O instituto A Pinguela acolle estes días as Xornadas de Software Libre de Monforte

Entre hoxe e mañá, o instituto A Pinguela está a acoller a terceira edición das Xornadas de Software Libre de Monforte, evento organizado polo departamento de informática do dito centro educativo e no que está a participar a plataforma mancomun.org, integrada por usuarios e deseñadores de software libre da nosa terra en colaboración coa Xunta.

As xornadas contan coa presenza de Roberto Brenlla, da Asociación de Usuarios de GNIX (Agnix), quen acode tamén en representación de Tegnix, consultora tecnolóxica e informática especializada en programación en código aberto e integrada por membros de diferentes Gugls (Grupos de Usuarios de GNU/Linux) da nosa terra.

No encontro de Monforte tamén están a participar Enrique Barreiro (director da Escola de Enxeñería Informática de Ourense), Juan López (técnico de Itaca Software Libre) ou Tomás Vilariño, quen falará polo miúdo do proxecto Forxa de mancomun.org, unha iniciativa de colaboración para fomentar a posta en marcha en Galiza de desenvolvementos ligados ó código aberto.