As empresarias da Coruña levan a informática ao pequeno comercio

A Asociación de Empresarias da Coruña, en colaboración co Instituto Galego de Promoción Económica (IGAPE), organiza o vindeiro mércores 4 de novembro un encontro formativo encamiñado a amosar as moitas vantaxes que o uso dos recursos dixitais teñen para as pequenas e medianas empresas e para o pequeno comercio. Máis polo miúdo, trátase dun seminario práctico a desenvolver baixo o seguinte epígrafe: A importancia de informatizar o comercio. A sesión, que será impartida polo Centro Europeo de Innovación de Galicia (BIC Galicia), terá lugar na aula de formación da dita Asociación (avenida Alcalde Pérez nº 53) entre as 20.30 e as 22.30 horas.

Segundo contan os organizadores, trátase dun seminario gratuíto dirixido sobre todo a xerentes e traballadores do pequeno comercio. Os obxectivos do curso, que achegará ao seu remate certificados de asistencia, son os de configurar ou mellorar as novas tecnoloxías no devandito sector e achegar os coñecementos precisos para o seu uso. O curso será impartido por Óscar Doce López.

Aquelas persoas interesadas en asistir ao seminario poden realizar a súa inscrición ou ampliar a información chamando ao teléfono 981 297 870 ou ben a través do correo electrónico info@aeco.org.es.

Agestic organiza en Santiago un Seminario de sensibilización en Calidade do Software

O vindeiro 17 de marzo, o Centro de Novas Tecnoloxías de Galicia en Santiago de Compostela, acollerá un Seminario de sensibilización en Calidade do Software, que organiza Agestic en colaboración co devandito Centro e coa Consellaría de Traballo da Xunta de Galicia.

O acto conta co apoio de INTECO e tén como principal obxectivo analizar o impacto que a calidade do software ten na competitividade do sector TIC de Galicia, así como o estudo e diagnóstico da situación de partida do mesmo.

O programa conta coa participación de destacados membros de INTECO como son José María López Bourio, Ignacio Caño, Elena Argüelles e Paula Soler, así como coa de José Antonio Ortega de Tecnocom, José Antonio Fernández de Caixa Galicia, José Antonio Castelao de Aldaba e Carlos Segade de Balidea, que presentarán distintos casos de éxito experimentados en cadansúas empresas.

Asemade, José Ramón Lamenca de ESI, desenvolverá o relatorio, Xestión e mellora de procesos, que precede ao de José Ángel Valderrama de AENOR, Xestión e mellora de calidade.

A web de Agestic recolle o boletín de incrición para este acto, que será de balde e que acollerá aos participantes por orde de rexistro.

Seminario de balde sobre Final Cut Studio 2 en Vigo

O vindeiro xoves 26 de xuño ás 19:30 horas a tenda AS Computer de Vigo (sita na rúa Porta do Sol, nº 9) acolle un seminario gratuíto para profesionais creativos sobre a aplicación Final Cut Studio, unha das ferramentas de edición de vídeo máis valoradas do mercado.

Para poder asistir só é preciso inscribirse previamente por correo electrónico ou por teléfono (886 13 88 81 / 886 13 88 82).