Milleiros de internautas únense ao grupo de Facebook que acusa de homofobia a un xurado de Vigo

Un veciño de Vigo Rober Bass logo de dar conta do seu malestar pola decisión tomada por un xurado popular de Vigo ante un caso de asasinato acontecido na cidade galega: o xurado declarou non culpable ao home que lles asestou 57 coiteladas aos seus anfitrións homosexuais porque, sostivo, actuou baixo o medo a ser violado. Bass, indignado logo ser informado deste veredicto e atopando nunha boa parte das persoas que o rodeaban a mesma reacción, animouse finalmente a botar man da Rede para facer aínda máis fronte común.

Segundo informa estes días La Voz, este é precisamente o xermolo dun novo grupo na rede social Facebook, o espazo Tod@ contra o tribunal popular homófobo de Vigo, que, como o seu propio nome indica, vai encamiñado a buscar unha nova resolución coa axuda das ferramentas dixitais e dos usuarios.

A nova fronte en Facebook, que a día de hoxe conta con case 6.000 membros de toda España, atopou en poucos días unha chea de mostras de apoio dende todos os recantos do país. Por certo que o espazo está a servir tamén de punto de unión e mobilización para amigos das vítimas, que xa están a sentar os alicerces dunha manifestación cidadá en toda regra. O éxito do grupo é aínda máis salientable se temos en conta que responde á indignación social no seu estado máis puro, sen intereses aparentes de asociacións ou ideoloxías: simplemente estamos a falar dun colectivo de internautas que comparten a mesma arela de xustiza. Por certo que a actividade de rexeitamento cara á decisión do xurado vigués non só se reflectiu na Rede: colectivos a prol da defensa dos dereitos dos gais e das lesbianas xa tomaron posicións.