Preséntase en Ribadeo o programa Memoria de muller

Este mércores presentouse en Ribadeo o proxecto Memoria da Muller, que vai desenvolver a Rede de Dinamización da Sociedade da Información. No acto participaron a directora xeral de Promoción Industrial e da Sociedade da Información, Helena Veiguela, e o alcalde de Ribadeo, Fernando Suárez Barcia.

O programa pretende achegar as mulleres ás novas tecnoloxías e á Sociedade da Información e amosarlles a súa utilidade. Deste xeito, preténdese reducir a fenda dixital que lle afecta a este colectivo, especialmente no rural. Memoria de Muller, ademais, contribúe á recuperación da memoria histórica, persoal e sociocultural de cada concello a través dos relatos persoais das mulleres participantes, que se converten en protagonistas e artífices do proceso.

As asistentes actúan motivadas por unha implicación afectiva ao estar relatando pasaxes da súa vivencia recollidas da memoria. Para acadar o obxectivo, as mulleres elaboraron un vídeo con fotografías e imaxes propias, ás que lles engadiron a narración da súa propia historia dende unha perspectiva de xénero. Empregaron a súa voz e o son ou músicas que consideraron oportunas.

No ano 2008 leváronse a cabo 23 iniciativas de Memoria da Muller. En Ribadeo presentáronse cinco historias: A romaría de Santa Cruz, Nai non hai máis que unha, Muller que emigrou dúas veces, As miñas vivencias e A ría de Ribadeo.

En cada proxecto participan de 4 a 8 persoas, maiores de 50 anos, guiadas por unha persoa dinamizadora, que lles axuda a escribir a historia, seleccionar as imaxes, escanealas e tratalas, montalas, narralas e sonorizalas, labores que efectúan as mesmas participantes. Previamente reciben obradoiros que lles fornecen as destrezas necesarias para elaborar o vídeo.

A iniciativa Memoria de Muller enténdese como un proxecto de recuperación da muller galega para que se poida preservar e rescatar do esquecemento, dándolles a voz ás mulleres a través das novas tecnoloxías para transmitirlles esa memoria ás vindeiras xeracións. O paso final inclúe unha presentación, no concello onde se realizaron, dos vídeos, para o recoñecemento do traballo das súas protagonistas. Ao remate, difúndense por internet todas e cada unha das historias mediante un portal específico.