terá lugar os días 10, 11 e 12 de novembro de 18:30 a 20 horas.

- Iniciación ao procesador de textos Writer: os días 16, 17, 18 e 19 de novembro a partir das 10:30.

- Obradoiro de creación de blogs: os días 23, 24, 25 e 26 de novembro de 18:30 a 20:30 horas.

Asemade, este Centro, levará a cabo unha serie de charlas para presentar a iniciativa Memoria de Muller, que se levarán a cabo os días 16 e 17 de novembro a partires das 17 horas no devandito Centro.

As empresarias da Coruña levan a informática ao pequeno comercio

2009-10-22T10:17:00.001+02:00

A Asociación de Empresarias da Coruña, en colaboración co Instituto Galego de Promoción Económica (IGAPE), organiza o vindeiro mércores 4 de novembro un encontro formativo encamiñado a amosar as moitas vantaxes que o uso dos recursos dixitais teñen para as pequenas e medianas empresas e para o pequeno comercio. Máis polo miúdo, trátase dun seminario práctico a desenvolver baixo o seguinte epígrafe: A importancia de informatizar o comercio. A sesión, que será impartida polo Centro Europeo de Innovación de Galicia (BIC Galicia), terá lugar na aula de formación da dita Asociación (avenida Alcalde Pérez nº 53) entre as 20.30 e as 22.30 horas.

Segundo contan os organizadores, trátase dun seminario gratuíto dirixido sobre todo a xerentes e traballadores do pequeno comercio. Os obxectivos do curso, que achegará ao seu remate certificados de asistencia, son os de configurar ou mellorar as novas tecnoloxías no devandito sector e achegar os coñecementos precisos para o seu uso. O curso será impartido por Óscar Doce López.

Aquelas persoas interesadas en asistir ao seminario poden realizar a súa inscrición ou ampliar a información chamando ao teléfono 981 297 870 ou ben a través do correo electrónico info@aeco.org.es.

O Ateneo Ferrolán organiza unhas completas xornadas sobre software libre

2009-10-22T10:15:00.001+02:00

Trátase duns encontros a celebrar os días 28, 30 e 31 de outubro, todas as actividades inseridas nas Xornadas GNU/Linux, xornadas que tal e como o seu nome indica van dirixidas á promoción deste sistema.

As sesións contará cun extenso abano de contidos a distribuír desta maneira:

· Mércores 28 de outubro: "Sen medos que é libre"
GNU/Linux: O proxecto GNU e o núcleo Linux.
Software libre: Filosofía e licenzas libres.
A comunidade: grupos de usuarios e participación.
Vantaxes e compatibilidade: En ocasións non todo funciona.
Distribucións: A variedade está chea de posibilidades.
Entendendo GNU/Linux: Usuarios, grupos, permisos, sistema de ficheiros, cartafoles...
Escritorios: Gnome, KDE e moitos outros...
Recursos en rede: Descarga, instalación e actualización.

· Venres 30 de outubro: "Festa de instalación"
Obradoiro de instalación de GNU/Linux(Calquera pode levar o seu computador e un cable de rede para aprender a instalalo)

· Sábado 31 de outubro: "Máis a fondo"
Instalación de aplicacións e repositorios.
Libre ou non libre: Códecs, controladores e engadidos.
Aplicativos e equivalencias libres: Ofimática, redes, gráficos, multimedia, xogos... e todo o que precises.
Configuración de redes con e sen fíos.
Emuladores e máquinas virtuais.

Ábrese a inscrición á Kutruparty 7

2009-10-22T10:13:00.000+02:00

Esta semana abriuse a inscrición para a sétima edición do encontro informático Kutruparty que terá lugar entre os días 4 e 8 de decembro no recinto feiral da Fundación de Exposicións e Congresos de A Estrada.
Os interesados en asistir a este evento organizado pola Asociación de Usuarios de Software Libre de A Estrada (AUSLAE) deberán reservar a súa praza, e o prezo da inscrición en liña é de 25 euros (recibindo os 35 primeiros usuarios unha camiseta exclusiva de regalo), mentres que os que agarden á propia party deberán pagar 35 euros.

Eganet abre o prazo de candidaturas para os seus sextos premios

2009-10-20T11:17:00.001+02:00

A asociación de empresas dedicadas á internet incorpora este ano un novo premio ao mellor ambiente laboral. Entregaranse o 15 de decembro.

A Asociación de Empresas Galegas dedicadas a Internet (Eganet) acaba de abrir a convocatoria da sexta edición dos seus premios anuais. O prazo remata o 13 de novembro, mentres que a entrega de premios está prevista para o 16 de decembro en Compostela.

