Qimo, Linux para os pequechos

Qimo é un sistema operativo de escritorio deseñado para nenos e nenas a partir de 3 anos. Está baseado en Ubuntu, e trae instalados varios xogos educativos.

A interface de Qimo deseñouse para ser intuitiva e fácil de usar, con iconas grandes para tódolos xogos instalados. Así, ata os máis pequenos poderán seleccionar a actividade que queren sen ningún problema.

Nesta ligazón podemos ver algunha captura de pantalla dos programas que Qimo trae instalados. Estes programas inclúen GCompris , Childsplay , eToys , entre outros aplicativos educativos.

A organización creadora de Qimo, QuinnCo, Incorporated foi fundada por Michael e Michelle Hall. Trátase dunha organización sen ánimo de lucro, deseñada para axudar a nenos e nenas con necesidades educativas especiais ou aqueles de poucos recursos económicos, ofrecéndolles sistemas informáticos totalmente funcionais.

QuinnCo recolle calquera tipo de ordenadores e partes de ordenadores doados, e constrúen con eles os seus sistemas. Eliminan completamente calquera dato anterior que conteña, e logo instalan Qimo. Finalmente, doan eses equipos a rapaces e rapazas con necesidades especiais.