O Colexio Oficial de Telecomunicacións publica un decálogo sobre o futuro do sector

O Colexio Oficial de Enxeñeiros de Telecomunicación de Galicia (COETG) elaborou o Decálogo das Telecomunicacións, un documento que recolle as súas principais propostas en materia TIC para os vindeiros catro anos.

Un dos puntos dese informe, publicado no último suplemento A Nosa Rede (PDF), faise eco da defensa levada a cabo polo colexio para que Galiza se converta na sede da Axencia Estatal das Radiocomunicacións, que situaría o país no mapa mundial das telecomunicacións.

O decálogo tamén contempla a creación dunha unidade de alto nivel das telecomunicacións e da Sociedade da Información que poida guiar e coordinar o futuro das TIC en Galiza, e a incorporación dos proxectos das telecomunicacións ao mapa de infraestruturas, acompañados dun obrigado visado profesional. Tamén se mencionan o despregamento de redes, o impulso de novos servizos, a alfabetización dixital e a e-administración, que permitirá situar a administración pública do país á vangarda e ao servizo da cidadanía.

Asemade, o informe considera as TIC como ferramenta clave para o desenvolvemento sustentábel, coa pretensión de converter o PEGSI nun programa tamén víabel, asumíbel economicamente e materializábel logrando que cubra as necesidades e as aspiracións de Galiza en materia TIC, fomentar o uso das TIC nas pemes e desenvolver unha industria propia forte do sector.