A internet sen fíos chegará aos polígonos de Guitiriz, Xove, Muimenta e Castro de Ribeiras de Lea

Os polígonos industriais de Guitiriz, Xove, Cospeito e Castro de Rei contarán proximamente con redes sen fíos de acceso a internet. O conselleiro de Innovación e Industria, Fernando Blanco, asinou cadanseu convenio de colaboración con representantes dos catro concellos para a posta a disposición da Consellaría dos terreos para a instalación do equipamento necesario.

O investimento ascende a 364.421 euros. Deste xeito, os parques empresariais de Guitiriz, Xove, Muimenta e Castro de Ribeiras de Lea súmanse aos 32 polígonos de todo o país que contarán con banda larga, cun orzamento total de 4,6 millóns de euros.

Segundo explicou Fernando Blanco, a cobertura de rede sen fíos farase mediante o sistema Wimax. Ademais, os convenios asinados contemplan que estean en funcionamento antes do 15 de xuño. Deste xeito, as 63 empresas instaladas nos polígonos e as máis de 200 vivendas das zonas colindantes poderán dispoñer do servizo nun breve prazo.

Estas actuacións encádranse no PEGSI, dentro do plan da consellaría de dotar de acceso á internet de banda larga de calidade a totalidade dos polígonos industriais do país. Coas actuacións desenvolvidas ou en marcha, o 92,5% dos parques industriais de Galiza poderán xa acceder ao servizo de banda larga, coa previsión de que se acade o 100% en 2009.