A presentación de candidaturas, en nove categorías, pódese facer cubrindo o formulario incluído na web da entidade. Segundo Eganet, os premios son unha plataforma de lanzamento para as empresas do sector e un xeito de achegar a Sociedade da Información e do Coñecemento á cidadanía, por representaren o acto anual de maior repercusión para o sector TIC do país.

Poden postularse empresas, profesionais, asociacións, organizacións empresariais, ONGs, entes públicos ou calquera organismo con sede social en Galiza que realicen proxectos no campo das TIC. As categorías, ademais do premio especial de Eganet, son E-Emprendedores, Cultura Dixital, Software Libre, Tecnoloxía Accesíbel, Comunicación Web, Publicidade Online, E-Commerce, Mellor Aplicación Online e, como novidade, Mellor Ambiente Laboral.

Esta semana comeza o envío de lectores de DNIe da campaña de Red.es

2009-10-20T11:15:00.001+02:00

A campaña de Red.es coa que achegan 500.000 lectores de DNI electrónico de balde (cobrando 2 euros de portes) avanza a bo ritmo, de xeito que incluso 9 comunidades autónomas esgotaron o número de dispositivos asignados para as súas demarcacións, e dende Tractis xa anuncian que prevén que este mércores comece o envío dos lectores de DNIe ao domicilio dos solicitantes, de xeito que serían entregados por correo ordinario dentro de 1 ou 2 semanas.

Amais, tamén aproveitan esta campaña para dar a coñecer a web usatudni.es, na que publican moita información relativa a cómo utilizar o DNI electrónico e aproveitar as posibilidades que ofrece. Este espazo explica qué é o DNIe, cómo hai que facer para utilizalo, cales son os servizos dispoñibles para o mesmo e incluso informa puntualmente dos distintos eventos formativos que percorren a xeografía española.

Gañador de Vacacións Dixitais

2009-10-16T12:59:00.001+02:00

Descrición: Esta fotografía esta sacada en Londres, no "London eye", vacacións que
realicei logo de rematar os estudos.

O BNG denuncia o desmantelamento de Mancomún

2009-10-15T12:43:00.000+02:00

A deputada do BNG, Ana Luísa Bouza, denuncia que o Goberno da Xunta está a desmantelar Centro de Referencia e Servizos de Software Libre Mancomún, pois en resposta a unha pregunta da deputada nacionalista a pasada tarde no Pleno da Cámara Galega, o conselleiro de Presidencia, Alfonso Rueda, asegurou que os 500.000 euros destinados a Mancomún «supuñan un custo excesivo» para as arcas da administración galega.

Bouza asegura que o pasado 14 de setembro o Goberno despediu a 7 persoas relacionadas con Mancomún, ao que habería que sumar que «recentemente fixeron un aviso de despedimento a máis de 100 traballadores e traballadoras da Fundación para o Fomento da Calidade Industrial e do Desenvolvemento Tecnolóxico de Galicia» que viñan traballando en iniciativas de extensión da Sociedade da Información, e que cesarían a súa actividade o vindeiro 31 de decembro.

Estas medidas supoñen «a supresión das medidas de apoio ao software libre que puxo en marcha o Goberno Bipartito», coas que conseguiron que o 10 das empresas galegas utilicen software libre e que triplicasen o seu uso nas escolas galegas.

Brión xa ten Telecentro

2009-10-15T12:41:00.002+02:00

O Secretario xeral de Medios, Alfonso Cabaleiro Durán, e o alcalde de Brión, José Luís García García, inauguraron hoxe o telecentro de comunicación do municipio (ubicación na Casa do Concello) co que a Secretaría Xeral de Medios pretende achegar aos veciños as novas canles de comunicación, convertindo este telecentro de comunicación nun espazo apropiado para familiarizar á cidadania coas canles e soportes audiovisuais de comunicación. Desde Oroso, a través de videoconferencia, o alcalde do municipio, Manuel Mirás Franqueira, deu a benvida ao concello de Brión á Rede de Telecentros de Comunicación.

Dende Brión o alcalde afirmou que era para el unha grande satisfacción inaugurar hoxe o Telecentro de Brión e deu a benvida tanto aos nenos de 5º de primaria do Colexio de Pedrouzos (Brión), como aos de Oroso, os cales ao final do acto tiverono turnos para saudarse e poñer temas en común entre os dous Concello.

José Luís García, aproveitou tamen esta ocasión para anunciar a incorporación do Concello de Brión ao programa de "Aula mentor", un sistema de educación a distancia a través de Internet que se pretende implantar coa axuda das instalacións do Telecenro.

Como colofón ao o Alcalde deu as gracias a Secretaría Xeral de Medios, e a todas as persoas implicadas para que este Telecetro de Brión sexa hoxe posible.

