Allariz acollerá as súas primeiras xornadas dedicadas ás TIC

O Concello de Allariz organiza para os días 20, 21 e 22 de novembro as primeiras Xornadas de Participación Cidadá a través das TIC, unha iniciativa que contará con relatorios prácticos, experiencias demostradoras e novidades tecnolóxicas.

As xornadas quérense converter nun escaparate práctico de propostas e ideas de cara a crear un modelo que sirva de exemplo para concellos de poboacións rurais dispersas, así como presentar de maneira práctica ferramentas e aplicacións que permitan crear contidos para chegar de maneira rápida e sinxela en calquera comunidade sexa de ámbito social, educativo ou técnico.

Con este fin, proponse durante as xornadas obter un documento práctico cuxa difusión leve a crear redes sociais nos propios concellos ou institucións, incorporando o uso normalizado das TIC a todos os membros que compoñan dita comunidade.

Poderán inscribirse nestas xornadas, de carácter gratuíto, os técnicos e responsábeis da administración local das áreas de Novas Tecnoloxías e/ou Participación Cidadá, persoal das comunidades educativas, responsábeis de asociacións e colectivos de calquera índole interesados en aplicar as novas tecnoloxías no seu contorno e/ou profesionais en xeral relacionados coas TIC e outras persoas interesadas nestas áreas.

A inscrición pódese realizar a través da páxina www.allariz.com/dixital/xornadas ou chamando por teléfono ao Centro de Promoción Económica (988 44 22 10).

Ao remate das xornadas teórico-prácticas, que durarán 20 horas, os asistentes recibirán un certificado acreditativo de asistencia. O programa pódese consultar tamén na web do concello alaricano.