Novo videoblog sobre o sector móbil

A Asociación Española de Comunicacións Móbiles (AECOMO) quere aproveitar os medios que brinda a Web 2.0 para cumprir cos seus obxectivos como asociación, polo que publica o videoblog Movilcast.com, no que se publican entrevistas a empresas de novos servizos móbiles ou de aplicacións para dispositivos móbiles, así como reportaxes sobre eventos ou feiras ás que asista a Asociación.

O novo espazo non se limita á publicación de vídeos (hospedados en Blip.tv, de xeito que están accesibles para a súa descarga en distintos formatos e mesmo permite a subscrición dende aplicacións coma iTunes ou Miro), senón que tamén acollerá podcasts, fotografías e mesmo unha plataforma de rede social baseada en Ning.

Nun principio Movilcast se anuncia coma un webshow sobre estilo de vida, lecer, traballo e sociedade móbil, aínda que polo momento se limita a presentar un limitado catálogo de vídeos de arquivo polo que haberá que agardar para ver se este espazo electrónico consegue tecer unha rede social ao seu redor, pois permite empregar a súa plataforma para a creación de blogs, canles ou grupos de interese, publicación de vídeos e fotografías e relacionarse con outros usuarios.