Un sistema permitirá aprender a lingua de signos na rede

Un equipo da Facultade de Ciencias da Educación da Universidade de Santiago de Compostela (USC) deseñou un método innovador para mellorar a aprendizaxe da lingua de signos a través de internet e achegala á sociedade. Empregará ferramentas como a videoconferencia e o vídeo dixital, pola importancia que ten o aspecto visual neste tipo de lingua.

Segundo indicaron os impulsores do sistema, a metodoloxía será "flexíbel e adaptada a cada alumno", con titorías persoais e sesións de videoconferencia en pequenos grupos por medio dunha plataforma virtual accesíbel en todo momento. Para a súa programación empregarase software libre.

Consideran que representa "unha innovación" fronte a outros cursos que "aínda que están na internet non favorecen moito a interacción" e fronte a outros presenciais que son "moi exhaustivos no tempo, o que representa un impedimento para moita xente".