Galinux publica a súa primeira actualización

Respondendo á impresionante demanda de Galinux, Mancomún anuncia a publicación dunha actualización que, como melloras máis destacadas, inclúe a detección de máis dispositivos de hardware e as últimas versións dos aplicativos máis populares como Firefox ou OpenOffice.

A demanda de Galinux está a resultar realmente impactante: no seu primeiro trimestre de vida, máis de 15 mil CD foron distribuídos a trevés dos puntos de distribución e rexistráronse máis de 25 mil descargas dende a web. Grazas a Galinux miles de personas están achéganse cada día ao movemento do software libre.

Trátase da primeira actualización das tres previstas durante o ciclo de vida da actual versión de Galinux, o que permitirá manter o noso sistema operativo actualizado até abril do 2011.

Esta actualización está destinada a aquelas persoas con coñecementos avanzados de GNU/Linux e moi especialmente para as empresas integradoras de hardware que queiran fornecer os seus produtos cunha versión de Galinux actualizada á última. Con todo, os usuarios de Ubuntu 8.10 poden probar esta actualización instalando os paquetes seguindo as instrucións publicadas no wiki de Mancomún.

No entanto, para todas aquelas persoas que se achegan por primeira vez a un sistema GNU/Linux grazas ao Galinux, promovido pola Dirección Xeral de Promoción Industrial e da Sociedade da Información, é preferíbel e recomendábel que continúen a empregar a versión presentada a finais do ano pasado e da que poden obter unha copia a través dos puntos de distribución. O principal motivo é porque se basea en Ubuntu 8.04 LTS, o que quere dicir que é unha versión que recibirá actualizacións de seguridade durante un período moito maior que as versións normais, en concreto durante 3 anos, e polo que se recomenda o seu uso en contornos de produción.

Galinux, o primeiro sistema operativo galego

Galinux é un completo sistema operativo en galego promovido pola Dirección Xeral de Promoción Industrial e da Sociedade da Información; que ademais de todas as funcionalidades típicas dun sistema operativo, incorpora os principais aplicativos, como o popular navegador web Firefox, as aplicacións de ofimática incluídas no OpenOffice.org (procesador de textos, folla de cálculo ou presentacións multimedia), un corrector ortográfico en galego, clientes de correo electrónico, un programa de retoque fotográfico de alta calidade, aplicación de mensaxería instantánea, reprodutores de son e vídeo, gravador de CD e DVD, etc. Todos eles en galego e con actualizacións permanentes.