Publícanse no BOE as liñas de axudas do Plan Avanza2

Este mércores publicouse no Boletín Oficial do Estado a convocatoria de axudas do Plan Avanza2 de impulso da Sociedade da Información que leva a cabo o Ministerio de Industria. Serán, en total, 1.516 millóns de euros só para 2009.

As partidas asignadas polo Ministerio de Industria, Turismo e Comercio para este plan durante o ano 2009 ascenden a 1.516 millóns de euros. Financiaranse directamente as actuacións da administración estatal e cofinanciaranse as que se desenvolvan coas comunidades autónomas, concellos, entidades sen ánimo de lucro e empresas.

As iniciativas de Avanza2 agrúpanse en cinco eixes de actuación:

Desenvolvemento do sector TIC (663 millóns de euros en 2009): Ten como obxectivo apoiar empresas para que desenvolvan novos produtos, procesos, aplicacións, contidos e servizos TIC, promovendo a participación industrial na construción da internet do futuro e o desenvolvemento de contidos dixitais. Financiaranse programas de innovación ligados á Sociedade da Información que permitan seguir avanzando na mellora da competitividade do sector TIC e do conxunto da economía. As pemes verán reforzado o seu papel prioritario como destinatarias destas axudas e iniciativas.

Capacitación TIC (548 millóns de euros): Persegue incorporar masivamente á Sociedade da Información tanto á cidadanía como ao empresariado, cunha prioridade reforzada nas pemes e no seu persoal. Neste eixe, reforzarase a prioridade de incorporación á Sociedade da Información dos colectivos especiais, persoas con discapacidade e maiores, ademais de microempresas.

Servizos Públicos Dixitais (186 millóns): Mellorarase a calidade dos servizos prestados polas adminstracións públicas en rede, con énfase especial no apoio ás entidades locais e o desenvolvemento do DNI electrónico. Así mesmo, apoiarase a creación de novas plataformas e contidos no eido da educación e no sanitario a partir dos logros de Avanza.

Infraestruturas (89 millóns): Reforzará o impulso ao desenvolvemento e á implantación da Sociedade da Información en contornos locais, mellorando a prestación dos servizos públicos electrónicos á cidadanía e ás empresas mediante o uso das TIC. Ademais, estenderase a adopción da TDT de cara á plena substitución da televisión analóxica pola dixital, no marco do Plan Estatal de Transición á TDT. Reforzarase o desenvolvemento e aplicación da nova normativa de infraestruturas comúns de telecomunicacións en edificios e canalizacións en dominio público.

Confianza e Seguridade (11 millones de euros en 2009): Persegue o dobre obxectivo de reforzar a confianza nas TIC entre a cidadanía e o empresariado, mediante políticas públicas de seguridade da información e fomento da accesibilidade dos servizos TIC.

As bases e o orzamento de cada un dos apartados deste plan atópanse ao dispor do público nestas páxinas do BOE (en PDF) e na web do Plan Avanza2.