O 4 de Marzo, día do erro 403 para os usuarios do Internet Explorer

Calquera que teña Internet Explorer e sexa usuario asiduo das redes saberá que o dito navegador aparece cada día máis cuestionado no universo en liña. De feito, xa hai webs onde che recomendan directamente que é mellor que vaias cambiando de ferramenta, non vaia ser que calquera día te vexas na Internet como se ven a si mesmas todas as persoas que se meten nun atasco de tráfico malia saber que había amplas posibilidades de embotellamento. O caso é que a comunidade Chuza! (especialmente activa á hora de recomendar alternativas ó dito navegador) sinala estes días unha iniciativa para poñer ó Internet Explorer un pouquiño máis na picota.

Chámase 403day.org e o obxectivo é dobre: facer do 4 do marzo un día sen IE (prohibindo o acceso ó navegador nos sitios que participan) e poñer de manifesto, textualmente, que “o dominio que exerce no mercado esta ferramenta de mala calidade é peor que coller unha pera con tequila barato”.

O nome da proposta, máis ben un número (o 403) ten que ver co código que emprega o servidor para devolver a mensaxe de acceso denegador. No caderno de Dizque poderemos atopar máis información ó respecto, amais das ligazóns dos non-usuarios do IE que están a colaborar na proposta, cada un deles achegando unha peza do manifesto.

Na imaxe, prácticas de vudú sobre a ferramenta vistas en Chigarden.