Flocos.tv nace como a fiestra á Internet do audiovisual galego

Onte comezaron as emisións en proba do cineclub da Axencia Audiovisual Galega, Flocos.tv, que nace coa ilusión de converterse na pantalla da produción da industria audiovisual galega na que convivan tanto a Industria coma os creadores individuais.
Flocos.tv é unha canle de vídeo para a difusión de producións galegas repartidas nas categorías de ficción, animación, documental, experimental e ciclos, que pódense ver en calidades normal, alta e HD (esta última non dispoñible na meirande parte das pezas) e tamén é posible incrustar os clips en webs e blogs, cunha aposta pola Web 2.0 que permite espallar o noso audiovisual por toda a Rede de xeito natural, grazas aos traballo de A Navalla Suíza (tamén detrás de proxectos de éxito coma Quin.tv).

Preténdese que Flocos.tv conte cunha estrea diaria e, cada 15 días, un ciclo en base a un criterio específico de programación, ocupando así un lugar destacado nas labores de promoción dos produtos audiovisuais galegos.