Potenciar as novas tecnoloxías entre o empresariado con discapacidade, un obxectivo da Xunta

2009-10-15T12:35:00.001+02:00

A secretaria xeral de Modernización e Innovación Tecnolóxica da Xunta de Galicia, Mar Pereira, recibiu o presidente da Asociación de empresarios discapacitados de Galicia, Gerardo Crespo, no seu despacho de San Caetano, unha xuntanza na que decidiron colaborar co obxectivo de que as novas tecnoloxías faciliten a inserción laboral das persoas que sofren algún tipo de discapacidade.
Entrevista

"Apoio total da Xunta a este obxectivo, sendo plenamente conscientes de que a tecnoloxía é un instrumento fundamental para a adaptación dos postos de traballo", destacou Mar Pereira, quen salientou a proposta da asociación de realizar un estudo para coñecer a situación actual do uso destas ferramentas nas empresas galegas e identificar ás posibles necesidades para poder poñer en marcha estratexias de actuación. "Partimos sempre da premisa de que as novas tecnoloxías non poden ser un elemento que dificulte esta inserción, senón todo o contrario", afirmou a secretaria xeral.

Gerardo Crespo destacou, pola súa banda, a importancia de usar as novas tecnoloxías para favorecer a inserción laboral do colectivo de persoas con dispacidade, tal e como se está a facer noutros países. "Vemos a tecnoloxía como unha ferramenta moi positiva para a inclusión; pretendemos que non sirva para facer unha brecha, que non provoque diferencias entre uns e outros senón que sirva para incluírnos a todos", asegurou.

O presidente da Asociación de empresarios valorou que a Secretaría Xeral de Modernización encabece o traballo das diferentes consellerías da Xunta para determinar qué ferramentas tecnolóxicas poden ser máis útiles para facilitar a inserción laboral deste colectivo.

Unha web permite saber se nos roubaron a clave do correo

2009-10-15T12:34:00.000+02:00

Serversniff incorporou unha aplicación que determina se un determinado enderezo forma parte das listaxes de contrasinais filtradas na rede.

Nos últimos días filtráronse na internet miles de enderezos de correo electrónico cos seus respectivos contrasinais. Púidose saber que eses datos foron obtidos a través de software malicioso instalado nos computadores das persoas afectadas. Agora, a web Serversniff.net permítenos saber se a nosa conta foi afectada, para que tomemos a medida básica de cambiar a clave de acceso.

Segundo informa Vilaweb, unha das aplicacións incluídas no portal, destinado a ofrecer utilidades relacionadas coa seguridade informática, ofrécenos a posibilidade de detectar se un enderezo se viu comprometido. Para iso, abonda con introducir o nome de usuario (o que vai antes da @), sen ningunha outra información e premer "check". Aparecerá unha mensaxe que nos dirá se hai algunha conta con ese nome que se vira afectada.

Fin de Vacacións Dixitais

2009-10-14T10:56:00.001+02:00

Último día do concurso de fotografía Vacacións Dixitais. O vindeiro 16 de outubro anunciarase o nome do gañador/a.

Os blogs do país tamén se converterán nun vehículo publicitario

2009-10-13T11:22:00.000+02:00

Os blogs do país tamén se converterán nun vehículo publicitario

A decisión do goberno dos Estados Unidos de regular os blogs patrocinados e os contidos "interesados" nas redes sociais de internet por parte de marcas, de xeito que se especifique que se publicaron a cambio dunha contraprestación, tamén terá, antes ou despois, eco no país. Falamos con Manuel Gago, blogueiro e profesor da Facultade de Ciencias da Comunicación da USC, e con Andrés Milleiro, tamén blogueiro e dedicado ao Márketing de Medios Sociais.

En Galiza aínda non está moi estendido este método, que se está a converter nunha alternativa á publicidade tradicional. Segundo Manuel Gago, estas prácticas "empezaron a aparecer hai dous anos", cando algunhas empresas comezaron a introducilas no seu plan de medios, como adegas que envían viño co fin de dalo a coñecer e promocionalo. "Creamos un código" para que estes agasallos se indiquen "de maneira expresa", asegura Gago.

En calquera caso, os blogueiros respectan, na práctica, este código ético: "Vexo na miña experiencia no sector de blogs gastronómicos que a xente di cando lle envían produtos, aínda que até agora era algo excepcional". De feito, esa excepcionalidade fai que cando "manden algo" xa se converta en "parte da propia historia". Tamén, o feito de que estas campañas non sexan exclusivas e se repitan a moitas bitácoras fai que sexa imposíbel ocultar a súa natureza: "Resultaría ridículo que un non diga que foi un agasallo cando moitos máis o van facer".

