Carne p’ra Canhão, a mafia do bacalhau en 'webisodios'

Alumnos da Universidade de Aveiro crean unha orixinal serie en internet, que achega episodios de cinco minutos.

Un futuro ficticio no que se aproba unha polémica lei que prohibe o consumo de bacallau, e este comeza a ser obxecto de tráfico no mercado negro a prezos esaxerados. Na cidade de Obscurém comezan entón a acontecer crimes violentos e mortes misteriosas. O protagonista, Alheiras, recibe un día un envío que o leva a iniciar unha investigación que remata por introducilo no escuro mundo das mafias onde a xente está "disposta a matar por uma salgada posta de bacalhau".

Velaí teñen a sinopse do espectacular proxecto que argallaron alumnos do curso de comunicación e multimedia da Universidade de Aveiro. Os rapaces armaron así 'Carne pra Canhão', pioneira serie audiovisual deseñada para a web e filmada en estudio con escenarios virtuais e unha orixinal e innovadora estética. As pezas, bautizadas webisodios, e de apenas cinco minutos, poden verse na bitácora creada para contar do desenvolvemento da idea.