Convocado dende a nosa terra un encontro virtual de artistas 2.0

O proxecto cultural 12 Lúas segue adiante na súa teima de afondar nas posibilidades dunha estrada de dobre vía: aquela na que circulan as novas expresións artísticas e as tecnoloxías da información. Nesta liña é precisamente onde se insire un dos proxectos estrela do seu segundo ano de actividade: a primeira edición do Evento Internacional de Arte, Redes Sociais e Web 2.0. O encontro, que como o seu propio nome indica sae á procura do sitio onde a creatividade a título persoal se converte en participativa, non se pecha a unha única disciplina nin a un número limitado de artistas e/ou internautas: a idea é abranguelo todo. Trátase polo tanto dun “gran evento da web 2.0” que se abre como tal á comunidade e que só esixe unha serie de requisitos imprescindibles: ter un blog (unha das ferramentas por excelencia desta nova orde da Rede) como unha xanela para amosar os traballos, estar presente nalgunha rede social (Facebook, Tuenti, hi5, etc) co mesmo obxectivo ou ter empregado ferramentas como YouTube se a achega é audiovisual ou como Flickr no caso da expresión plástica, gráfica ou fotográfica.

Amais, hai un cuarto requisito fundamental que lle achega aínda máis coherencia a esta proposta de cultura con altofalantes 2.0: todos os traballos deberán estar rexidos por licenzas Creative Commons, o que significa que ficarán dispoñibles para seren usados por segundos ou terceiros sempre e cando se recoñeza a autoría orixinal.
Segundo informa a organización, unha vez cumpridos os requirimentos cómpre enviar á conta de correo 12luas@gmail.com as ligazóns correspondentes para a comprobación.

Logo, procederase a enviarlle un correo electrónico ao artista co logotipo do evento para que o pendure nas respectivas plataformas e incluirase no caderno de 12 Lúas. “Aquel que teña máis comentarios feitos por usuarios únicos será publicado en todas as nosas redes xunto coa súa obra”, informan os responsables do certame. Por certo que a data límite para participar é o 4 de outubro de 2009.

Santiago recibirá en xuño a visita de 137 expertos en tecnoloxías da información de toda Europa

A Universidade de Santiago (USC) vai acoller o mes vindeiro, entre o día 23 e o 26, un dos encontros de investigación en novas tecnoloxías do coñecemento máis importantes de toda Europa. Segundo conta a USC na súa web, será a primeira vez en todo o territorio estatal que se celebre esta xuntanza, de escaso seguimento por parte dos medios xerais de comunicación pero amplamente seguida pola comunidade académico-investigadora. As cifras non deixan dúbida sobre a lonxitude do seu alcance: até 137 universidades e institucións de investigación superior de 36 países europeos estarán representadas na Conferencia Internacional da European University Information Systems (EUNIS).

A xuntanza, que foi presentada estes días nos seus máis mínimos detalles, chega con esta edición compostelá á súa 13ª edición, logo de terse desenvolvido en centros de coñecemento europeos de primeiro nivel: Inglaterra (Manchester), Alemaña (Dusseldorf e Berlín), Francia (Grenoble), República Checa (Praga), Finlandia (Helsinki), Polonia (Poznan), Portugal (Porto), Holanda (Amsterdam), Eslovenia (Ljubljana), Tartu (Estonia), e Dinamarca (Aarhus).

Por certo que a organización decidiu optar por Santiago por dous grandes motivos: polo pulo á inclusión das novas tecnoloxías no eido académico que se está a lanzar dende a USC e, tamén, pola “súa presenza activa nos distintos foros galegos, españois e europeos”.

Polo que respecta ao programa de actividades, dicir que as intervencións agruparanse en diversos bloques temáticos sobre aprendizaxe a distancia nas súas diferentes modalidades, ferramentas de portais e webs institucionais, administración electrónica, globalización e mobilidade, infraestrutura e sistemas integrados, xestión das tecnoloxías da información, novas tecnoloxías aplicadas á educación e redes sociais.

EUNIS
A European University Information Systems (EUNIS) é unha asociación creada en 1993 cuxa actividade principal é a súa conferencia anual, a cita mais importante, no contorno europeo e mundial, de reflexión sobre os asuntos vinculados ao desenvolvemento e utilización das TIC nas universidades. Na actualidade conforman a asociación 135 institucións oficiais pertencentes a 29 países europeos e Estados Unidos e Israel.

A USC instalaralle Galinux a tódolos alumnos que asistan á Install Party 2009

A Asociación de Usuarios de Linux da Universidade de Santiago de Compostela (AULUSC), vén de anunciar a celebración, o vindeiro xoves 5 e venres 6 de marzo, da Install Party 2009, unha actividade que ten como obxectivo axudarlle aos participantes a instalar un sistema operativo GNU/Linux no seu equipo, ben sexa portátil ou de sobremesa.

Nesta edición da Install Party empregarase o novo sistema operativo en galego Galinux recentemente publicado por Mancomún, e a cada participante faráselle entrega dunha copia dos mesmo en formato CD para que o leven consigo.

A intención é que ao final da actividade, os asistentes teñan un sistema operativo plenamente funcional, con todo tipo de aplicacións libres, tanto de traballo como de ocio e diversión, de balde e en galego.

Aínda que teñen preferencia os estudantes de primeiro curso de Enxeñaría Técnica en Informática de Sistemas da USC, a actividade está aberta a tódolos estudantes da Universidade de Santiago de Compostela; mais, estes últimos, deberán solicitar praza antes das 11:00 horas do xoves 5 de marzo, enviando un correo electrónico co seu nome e apelidos a aulusc@aulusc.org.es indicando como asunto Inscrición Install Party 2009.