Da mesma opinión é Andrés Milleiro, pois en Galiza "non hai moita tradición de patrocinio de blogs", e opina que "en xeral, está bastante mal visto que se fagan entradas patrocinadas e non se diga". A pesar desa evidencia, considera que "a iniciativa dos EUA pode estar ben, porque hai casos en que está bastante ben camuflado". Engade que é positivo que unha regulación que xa existía na prensa se traslade aos blogs, onde "non está de máis ser sincero".

Pero a situación aínda marxinal deste tipo de promocións está a medrar e xa empeza a ser importante nalgúns sectores. Segundo Gago, na "gastronomía, na moda e todo o relacionado cos estilos de vida" xa é "moito maior do que imaxinamos". Así, empresas "que teñen máis problemas de distribución están incluíndo este tipo de estratexias no seu plan de medios". Isto supón substituír a publicidade tradicional aproveitando a crise. Abandónase "o banner, o adsense. Hai unha transferencia cara a este tipo de prácticas". O obxectivo é "poñerse en contacto directo co consumidor".

Para Manuel Gago, "internet é tan transparente que é moi difícil ocultalo, porque vaise saber. O blogueiro pode perder a súa credibilidade". Segundo Andrés Milleiro, a diferenza "é cuestión de mercados. O dos EUA é máis grande". Aquí "ultimamente a xente xa informa de que recibiu un produto grazas a unha axencia de márketing", pero tamén se dan accións menos visíbeis como "blogs comerciais coñecidos aos que as marcas convidan a eventos", algo que se fai "máis a nivel de relacións públicas, que non son realmente patrocinios".

Aínda que é un asunto que "entra máis na ética de cada blogueiro", Milleiro pensa "que non estaría de máis" ter unha lexislación como a estadounidense: "Non vexo mal que cada cal explique máis ou menos como se monta o negocio", pois é preciso lexislar "en temas un pouco escuros, como os blogs" porque, ao final, "dálles credibilidade".

O Goberno galego colabora na II Campaña de Software Legal do Ministerio de Industria

2009-10-13T11:20:00.001+02:00

A redución en dez puntos do índice de piratería, de aquí a 2011, suporía a creación de dous mil empregos adicionais e 194 millóns de euros en impostos

A Secretaría Xeral de Modernización e Innovación Tecnolóxica traballa no fomento do uso de software libre mediante o impulso dunha oferta de calidade

A Xunta amosou hoxe o seu apoio á II Campaña de Software Legal promovida polo Ministerio de Industria. Neste sentido, desde o Goberno galego seguiranse a impulsar distintas iniciativas para loitar contra a ‘piratería’ aumentando o uso do software legal por parte dos cidadáns e das empresas da comunidade, co obxectivo de acadar o respecto pola propiedade intelectual do mesmo e dos beneficios que supón. Entre estes cabe citar a redución de riscos legais e de negocio, un mellor soporte técnico e un mantemento adecuado (ausencia de virus, etc.). Ademais, o software legal contribúe o desenrolo da economía ao tempo que reforza o sector das tecnoloxías da información e xera empregos de alta cualificación. Así o explicou o subdirector xeral de Infraestruturas e Telecomunicacións, Adrián Lence Paz, que participiou na presentación da II Campapa de Software legal impulsada polo Ministerio de Industria, Turismo y Comercio.

A presente situación do mercado de software legal ven marcada por un índice de piratería do 42% no ano 2008. Esta cifra, se ben é certo que se sitúa catro puntos por debaixo da rexistrada no anterior exercicio, mantense aínda un 7% por enriba dos datos da Unión Europea. A redución en dez puntos deste índice de piratería, de aquí ao ano 2011, suporía a creación de mais de 2.000 empregos no mercado nacional, ao tempo que incrementaría en mais de 1.400 millóns a facturación do sector tecnolóxico e en 194 millóns de euros a recadación por impostos.

Ante estes datos, a Secretaría Xeral de Modernización e Innovación Tecnolóxica traballa na promoción do uso de software legal mediante o impulso dunha oferta de calidade que inclúe distintas iniciativas entre as que destacan a negociación de acordos marco con provedores co obxecto de lograr unha maior eficacia no gasto público, a potenciación do uso de ferramentas de control dos softwares instalados e a adecuada convivencia entre software libre e software propietario.

Neste sentido, enténdese por software libre aquel que pode ser distribuído, modificado, copiado e usado, e, polo tanto, debe vir acompañado dun código para facer efectivas as liberdades que o caracterizan; así, sendo mais sinxelo o acceso a el conserva todas as características do software legal.

A promoción do uso deste software plasmarase a través de numerosas actuacións como a elaboración dunha campaña que impulse a oferta de solucións libres de calidade, a creación dun centro demostrador de softwares libres ou a posta en marcha dun procedemento para licenciar como software de fontes abertas.

