Sete rexistros civís delegados comezan o proceso de dixitalización

A Consellaría de Presidencia, en colaboración co Ministerio de Xustiza, inicia este mes de marzo o proceso de informatización dos rexistros civís delegados, adscritos aos xulgados de paz. Será a segunda fase do programa Rexistro civil en liña, que forma parte do Plan Avanza. O programa ten por obxecto conectar todas as oficinas que o rexistro posúe en cada municipio cunha base de datos central en Madrid.
Xustiza

A segunda fase de informatización abranguerá experiencias piloto nos rexistros de Ames, Arteixo, Bueu, Guitiriz, Nigrán, Sada e Teo. Despois da aplicación do rexistro civil en liña nestes concellos, seleccionados polo comité de seguimento da implantación do programa en Galiza, irase incorporando ao resto dos civís delegados, até os 270 que existen no país.

Entre novembro de 2007 e marzo de 2008 informatizáronse os 45 rexistros civís principais, correspondentes ás sete cidades galegas e ás 38 vilas cabeceiras de partido xudicial atendidas por un xulgado de primeira instancia. O goberno español, que mantén a competencia sobre o Rexistro civil, dotou de equipamento informático as oficinas, mentres que a consellaría se ocupou de instalalos e conectalos á rede corporativa da Xunta de Galicia e, á súa vez, á aplicación INFOREG 4, residente no Ministerio de Xustiza, onde se almacenan os datos sobre o estado civil de toda a poboación española.

Dixitalización

Ademais, a segunda fase do programa pretende dixitalizar todas as inscricións de nacemento, matrimonio e defunción dende 1950, como xa se fixo nos 45 rexistros civís principais de marzo a decembro de 2008. Co escaneo de 6.480 libros de inscricións, realizado baixo a dirección de Red.es e accesíbel xa no INFOREG 4, Galiza converteuse nunha das primeiras comunidades autónomas en finalizar o proceso.

O sistema de informatización permite, así mesmo, facer as inscricións en calquera das dúas linguas oficiais, a escolla das persoas interesadas. De todos os xeitos, a lingua escollida no momento da inscrición non será obstáculo para que as certificacións se poidan obter na outra lingua, pois todos os rexistros quedan almacenados no sistema de información tanto en galego como en castelán.

Fases de informatización dos xulgados de paz

O proceso de dixitalización do resto dos Rexistros civís vaise realizar en dúas fases. A primeira afectaralles aos situados en xulgados de paz dos concellos de máis de 15 mil habitantes e está prevista para os meses de abril a xullo de 2009, até completar 74 oficinas delegadas. A segunda fase, de setembro de 2009 a outubro de 2010, comprenderá os 196 xulgados de paz restantes, con concellos de menos de sete mil habitantes e atendidos por secretarios "idóneos" designados pola corporación local. A continuación dixitalizaranse as inscricións até 1950, competencia de Red.es.

A informatización dos rexistros, xunto coa dixitalización e a gravación dos libros, posibilitarán unfuncionamento máis eficaz do servizo e supoñen a incorporación da xustiza de paz á Sociedade da Información. Con esta actuación, os xulgados de paz quedarán conectados á rede co resto da administración de xustiza de Galiza e do Estado Español, e poderán prestarlle servizos telemáticos á cidadanía. Ademais, os xulgados de paz poderán acceder aos servizos da intranet da Dirección Xeral de Xustiza, do Ministerio de Xustiza e do Consello Xeral do Poder Xudicial.

Pola súa banda, a cidadanía poderá solicitar certificados a través do correo electrónico ou da web, posibilidade que xa existe no portal mjusticia.es. Doutra banda, os distintos organismos das Administracións Públicas, como a Seguridade Social e o Instituto Nacional de Estatística, recibirán directamente por vía telemática a información que na actualidade lles remiten todos e cada un dos xulgados de paz.

Notificacións telemáticas

Ademais, nove xulgados a provincia da Coruña xa teñen implantado o sistema de notificacións telemáticas LEXNET, realizado a través dun convenio de cooperación tecnolóxica asinado entre o Ministerio de Xustiza e a Consellaría de Presidencia, Administracións Públicas e Xustiza. A función principal deste sistema é o intercambio instantáneo de documentos xudiciais en formato electrónico que garante a seguridade e a fiabilidade de comunicación entre todos os membros que participan na Administración de xustiza.