Asemade, á hora de realizar a inscrición, cada participante deberá escoller a modalidade que prefira, podendo escoller entre estas dúas:

-Virtualización: é un método totalmente seguro que permite instalar un sistema operativo sen modificar o sistema actual, mediante un software de virtualización que deberá instalarse previamente. Os participantes que escollan esta opción deberán dispoñer dun espacio en disco suficiente para gardar a imaxe virtualizada. É necesario que haxa como mínimo 10GB baleiros no sistema.

-Particionamento hardware: é o método de instalación que ofrece un mellor rendemento ó usuario pero ten riscos de perda de información (en moi poucos casos). Os participantes que escollan esta opción deberán traer o disco duro debidamente acondicionado, cun espazo de 10GB non asignados en unha partición extendida (máis información sobre particionado do disco duro e gparted).

A Install Party terá lugar na aula I8 da Escola Técnica Superior de Enxeñaría da USC, situada no Departamento de Electrónica e Computación; cada sesión dará comezo as 12:00 horas e terá unha duración estimada de 2 horas.

Os responsables do evento recoméndanlle aos asistentes que realicen unha copia de seguridade dos datos dos seus ordenadores antes de proceder á instalación do novo software e, no caso de levar un ordenador de sobremesa, que empreguen os monitores que hai na aula.

Asemade, recomendan que o equipo dispoña dunha tarxeta de rede (cableada ou sen fíos) para deixar o sistema correctamente actualizado. Para poder acceder a Internet cun interfaz sen fíos, din, “é preciso darse de alta previamente na rede sen fíos da USC”.

Xuventude Galiza Net fai este ano ao seu décimo aniversario con nova sede

O encontro informático Xuventude Galiza Net chega este ano á súa décima edición. O evento organizado pola Dirección Xeral de Xuventude e Solidariedade vai ter moitas novidades, tal e como se anunciara na pasada convocatoria.

Segundo se informa na web oficial, Xuventude Galiza Net 09 terá lugar do 3 ao 5 de abril no Multiusos Fontes do Sar, en Compostela, o que permitirá contar cunha capacidade moi superior á das edicións anteriores. Isto tamén permitirá que se amplíe o límite de idade: poderán asistir persoas de 16 a 35 anos.

As persoas que se rexistraron na web para XGN08, aínda que non obtivesen praza, teñen sitio asegurado para o décimo aniversario. Só teñen que activar a súa conta e facer o pagamento antes do 31 de xaneiro. O resto da xente pode efectuar a preinscrición como até agora. A data será o 14 de febreiro ás 17 horas.

Eganet participa no Cultur.gal cun foro sobre innovación e coñecemento

A Asociación de Empresas Galegas Adicadas a Internet e ás Novas Tecnoloxías (Eganet) vén de anunciar que participará na Feira Galega das Industrias Culturais, Cultur.gal 2008, prevista para os días 4, 5, 6 e 7 de decembro na Coruña, coa II Edición das Xornadas Coñecer e Innovar.

O obxectivo do encontro, que se desenvolverá os vindeiros xoves 4 e venres 5, é, segundo anunciaron os seus responsables, “promover un foro de debate e reflexión no que abrir posibilidades de cooperación a prol da creación de sinerxías entre empresas do sector con negocios alleos ás novas tecnoloxías”. Preto de 50 entidades empresariais confirmaron xa a súa participación na iniciativa.

Eganet, disporá, asemade, dun expositor propio na Feira, no que distribuirá material informativo dos seus novos proxectos e das empresas asociadas. Deste xeito, as persoas que se acheguen a este punto informativo poderán coñecer o novo programa divulgativo dirixido a centros de ensino co obxectivo de paliar o déficit de profesionais adaptados ás necesidades que demandan as empresas do sector TIC. Eganet potenciará tamén a información dirixida ao tecido empresarial galego para dar a coñecer as vantaxes das novas tecnoloxías, aplicadas segundo as características reais de cada empresa. Esta campaña centrarase nos concellos como canle para chegar a todas as asociacións empresariais de Galicia.

Kutruparty 2008: tres días de rede ininterrompida na Estrada

A Kutruparty, un dos máis salientables encontros redeiros da nosa terra e que vai xa pola sexta edición. A party, que se celebra entre o 5 de decembro e o día 8, ten como centro de operacións a localidade pontevedresa da Estrada, máis polo miúdo o seu Pazo de Exposicións, onde se dará acollida a máis de 300 participantes.

O encontro, organizado por Auslae Omix, xa ten aberto o prazo de inscrición para concorrer nas diferentes actividades do programa. Por certo que en referencia ás accións a organizar hai unha serie de novidades que cómpre ter en conta. Por exemplo: unha baixada de até 5 euros nos prezos dos rexistros que se fagan antes do 31 de outubro.

Amais, dende a organización vense de reforzar a vontade de ofrecer unha party aberta. Ou sexa, que o fin non é limitar o eido de acción dos participantes ao seu computador e pouco máis, senón todo o contrario: serán benvidas todas as propostas de forma e contido que contribúan a achegar unha party o máis salientable e completa posible.

Entre outras moitas actividades, a xuntanza en liña estradense ten previstas unha Linux install party, obradoiros de robótica (para os que se usará a plataforma libre Arduino) e de fotografía dixital, charlas e mesas redondas sobre o novo cinema e a Web 2.0 ou as acostumadas competicións de xogos en liña.

Cómpre sinalar que, amais das infraestruturas básicas que se porán a disposición dos mozos e mozas inscritos (entre elas, acceso de 80 megas de conexión), haberá tres consolas PlayStation e unha Wii con todo o equipamento extra engadido para levar a cabo torneos de Guitar Hero, de Tennis Wii Sport e até de Dance Dance Revolution.