Twitter ampliará a súa oferta de idiomas

2009-10-13T11:19:00.000+02:00

Cando accedemos a Twitter atopamos que nas súas opcións de idioma só podemos elixir entre inglés ou xaponés, o que resulta un tanto rechamante, e que poderá cambiar en breve segundo anuncian no blog corporativo da compañía de microblogging, xa que abriron unha ferramenta de tradución do seu sistema (que funciona coa colaboración de usuarios selectos) de xeito que nun primeiro momento poderemos gozar de versión de Twitter en francés, italiano, alemán e español, para pasar máis adiante a aplicarse a outras linguas (aínda que sorprende que identifiquen coma linguas o catalán de Valencia e ao éuscaro, mentres esquecen ao galego).

Polo momento non concretaron cando poderemos acceder a Twitter en español.

Os despidos da Xunta en I+D poden deixar sen servizo a 26.000 persoas

2009-10-06T11:00:00.001+02:00

Dende a posta en marcha no 2007 de Rede de Dinamización, un dos proxectos do Plan Estratéxico Galego da Sociedade Información, un total de 49 centros localizados en distintos puntos de Galicia, en especial no rural, contribuiron á difusión das novas tecnoloxías da información (TIC) a través de obradoiros, cursos online ou aulas de informática. Estes espazos contan xa cun total de 26.000 usuarios en toda Galicia, que poderían verse afectados polo despido de 45 responsables técnicos destes proxectos.

O pasado 15 de setembro, a Administración iniciou un proceso de rescisión de contratos co despedimento de 14 traballadores do Centro de Referencia e Servizos de software libre (Mancomún) e doutros programas tecnolóxicos, namentras esta semana notificou a uns 120 empregados máis da Fundación Calidade a data de finalización do seu proxecto laboral, o 31 de decembro, segundo confirma a CIG. Todos eles pertencen a iniciativas que impulsara o Goberno bipartito, mentres a Secretaría Xeral de Modernización e Innovación Tecnolóxica, da que dependen os proxectos afectados, aínda non concreta os plans que ten para eles.

Precisamente, un dos programas máis afectados sería a Rede de Dinamización, que incide, fundamentalmente, en reducir a fenda dixital de sectores como maiores, discapacitados, mulleres ou colectivos con dificultades de acceso ás novas tecnoloxías. Este programa contaba tamén con asesores que orientaban a distintas entidades sobre a mellor maneira de implementar o uso das TIC e que mesmo se desprazaban pola vilas galegas fomentando o uso deste tipo de tecnoloxías.

Este servizo está presente en máis de 70 concellos, localizados, sobre todo en zonas rurais onde existen máis dificultades de acceso a internet. Estes centros están equipados con ordenadores que empregan un sistema operativo libre e en galego como o Galinux. Así mesmo, a Rede Dinamización conta con 49 telecentros, dotados de material informático e audiovisual para familiarizar aos cidadáns coa linguaxe multimedia.

A comunidade de usuarios de software libre xa manifestou a súa inquietude ante a falta de concreción da Xunta sobre estes proxectos e sobre a posibilidade de que non continúen, polo que se dirixirá á Administración para transmitir a súa postura. Porén, nalgúns casos, recoñecen a necesidade de “desvincular da política as cuestións asociadas ao manexo de estándares abertos e difusión das TIC”, explica David Martínez, voceiro do GUL (grupo de usuarios de Linux) Ousli.

Chega Fillos 4.0

2009-10-06T10:57:00.001+02:00

A rede social da Galiza exterior convértese, a nivel numérico, no sétimo maior centro galego do mundo.

O portal da Asociación Cultural Fillos de Galicia acaba de renovarse. Coincidindo co momento en que superaba os 6.700 usuarios, o que o converte no sétimo maior centro galego do mundo, inaugurouse Fillos 4.0.

Como todas as actualizacións, o proceso de mudanza é complicado e poden producirse algunhas incidencias, segundo avisaron dende a web. O obxectivo é construír unha rede social máis participativa e con contidos máis accesíbeis no que xa é o punto de encontro na internet da comunidade galega no exterior.

E, como sempre que hai cambios, non todos os usuarios están cómodos cos inevitábeis desprazamentos de menús e novas incorporacións. Haberase que adaptar.

Fillos.org leva 12 anos na rede e márcase xa como seguinte obxectivo chegar ás sete mil persoas usuarias. Na renovación do portal tivo un papel decisivo o técnico Martín Vázquez, que tivo que coordinar a transición dun portal con máis de 100 megas de datos.

