O Día europeo por unha internet máis segura céntrase este ano no uso do móbil

O martes 12 de febreiro conmemórase o Día europeo por unha internet máis segura. Con este motivo, o organismo Red.es e Telefónica asinaron un convenio de colaboración para emprenderen accións conxuntas a prol da protección do menor no uso das TIC, entre elas actividades e campañas informativas sobre o uso responsábel da tecnoloxía.

A edición de 2008 xira arredor do uso do teléfono móbil. Por iso, o programa Chaval.es desenvolveu un xogo para que os menores asimilen consellos sobre o uso correcto do aparello. Dende o pasado día 7, a páxina Internetseguraenred.es recibiu máis de 1.000 visitas de rapaces para participar nunha plataforma baseada no clásico Arcade Invaders dos anos 80.

A xornada enmárcase no programa Safer Internet Plus, promovido pola Unión Europea a través da Comisión para a Sociedade da Información e Medios.