A revista en liña Foeminas celebra o seu aniversario nun número especial

A Revista Virtual de Xénero Foeminas vén de editar xa o seu número 31, no que, celebrando o seu terceiro aniversario e conmemorando o Día Internacional pola Eliminación da Violencia contra as Mulleres, achega un completo reportaxe sobre as VII Xornadas Locais sobre Violencia de Xénero, que se enmarcan no I Plan de Igualdade de Oportunidades de Lugo.

A publicación en liña, que edita a Concellaría de Muller e Servizos Sociais de Lugo, tamén achega diversos artigos de actualidade como a primeira parte da vida da pintora Maruja Mallo ou a crítica do libro de poemas Esencia de Trementina, de Cristina Corral Soilán, realizada por Esperanza Robles.

Na sección habitual Contemporáne@ dedícase un apartado especial á frautista galega Alicia Val Lasanta así como unha entrevista á recoñecida cociñeira Beatriz Sotelo Sequeiros, quen acaba de recibir un premio polo seu traballo.

Outros contidos habituais da publicación virtual que se poden volver a gozar neste último número son Viaxeiras, Foeminas panorámica, Mullerecetario e Noticias “con novas e renovadas achegas”.