Os servizos sociais, máis preto grazas a un novo titorial dos Telecentros

2009-10-06T10:56:00.001+02:00

A Rede é un servizo de información de primeira orde. As posibilidades de tirarlle partido para mellorar no posible a nosa calidade de vida son ben grandes. Porén, ás veces o coñecemento que nos pode axudar, malia estar preto, non está cen por cen visible. Facer que non pasemos de largo sen velo é o gran obxectivo dos titoriais que está a presentar a Secretaría Xeral de Medios: recursos para que obteñamos o mellor da Rede na Rede de Telecentros espallada por toda a nosa xeografía e pertencente ao devandito departamento.

Se hai uns días falabamos do titorial encamiñado a favorecer o noso día a día, agora toca facelo dunha nova entrega presentada hoxe: o titorial Servizos Sociais na Rede.
A achega, avaliada en detalle polo subdirector xeral de Enxeñaría e Planificación de Telecomunicacións, Ignacio Otero, vai dirixida a amosarnos as facilidades que a Rede nos pode achegar na obtención de coñecemento práctico sobre as áreas que abranguen os servizos sociais.

A presentación da iniciativa, na que tamén estivo presente Modesto Rouco (subdirector xeral de Promoción da Autonomía Persoal), celebrouse en espazos diferentes da nosa xeografía e de xeito simultáneo: en Santiago (sede física da presentación), A Cañiza, Tui, Ourense, Lugo, Betanzos e Oroso. A clave: tirar partido da videoconferencia dende os Telecentros de Telecomunicacións.
Por certo que o titorial, que é un engadido formativo para as usuarias e usuarios dos ditos Telecentros, xurde no marco do proxecto multimedia da campaña Comunícate, da Secretaría Xeral de Medios. Como dixemos, o gran obxectivo desta nova entrega é facilitar o camiño da cidadanía aos servizos sociais, recursos que a día de hoxe se teñen convertido “no cuarto piar dos sistemas de benestar da sociedade”, subliñou Modesto Rouco durante a presentación. En definitiva, trátase dunha guía para coñecer de primeira man o que poden facer por nós as institucións e organizacións en materia de atención á discapacidade, dependencia, inclusión social ou políticas destinadas á mocidade. Asemade, serve tamén para facer máis doado, a través da Rede, o camiño da posta en marcha e desenvolvemento dos trámites dispoñibles.

Seguen os despedimentos nos proxectos de promoción tecnolóxica do anterior equipo da Xunta

2009-10-02T10:42:00.000+02:00

Unha boa parte dos proxectos de promoción tecnolóxica xurdidos ao abeiro do anterior Goberno galego son a día de hoxe unha fonte de incógnitas, sobre todo no que se refire ao nivel de apoio que van recibir do actual Executivo. Segundo conta estes días Xornal, ao despedimento recente de sete traballadores do Centro Mancomún (iniciativa de pulo á programación aberta que, ao noso xuízo, non tería porqué estar politizada e, tendo en conta as súas vantaxes, cumpriría que seguise adiante) e doutros programas vinculados, hai que engadir agora a saída doutros sete empregados de proxectos de investigación e desenvolvemento. A maiores, engade, os profesionais da Fundación Calidade xa foron postos ao tanto da vindeira finalización dos seus contratos. Polo tanto, estaríamos xa a falar de 120 persoas despedidas co remate do ano.

Para sindicatos como a CIG, trataríase dunha decisión que vai en contra da aposta polo desenvolvemento, que é o que teoricamente debería importar aos departamentos da Xunta con competencia sobre os devanditos programas de promoción tecnolóxica. Pola súa parte, a Secretaría Xeral de Modernización alega que o devandito proceso responde a unha necesidade de adaptar os proxectos de divulgación dixital ás liñas estratéxicas do novo Goberno, que non implica nin moito menos o seu peche. De feito, Modernización xa advertiu que continuarán operativos.

Por certo que entre os proxectos máis afectados, informa o devandito sindicato, atópase a Rede de Dinamización da Sociedade da Información, iniciativa que xa deu probados exemplos de éxito no que se refire a promover o emprego das redes no noso rural (onde os accesos e as posibilidades de formación non abondan) e que segundo explica a CIG quedará a finais de ano sen 45 dos seus traballadores.

Meteogalicia mellora o seu servizo web cunha nova páxina

2009-10-02T10:41:00.000+02:00

Xa está dispoñible a nova páxina web de MeteoGalicia, que incorpora importantes novidades co obxectivo de mellorar a súa navegabilidade e ofrecer aos usuarios mais información, novas ferramentas e servizos e unha distribución dos mesmos mais personalizada, xa que o internauta poderá organizar a páxina de inicio segundo as súas preferencias.

O conselleiro de Medio Ambiente, Territorio e Infraestruturas, Agustín Hernández, presentou o novo portal, nunha visita á sede central do organismo na que aproveitou para coñecer de preto as instalacións e saudar aos profesionais que traballan na axencia galega de meteoroloxía.

A páxina web de MeteoGalicia recibe un promedio de 380.000 visitas diarias, alcanzando a cifra de 92 millóns de páxinas vistas nos primeiros 8 meses do 2009. No mes de agosto superouse o millón de usuarios diferentes que visitaron a páxina web no ano 2009. Segundo o ranking de Alexa, MeteoGalicia está entre as 10 web mais visitadas de Galicia e entre as 1.000 mais consultadas de España.

Actualización constante

Hernández destacou que MeteoGalicia actualiza os contidos da web para adaptar a páxina aos novos retos tecnolóxicos. O novo portal estivo exposto a consulta pública durante uns meses, ao longo dos cales os usuarios mandaron diversas suxestións que foron incorporándose.

Así, a nova web incorpora os elementos principais de MeteoGalicia baseados na predición diaria e os datos en tempo real da rede de observación meteorolóxica e oceanográfica. Unha das novidades mais salientables reside en permitir a súa configuración polo usuario, o que lle posibilitará ter os produtos de predición dispoñibles inmediatamente sen necesidade de buscalos. Asemade, tense configurado un servidor RSS para que o cidadán poida recibir suscripcións aos diferentes servizos de MeteoGalicia, co cal se pode compartir a información e usala noutros sitios web ou programas.

Outra das melloras importantes consiste nun sistema de alertas por adverso meteorolóxico en forma de mapas con cores por concello, que indicarán a gravidade do fenómeno para os próximos dous días. Tamén se mellora a predición a medio prazo para os pŕoixmos 10 días, que agora permite a territorialización por localidades.

Engádense, ademais, novos produtos derivados do satélite Meteosat (isobaras, índices de risco de incendios, niveis de irradiación solar, temperatura da auga...) así como unha publicación dos mesmos que pasa de ser cada 6 horas a ter dita información cada 15 minutos. A nova páxina web e as innovacións introducidas permitirán incorporar en breve novos servizos, como redes de observación; detección de raios, radar, etc. dun xeito máis amigable para o público.

Despiden a un docente por utilizar un blog como ferramenta educativa

2009-10-02T10:40:00.001+02:00

Varios blogs están a comentar hoxe o caso do centro educativo Orue Eskola, adscrito á Asociación de Ikastolas Católicas, no que imparten un ciclo superior de formación profesional en educación infantil, por ter despedido a un docente ao utilizar nas súas clases unha metodoloxía que «non se axusta aos parámetros establecidos pola normativa en vigor» ao utilizar coma elemento motor da materia un blog.

O docente en cuestión só impartía a clase de Desenvolvemento cognitivo e motor, e aproveitaba que a súa aula estaba dotada de proxector, Wi-Fi e 10 ordenadores portátiles para facer un uso intensivo das tecnoloxías a través dunha bitácora de Internet.

O caso sorprende especialmente por xustificar o despedimento do profesor baseándose no uso dunha ferramenta, elemento que non establece a normativa vixente, e por ser unha das poucas veces nas que penalizan o aproveitamento das TIC na educación en vez de facer xusto o contrario.

A Universidade de Vigo presenta un curso sobre a Web 2.0 na educación

2009-10-02T10:39:00.000+02:00

A Universidade de Vigo quere tirarlles partido a todas as novidades da Rede para mellorar na medida do posible a súa oferta docente. Máis polo miúdo, a intención é centrarse en todo aquilo que favorece a comunicación libre, a colaboración activa e san entre usuarios e, sobre todo, a posibilidade de construírmos, coas nosas propias mans e dende unha postura de simples internautas, a Internet mesma. En definitiva, do que se trata é de adaptar a Rede 2.0 á docencia, e viceversa. Este é o gran obxectivo do curso Aplicacións Educativas da web 2.0 que organiza a Vicerreitoría de Formación, unha iniciativa nova (vai pola primeira edición) e que se dirixe a familiarizar aos profesores coas ferramentas máis salientables da Rede social e guialos logo na aplicación á súa actividade diaria.

Máis polo miúdo e segundo conta a Universidade, o gran obxectivo do curso é achegar aos docentes o pulo inicial para que entren nas ferramentas 2.0, das que non deberían ficar á marxe nin permitir que o seu alumnado chegase a desaproveitalas como métodos de comunicación e formación.

A iniciativa, tras unha primeira toma de contacto cos fundamentos básicos da Rede social, entrará de cheo na presentación de aplicativos e servizos como Google e seus apartados Groups, Calendar ou Talk; o soporte para publicar presentacións Slideshare, marcadores sociais como Mister-Wong ou comunidades de traballo cooperativo como Xing. Máis adiante, a iniciativa docente abordará cuestións vinculadas ao fenómeno blog (onde o internauta se converte en xestor dun espazo propio de seu dende o que se comunica co mundo e permite que o mundo se comunique con el) e a súa vertente máis didáctica.

A previsión é finalizar o curso coa creación dun wiki, espazo web colectivo que se abre á colaboración de múltiples internautas a través do navegador web. Os interesados en participar nesta actividade, que se desenvolverá os días 23, 25, 27 e 30 de novembro e 2 de decembro en horario de 10.00 a 14.00 horas, poderán formalizar a matrícula ata o 20 de outubro.

Actividade en Betanzos

2009-09-30T14:07:00.002+02:00

No marco do proxecto multimedia de formación da campaña “Comunícate”,
presentarase en diversos Telecentros a través de videoconferencia, entre
eles o de Betanzos o cuarto turtorial “Servizos da Rede” o día 2 de
outubro a partires das 12:30.

Este titorial pretende amosar aos usuarios as facilidades que a rede pode
ofrecer no referente a tarefas de primeira necesidade, como solicitar e
reservar unha cita co médico de cabeceira a través de Internet, consultar
listas de espera ou acceder a información sobre servizos sociais para
maiores, rapaces ou persoas en situación de dependencia.

Os titoriais, desenvolvidos en Flash, están pensados para un público con
escasos coñecementos informáticos e tratarán sobre distintos temas
relacionados co mundo das novas tecnoloxías no ámbito da comunicación e
cos distintos servizos e oportunidades que a rede ofrece na actividade
diaria da cidadanía: o acceso á banca electrónica, a administración
electrónica, a formación on-line, as redes sociais, etc…

Horario de inverno da RDSI

2009-09-30T09:48:00.001+02:00

O horario de inverno comeza este xoves 1 de Outubro e será de luns a xoves de 10.30 a 14.00 e de 16.00 a 20.30 e o venres de 9.30 a 15.00.

10 persoas con discapacidade intelectual fórmanse en novas tecnoloxías na capital galega

2009-09-30T09:45:00.000+02:00

Fademga Feaps Galicia, a Federación de Asociacións en Favor das Persoas con Discapacidade Intelectual do noso país, que conta na actualidade con máis de 40 entidades galegas federadas para prestarlle servizo a un total de 4745 persoas con discapacidade intelectual, vén de anunciar que dende o pasado luns, e ata o vindeiro mércores 30 de setembro, está a formar a un total de 10 persoas deste colectivo, en Internet e informática, dúas ferramentas óptimas para mellorar a autonomía dos alumnos, así como a súa capacitación para o mercado laboral.

Esta acción formativa, que se está a desenvolver en Santiago de Compostela estes días, consta de dous cursos, un de informática básica e outro de iniciación a Internet, impartidos de xeito consecutivo para optimizar a comprensión de conceptos.

Cada un deles ten unha duración de 12 horas, dedicadas a impartir contidos eminentemente prácticos, para que os alumnos inscritos poidan traballar de primeira man, as técnicas explicadas polos formadores.

Esta acción formativa ten como principais obxectivos adquirir una visión xeral sobre Internet e os ordenadores conectados á Rede e coñecer os principais servizos que ofrece a mesma, tales como a World Wide Web, o correo electrónico, os FTP, os servizos de novas, blogs...

Os cursos tamén buscan que os usuarios aprendar as operacións habituais para o manexo do navegador e realicen con éxito accións tan habituais para os internautas como son enviar e recibir mensaxes de correo electrónico, buscar información empregando buscadores ou traballar cos vínculos contidos nas webs, entre outras cousas.

Asemade, no tocante á parte física do ordenador, os asistentes a esta acción formativa, tamén aprenderán a traballar cos periféricos de entrada básicos, tales como o rato ou o teclado, e a usar a impresora ou o escáner.

Os responsables de Fademga encargados da formación en novas tecnoloxías das persoas con discapacidade intelectual pertencentes á federación, aseguran que a informática, como ferramenta fundamental na sociedade actual, vaille servir a este colectivo tanto para a súa socialización como para a búsqueda de emprego ou desempeño do mesmo en igualdade de condicións. Por iso, para que as persoas con discapacidade intelectual non queden excluídas da sociedade do coñecemento, afirman, “é necesario que adquiran as suficientes competencias que garantan un dominio mínimo das novas tecnoloxías, que permita o seu desenvolvemento social e persoal e mellore a súa integración efectiva na sociedade actual”. Por este motivo, a federación decidiu programar esta actividade, que será levada a cabo por técnicos da mesma, e que se verá ampliada noutras localidades galegas, polo éxito da convocatoria.